5 ՏԱՐԻ ԱՌԱՋ ՀՖՖ-ՈՒՄ ԹԵՅՄՈՒՐՅԱՆԻՆ ՉԷԻՆ ԷԼ ՃԱՆԱՉՈՒՄ

5 ՏԱՐԻ ԱՌԱՋ ՀՖՖ-ՈՒՄ ԹԵՅՄՈՒՐՅԱՆԻՆ ՉԷԻՆ ԷԼ ՃԱՆԱՉՈՒՄ

Ավարտվեց ֆուտբոլի աշխարհի հերթական առաջնությունը, եւ հայ ֆուտբոլասերները ստիպված էին այն հետեւել` առանց իրենց ազգային հավաքականին երկրպագելու: Բայց մեկ է, այս առաջնությունը նույնպես առանց հայ ֆուտբոլիստի չմնաց: Խոսքը Իրանի ֆուտբոլի ազգային հավաքականը ներկայացնող ԱՆԴՐԱՆԻԿ ԹԵՅՄՈՒՐՅԱՆԻ մասին է, ում հայտնությունը միանշանակ հաճելի անակնկալ էր հայ ֆուտբոլասերների համար:

Մինչ այդ, Հայաստանում գրեթե անհայտ Անդրանիկ Թեյմուրյանը մարզական առաջին հաջողությունները գրանցել է Թեհրանի ՙԱրարատ՚ ֆուտբոլային ակումբում, որը ժամանակին Իրանի բարձրագույն խմբի երեք ամենահռչակված ու սիրված թիմերից մեկն էր: Թեհրանի ՙԱրարատից՚ բացի, Անդրանիկ Թեյմուրյանը խաղացել է Իրանի առաջնության լավագույն թիմերից մեկում` ՙԷսթեղլալում՚, ինչպես նաեւ անգլիական ՙԲոլթոն՚, ՙՖուլհեմ՚ ֆուտբոլային ակումբներում:
Պետք է նաեւ նշել, որ Թեյմուրյանը Իրանի ազգային հավաքականի միակ քրիստոնյա ֆուտբոլիստն է, ում վստահվեց անգամ թիմի ավագի թեւկապը: Բրազիլիայի առաջնությունը 31-ամյա հայ ֆուտբոլիստի երկրորդ մասնակցությունն էր աշխարհի առաջնության եզրափակիչ խաղերին:
Թեյմուրյանը հասցրել է ձեռք բերել կոպիտ խաղացողի համբավ, բայց խաղադաշտում միշտ աչքի է ընկել նաեւ արտասովոր լրջությամբ: Իրանի հեռուստատեսության առաջին ՙ90 րոպե՚ մարզական ծրագրի մեկնաբանի հարցին` ՙԲոլո՞ր հայերն են այդքան լուրջ՚, պատասխանել է. ՙԱյո°, հայերը լուրջ ազգ են եւ սիրում են պայքարել՚:
Անդրանիկ Թեյմուրյանը Իրանի ազգային հավաքականի կազմում խփել է ութ գնդակ: Ընդգրկվել է Ասիա աշխարհամասի 10 լավագույն ֆուտբոլիստների ցուցակում:
Անդրանիկ Թեյմուրյանն ունի նաեւ Հայաստանի քաղաքացիություն: Ուստիեւ՝հետաքրքիր է՝ երբեւէ նա մտածե՞լ է Հայաստանի ազգային ընտրանու թիմում տեղ գտնելու մասին: Որպեսզի պարզենք, թե Հայաստանի ազգային ընտրանուց Թեյմուրյանը երբեւէ հրավեր ստացել է, թե` ոչ, ՙԻրավունքը՚ դիմեց ՀՀ Ֆուտբոլի ֆեդերացիային: Նախ` մեզ տվեցին շատ ՙհետաքրքիր՚ պատասխան. ՙԻսկ ինչի՞ համար եք ուզում իմանալ, ինչի՞ եք հարցնում՚: Դե, նորմալ է, որ ՀՖՖ-ում դեռ նման հարցերի վրա զարմանում են, եւ բնավ տարօրինակ էլ չէ, որ խնդրեցին ավելի ուշ զանգահարել, որպեսզի հարցի պատասխանը կարողանան տալ: Ինչեւէ, ինֆորմացվելուց հետո, երբ արդեն կարող էին հարցին պատասխանել, ՀՖՖ-ի աշխատակիցը, չգիտես ինչու, սկսեց մեզ մեղադրել` ֆուտբոլից չհասկանալու մեջ, մասնավորապես նշելով. ՙԱնդրանիկ Թեյմուրյանը արդեն 5 տարի է իր հավաքականում է խաղում, մենք ինչպե±ս կարող ենք հրավիրել նրան Հայաստանի հավաքական: Եթե ֆուտբոլիստը մի խաղ անգամ ինչ-որ հավաքականում հանդես է եկել, էլ ո՞նց կարող է ուրիշ հավաքականում խաղալ՚:
Ամերիկա հայտնագործելուց հետո, երբ վերջապես ՀՖՖ-ի` անհասկանալիորեն այդքան բորբոքված աշխատակիցը թույլ տվեց հարցը միչեւ վերջ ձեւակերպել եւ հասկացավ, որ բնավ նկատի չունենք 31-ամյա Անդրանիկ Թեյմուրյանին վաղը հավաքական հրավիրելը, այլ խոսքը այն ժամանակվա մասին է, երբ ֆուտբոլիստը դեռ նոր պետք է ընտրեր, թե որ հավաքականում է հանդես գալու, ստացանք հետեւյալ պատասխանը. ՙ5 տարի առաջ մենք Անդրանիկ Թեյմուրյանին ոչ ճանաչում էինք, ոչ էլ գիտեինք՚:
Իսկ այդ պատասխանը թույլ է տալիս չբացառել, որ այսօր էլ ՀՖՖ-ն հայ ֆուտբոլիստներից շատերի գոյության մասին կարող է անգամ չիմանալ: Արդյունքում՝ ազգաին թիմը բարձրակարգ ֆուտբոլիստներից զրկվելու վտանգի տակ է հայտնվում, իսկ երկրպագուները այդ ֆուտբոլիստների ելույթներին ստիպված են լինելու հետեւել այլ հավաքականների կազմերում:

ՔՐԻՍՏԻՆԵ ՊԵՏՐՈՍՅԱՆ