ԳԱՌՆԵՑԻՆԵՐՆ ԱՌԱՋԱՐԿՈՎ ԵՆ ՀԱՆԴԵՍ ԵԿԵԼ

ԳԱՌՆԵՑԻՆԵՐՆ ԱՌԱՋԱՐԿՈՎ ԵՆ ՀԱՆԴԵՍ ԵԿԵԼ

Օրեր առաջ Գառնի գյուղի  մի խումբ բնակիչներ բողոքի ալիք էին բարձրացրել: Պատճառն այն է, որ համայնքի կողքով անցնող գետից՝ Ազատից, ջուրը  820 սմ խողովակով  պետք է հոսի և ոռոգի  Արարատի մարզի մի քանի գյուղեր:Գյուղացիների պնդմամբ, եթե խողովակն անցկացվի, ապա իրենց համայնքը կզրկվի ոռոգման ջրից:

Հիշեցնենք, որ ըստ ծրագրի՝ գետի երկայնքով պետք է կառուցվի 820 սմ տրամաչափի խողովակ, որով պետք է ամառվա երկու ամիսներին ջուր տեղափոխվի Արարատի մարզի գյուղեր: Խողովակի շնորհիվ էլեկտրական պոմպեր չեն օգտագործվի, և ոռոգման ջուրը այդ տարածքի համար կէժանանա:

«Իրավունքի» հետ զրույցում Գառնի  գյուղի գյուղապետ ԱՇՈՏ ՎԱՐԴԱՆՅԱՆՆ ասաց, որ  գառնեցիները մտավախություն ունեն, որ  խողովակի կառուցման դեպքում Ազատ գետի ջուրը կցամաքի: Գյուղապետը, սակայն, համակարծիք չէ այդ տեսակետին. գետը գյուղից ցածր է 100-200 մետր, բայց եթե խողովակը կառուցվի, կչորանա բնությունը:

Պրն Վարդանյանի խոսքով`գառնեցիներն առայժմ դադարեցրել են իրենց բողոքի ակցիան. «Մենք առաջարկով ենք  հանդես եկել`ինչպես Նարեկ գյուղը, այնպես էլ Գառնին ունեն անջրդի տարածքներ: Առաջարկել ենք, եթե հնարավոր է մեր տարածքները  ևս  դարձնեն ջրովի, հանեն պոմպակայանները: Առաջարկը քննարկման փուլում է»:

Ինչ վերաբերում է  այդ տարածքում ՀԷԿ կառուցելու մասին լուրերին, Վարդանյանն ասաց, որ  ՀԷԿ-ի կառուցման մասին ոչինչ չի լսել:

Ի դեպ,  հավանաբար, մի քանի օր անց նախատեսվում է  նորից հանդիպել Գառնի գյուղի բնակիչների հետ` հարցի քննարկման նպատակով: «Նախագծողները գրեթե ոչինչ չներկայացրին, ջրային ռեսուրսների գործակալությունն էլ դեռ չի տվել ջրի թույլտվություն»,- եզրափակեց Աշոտ Վարդանյանը:

ՍՈՆԱ ԴԱՎԹՅԱՆ