ՙԲԵՄՈՒՄ ՌԱՖԱՅԵԼ ՔՈԹԱՆՋՅԱՆՆ ԷՐ` ԻՐԵՆ ՀԱՏՈՒԿ ԱՌՈՒՅԳՈՒԹՅԱՄԲ

ԲԵՄՈՒՄ ՌԱՖԱՅԵԼ ՔՈԹԱՆՋՅԱՆՆ ԷՐ` ԻՐԵՆ ՀԱՏՈՒԿ ԱՌՈՒՅԳՈՒԹՅԱՄԲ

Օրերս Առնո Բաբաջանյան համերգասրահում կայացավ ՀՀ ժողովրդական արտիստ, Բնության եւ հասարակական գիտությունների միջազգային ակադեմիայի իսկական անդամ, դերասան ՌԱՖԱՅԵԼ ՔՈԹԱՆՋՅԱՆԻ հոբելյանական երեկոն: Երեկոն ազդարարեց փոքրիկ տեսաֆիլմը, որտեղ իրեն հատուկ հումորներով 70-ամյա դերասանը պատմում էր իր ծնունդից մինչեւ պատանի, երիտասարդ, ապա` արդեն կայացած դերասան ու հայրիկ դարձած Ռաֆայել Քոթանջյանի մասին:
Ողջ երեկոյի ընթացքում 7 տասնամյակը բոլորած վարպետն իրեն հատուկ առույգությամբ կերպարանափոխվում էր` բեմում մարմնավորելով մի քանի կերպարներ, որոնք ընդմիջվում էին որդի Քոթանջյանի` Մայքլի երաժշտական կատարումներով, հանդիսատեսին ներկայացնելով իր հին ու նոր սիրված երգերը:

Սակայն, Մայքլը չսահմանափակվեց միայն այդքանով, երեկոյի ավարտին հանդես եկավ անակնկալով. կատարեց իր «Արտիստը» երգը` նվիրված հայրիկին` մեծ դերասան Ռաֆայել Քոթանջյանին:
Երեկոյի ավարտին Եվրոպայի արվեստի եւ գիտության միջազգային ակադեմիայի կողմից ՀՀ ժողովրդական արտիստ Ռ. Քոթանջյանը պարգեւատրվեց «Լավագույն դերասան» շքանշանով: Ըստ ակադեմիայի նախագահ, պրոֆեսոր Ռաֆայել Մելիք-Օհանջանյանի` այդ շքանշանին արժանանում են եվրոպական երկրների առաջավոր հայտնի դերասանները:
Ակադեմիայի կողմից պատվոգիրը պատիվ ուներ հանձնելու ՍԻՄ կուսակցության նախագահ, ԱԺ ՀՀԿ խմբակցության պատգամավոր, ակադեմիայի ակադեմիկոս ՀԱՅԿ ԲԱԲՈՒԽԱՆՅԱՆԸ, ով շնորհավորելով Ռ. Քոթանջյանին` ասաց. «Դուք մեծ ներդրում ունեք հայկական թատերարվեստի ու կինոյի զարգացման մեջ: Երեկ ես կարդում էի Ձեր հարցազրույցը` մատաղ սերնդի դաստիարակության անհրաժեշտության մասին, Դուք նույնպես Ձեր բարի եւ չար դերերով, որոնք ներկայացրել եք որպես դաստիարակության մեթոդ, այդտեղ մեծ ներդրում ունեք: Ուզում եմ, իսկապես պատիվ համարելով, հանձնել այս պատվոգիրը, որն ընդամենը Ձեր արժանիքների մի փոքր հատվածն է գնահատում»:
Ռաֆայել Քոթանջյանն էլ ստացած պարգեւներից խիստ զգացված` դիմելով հանդիսատեսին` նշեց. «Ինձ համար հաճելի է շքանշաններ ստանալը, բայց ամենահաճելի պահը ձեր ծափերն են եւ ձեր ներկայությունը, շնորհակալություն որ դուք կաք»: Իսկ «Իրավունքի» հետ զրույցում դերասանն անկեղծացավ. «Վերջերս մի առիթ եղավ` խոսում էինք, թե արդյո±ք ճիշտ է, որ բոլորին տալիս են Վաստակավորի կամ Ժողովրդականի կոչումներ: Գտնում եմ` որքան էլ տան, թեկուզ եւ սխալ մարդու, բայց այն շատ կարեւոր է, որովհետեւ մարդու աշխատանքը պիտի գնահատվի, թեկուզ նրանց մեջ լինեն անարժան մարդիկ: Այդ անարժանները լավ էլ զգում են, որ իրենք արժանի չեն: Ավելի լավ է սխալվել եւ տալ, քան` չտալ, որովհետեւ մարդը պետք է միշտ զգա, որ իր արած գործը գնահատվում է»:
Այդ օրը նույն ակադեմիայի կողմից միաժամանակ պարգեւատրվեց նաեւ Քոթանջյան որդին` Մայքլը, արժանանալով Լեոնարդո դա Վինչիի անվան շքանշանին, որն ըստ Ռաֆայել Մելիք-Օհանջանյանի. «Հայաստանում առաջին անգամ է հանձնվում, որն էլ շնորհվեց հենց Մայքլին»:
Հ. Բաբուխանյանը պատվոգիրը հանձնելով Մայքլին` նշեց. «Կարծում եմ` սա սկիզբն է գնահատանքի, երբ Մայքլը 70 տարեկան կդառնա` ինչպես իր հայրը, բազմաթիվ մեդալների, դիպլոմների կողքին այդ օրը մենք առիթ կունենանք արդեն նրան շնորհելու այն նույն շքանշանը, որն իր հայրն այսօր ստացավ»:
Շքանշանը ստանալով` Մայքլն ասաց. «Լեոնարդո դա Վինչիի անվանումը մեծ դեր է խաղացել իմ ամբողջ կյանքում: Նա հանճարեղ մարդ է, նրա անվանումով մրցանակ ստանալն ինձ շատ պարտավորեցնող է եւ հաճելի»:
Արդեն ետնաբեմում Մայքլն իր հույզերը փոխանցեց «Իրավունքին». «Շատ էմոցիաներով լեցուն օր է, հաճելի էր նման շքանշան ստանալ, այն էլ` Լեոնադրո դա Վինչիի անվան: Արվեստի բնագավառի յուրաքանչյուր մարդ կարիք ունի գնահատանքի, թեկուզ շքանշանի տեսքով, քանի որ ծափահարությունները քիչ են: Այս շքանշանը ինչ-որ տեղ կապում եմ հայրիկին նվիրված երգի հետ, այն շատ կարեւոր երգ էր իմ ստեղծագործական կյանքում: Անընդհատ մտածում էի մի երգ ստեղծել, տեսահոլովակ նկարահանել հայրիկի մասին, եւ նրա 70 ամյակը շատ լավ առիթ հանդիսացավ: Ես գտա այն կոմպոզիտորին` Արթուր Նիկողոսյանին (Կոնս), որը կարողացավ համապատասխան երգ ու երաժշտություն գրել հայրիկի համար, իսկ դա գեղեցիկ տեսահոլավակ դարձրեց ռեժիսոր Հրանտ Մովսիսյանը, ինչի համար շնորհակալ եմ իրենց»:

ԼԻԼԻԹ ԵՂԻԱԶԱՐՅԱՆ