ԱՌՋԵՎՈՒՄ 41-ՐԴ ՀԱՄԱՇԽԱՐՀԱՅԻՆ ՇԱԽՄԱՏԱՅԻՆ ՕԼԻՄՊԻԱԴԱՆ Է

ԱՌՋԵՎՈՒՄ 41-ՐԴ ՀԱՄԱՇԽԱՐՀԱՅԻՆ ՇԱԽՄԱՏԱՅԻՆ ՕԼԻՄՊԻԱԴԱՆ Է

Հայկական շախմատի ներկայացուցիչները շարունակում են ելույթները մի շարք միջազգային մրցաշարերում: Կատալոնիայի մայրաքաղաք Բարսելոնայում ավարտված մրցաշարում հայ գրոսմայստերներ Կարեն Գրիգորյանը եւ Կարեն Մովսիսյանը 9 հնարավորից վաստակեցին 6-ական միավոր: 91 մասնակիցների մեջ Գրիգորյանը զբաղեցրեց 11-րդ տեղը, իսկ Մովսիսյանըª 13-րդ:
Իսկ գրոսմայստերներ Կարեն Մովսիսյանն ու Հրանտ Մելքումյանը մասնակցում են Իսպանիայի Բենասկ քաղաքում հուլիսի 4-ին մեկնարկած օփեն մրցաշարին, որտեղ 3 տուրերից հետո Հրանտ Մելքումյանը վաստակել է 3 միավոր, եւ գտնվում է առաջատարների խմբում: Կարեն Մովսիսյանն իր ակտիվում ունի 2,5 միավոր: Հայաստանի մեկ այլ ներկայացուցիչ Էդգար Կարագյոզյանը հաջողություն գրանցեց Փարիզում անցկացված կայծակնային մրցաշարում, որտեղ հայ շախմատիստը 15 հնարավորից վաստակելով 13 միավորª 89 մասնակիցների մեջ նվաճելով առաջին մրցանակը:
Հետ չեն մնում նաեւ հայ շախմատիստուհիները: Եվրոպան ներկայացնող 10 ուժեղագույն երիտասարդ շախմատիստուհիներ հրավիրվել էին Շվեյցարիայի մայրաքաղաք  Ժնեւ` մասնակցելու ՙհավաք-մրցաշարին՚: Հանրահայտ շախմատային գործիչ, գրոսմայստեր Ժուժա Պոլգարը ուշադրության էր արժանացրել եւ Ժնեւ հրավիրվել նաեւ ՖԻԴԵ-ի վարպետ Մարիա Գեւորգյանին: Ողջ միջոցառման ընթացքում հայ շախմատիստուհին իրեն դրսեւորել է գերազանց եւ վերջում էլ անցկացված արագ շախմատի մրցաշարում 9 հնարավորից վաստակել 7,5 միավորª բաժանելով 1-2 տեղերը իսրայելցի միջազգային վարպետ Յուլյա Շվայգերի հետ:
Իսկ շախմատի կանանց Հայաստանի հավաքականն այս օրերին Բուլղարիայի Պլովդիվ քաղաքում մասնակցում է Եվրոպայի անհատական առաջնությանը: Հայ շախմատիստուհիները հաջող մեկնարկ են ունեցել. Էլինա Դանիելյանը, Լիլիթ Մկրտչյանը, Մարիա Կուրսովան եւ Լիլիթ Գալոյանը առաջին տուրում  առավելության են հասել մրցակիցների նկատմամբ: Կուրսովան առավելության է հասել սպիտակներով, իսկ մյուս երեք շախմատիստներըª սեւերով: Հայաստանի մեկ այլ ներկայացուցիչ Շուշաննա Սարգսյանը պարտվել է առաջին տուրում:
Սակայն շախմատային կարեւորագույն իրադարձությունը դեռ առջեւում է: Օգոստոսի 2-ից 14-ը Նորվեգիայի Տրոմսյո քաղաքում տեղի կունենա 41-րդ համաշխարհային շախմատային օլիմպիադան, որի պաշտոնական կայքը ներկայացրել է մասնակիցների հայտացուցակները: Վարկանիշային առաջատարը Ռուսաստանի հավաքականն էª 2767 միավորով: Հայաստանի հավաքականի հայտացուցակում են Լեւոն Արոնյանը, Սերգեյ Մովսեսյանը, Գաբրիել Սարգսյանը, Վլադիմիր Հակոբյանը եւ Տիգրան Քոթանջյանը: Մեր հավաքականի վարկանիշը 2677 է: Հիշեցնենք, որ 2012թ. Ստամբուլում կայացած Օլիմպիադայում Հայաստանի հավաքականը երրորդ անգամ նվաճեց չեմպիոնի տիտղոսը:

ՔՐԻՍՏԻՆԵ ՊԵՏՐՈՍՅԱՆ