ԲԺԻՇԿԸ ԾՆՈՂԻՆ` ԳԼԽԱՐԿ ԿՐԵՔ, ՀՈՎԱՆՈՑ ԲՌՆԵՔ

ԲԺԻՇԿԸ ԾՆՈՂԻՆ` ԳԼԽԱՐԿ ԿՐԵՔ, ՀՈՎԱՆՈՑ ԲՌՆԵՔ

- Երեխայիս մոտ քթային արյունահոսություններ են լինում: Վտանգավո՞ր է: Համացանցում կարդացել եմ, որ արյունահոսությունները կանխելու համար աղաջրով վիրախծուծ է պետք դնել:

Կօգնի՞: Խորհուրդ են տվել նաեւ խուսափել արեւի ճառագայթների անմիջական ազդեցությունից:

Հարցին պատասխանել է oտորինոլարինգոլոգ ԳԱՅԱՆԵ ԳԱԼՍՏՅԱՆԸ:

-Քթային արյունահոսությունը քթի լորձաթաղանթի ամբողջականության խախտումն է, որն արտահայտվում է արյան կաթիլների կամ շիթի ձեւով: Տարբերում են քթային արյունահոսության երկու տիպ` առաջնային եւ հետին: Ավելի վտանգավոր են հետին արյունահոսությունները: Վերջինիս պատճառը` օտար մարմինն է քթում, վնասվածք եւ այլն:
Քթային արյունահոսության պատճառ կարող են հանդիսանալ գերհոգնածությունը, ավիտամինոզը, անքնությունը, նյարդային գերլարվածությունը, որը բերում է անոթների պատի փխրունության, բարձրացման ու, հետեւաբար, քթային արյունահոսության, ինչպես նաեւ սրտային, երիկամային, նյարդային հիվանդությունները:
Ինչ է պետք անել քթային արյունահոսությունների ժամանակ. ուշադրություն դարձրեք մարմնի դիրքին: Տուժածը պետք է ընդունի կիսանստած դիրք, գլուխը մի փոքր առաջ բերած, որպեսզի արյունը քիթըմպանով հետ չգնա դեպի ստամոքս ու առաջացնի տհաճ երեւույթներ. սրտխառնոց, փսխում: Պետք է թրջել բամբակը 3% ջրածնի պերօքսիդի լուծույթով եւ դնել քթանցքների մեջ: Ցանկալի է քունքերի շրջանում ու հոնքամիջում դնել սառը թրջոց: Եթե 10 ր. ընթացքում արյունը չի դադարում` անհրաժեշտ է դիմել մասնագետի` կիթ-կոկորդ-ականջաբանի:
Աղաջրով վիրախծուծ կարելի է դնել, բայց ավելի արդյունավետ է 3% ջրածնի պերօքսիդը: Աղաջուրը պետք է լինի գերհագեցած լուծույթի տեսքով:
Հաճախակի եղեք մաքուր օդում, զերծ մնացեք սթրեսային իրավիճակներից եւ ֆիզիկական ու մտավոր գերլարվածությունից, ընդունեք վիտամիններով հարուստ սնունդ եւ շատ հեղուկներ: Խուսափեք նաեւ արեւի ճառագայթների անմիջական ազդեցությունից. գլխարկ կրեք, հովանոց բռնեք (կանանց)  եւ օրվա տապին գտնվեք զով միջավայրում:

Հարցին պատասխանել է նաեւ թիվ 2 բուժմիավորման թերապեւտ ՔՐԻՍՏԻՆԵ ՀՈՒՆԱՆՅԱՆԸ.

-Ամռանը հաճախ են լինում արեւահարություններ: Այն երկու աստիճանի է լինում` թեթեւ եւ ծանր: Ծանր աստիճանի արեւահարությունն ուղեկցվում է սրտխառնոցով, գլխացավերով ու գլխապտույտներով: Այս դեպքում հարկ է անհապաղ դիմել համապատասխան բուժկենտրոն` բուժօգնություն ստանալու համար: Թեթեւ դեպքերում ուղղակի պետք է խուսափել արեւի ճառագայթների տակ երկար մնալուց, մի քանի օր պահպանել  անկողնային ռեժիմ, օգտագործել շատ հեղուկներ:
Կանանց խորհուրդ է տրվում կրել հովանոցներ, որոնք չպետք է լինեն սեւ գույնի, այլ հնարավորինս գունավոր (հայտնի է, որ արեւի ճառագայթները սեւ գույնը շատ շուտ կլանում են):
Խորհուրդ է տրվում օգտագործել մեծ քանակությամբ հեղուկ, քանի որ այս շրջանում օրգանիզմը ջրազրկվում է. մարդիկ շատ են քրտնում: Օրական 2 լիտրից ոչ պակաս հեղուկ է անհրաժեշտ ըմպել:
Արեւի ճառագայթները ավելի մեծ վտանգ կարող են հասցնել հատկապես սիրտանոթային խնդիրներ ունեցող հիվանդներին, ինչպես նաեւ արյան զարկերակային բարձր ճնշում ունեցող անհատներին: Ուստի` հնարավորության դեպքում խորհուրդ է տրվում տանից դուրս գալ առավոտյան մինչեւ ժամը 11-ը կամ երեկոյան ժամը 18-ից հետո:
Ամռանն օգտագործեք ոչ շատ յուղոտ սննդամթերք: Կարող եք սննդակարգում ներառել կաթնամթերք` կաթնաշոռ, մածուն: Բնական հյութերից ցանկալի է օգտագործել խնձորի, մասուրի հյութը: Վերջինս հարուստ է վիտամին C-ով: Չմոռանաք օգտագործել շատ բանջարեղեն, մրգեր: Կարող եք այն համտեսել աղցանի տեսքով:
Խորհուրդ չի տրվում ամռան շրջանում սնվել դրսում: Հարկ է զերծ մնալ հատկապես կրեմով կարկանդակներից:

ՎԼԱԴ ՄՈՒՐԱԴՅԱՆ