ԻՍԿ «ԳՈՐՇ ԳԱՅԼԵՐ» ԿԱԶՄԱԿԵՐՊՈՒԹՅՈՒՆՆ ԻՆՉՈ՞Վ Է ՏԱՐԲԵՐՎՈՒՄ ԴԻՎԵՐՍԱՆՏՆԵՐԻՑ. ԴԱՎԻԹ ԲԱԲԱՅԱՆ

ԻՍԿ «ԳՈՐՇ ԳԱՅԼԵՐ» ԿԱԶՄԱԿԵՐՊՈՒԹՅՈՒՆՆ ԻՆՉՈ՞Վ Է ՏԱՐԲԵՐՎՈՒՄ

ԴԻՎԵՐՍԱՆՏՆԵՐԻՑ. ԴԱՎԻԹ ԲԱԲԱՅԱՆ

ԼՂՀ նախագահի մամուլի քարտուղար Դավիթ Բաբայանը, «Իրավունքի» հետ զրույցում  անդրադառնալով վերջին շրջանում Ադրբեջանի դիվերսիոն գործողություններին, ասաց, որ այդ ամենը ցույց  է տալիս  Ադրբեջանի էությունը.«Ադրբեջանը դարձել է դիվերսիոն  պետություն: Նա նման քայլեր անում է ոչ միայն  Հայաստանի, Արցախի, այլև սեփական ժողովրդի հանդեպ: Վառ ապացույցն Ադրբեջանում քաղաքական ակտիվիստների ձերբակալումն է ու որսը, որը ևս դիվերսիա է: Սա ցույց է տալիս իշխող ռեժիմի ու Ադրբեջանի էությունը»:

Ինչ վերաբերում է այն տեսակետին, թե հայկական կողմի վնասազերծած դիվերսանտները հազիվ թե իսկական դիվերսանտներ լինեն` հաշվի առնելով  նրանց արտաքին տեսքը (չի բացառվում, որ նրանք լինեն  «Գորշ  գայլեր» կազմակերպության անդամ), Բաբայանի խոսքով` հնչեցված այդ տեսակետներն իրարամերժ են. «Իսկ «Գորշ գայլեր» կազմակերպությունն ինչո՞վ է տարբերվում դիվերսանտներից, այն ևս ահաբեկչական կազմակերպություն է: Դիվերսանտների արտաքին տեսքին  պետք չէ խաբվել: Ամեն ինչ ցույց  է տալիս, որ նրանք իրոք դիվերսանտներ են»:

Արդյոք այս գործողությունները կհանգեցնեն Ադրբեջանի կողմից լայնածավալ ռազմական գործողությունների` պատերազմի` այդ կերպ վիժեցնելով ԵԱՀԿ ՄԽ-ի ձևաչափը, որով պետք է լուծվի արցախյան խնդիրը: «Ադրբեջանին  ոչ մի ձևաչափ չի բավարարում: Անհասկանալի է`այս  անտրամաբանական քայլերով ինչի է ուզում հասնել Բաքուն, եթե ԼՂ խնդրի ռազմաքաղաքական վիճակը չի փոխվում: Պարզապես ընկնում է այդ երկրի  առանց այդ էլ ցածր վարկանիշը: Ինչ վերաբերում է պատերազմ սկսելուն, դիվերսիոն գործողություններով չէ միայն պատերազմ սկսվում: Ռազմաքաղաքական հավասարակշռությունն այսօրպահպանվում է, Ադրբեջանը չի դիմում լայնածավալ գործողությունների»:

ՍՈՆԱ ԴԱՎԹՅԱՆ