ՙՙՙԲՆԱԿԱՆ Է, ՈՐ ՀԵՖԵՐՆԸ ՊԵՏՔ Է ՔԻԹԸ ԽՈԹԵՐ ՄԵՐ ԵՐԿՐԻ ԳՈՐԾԵՐԻՆ՚

ՙԲՆԱԿԱՆ Է, ՈՐ ՀԵՖԵՐՆԸ ՊԵՏՔ Է ՔԻԹԸ ԽՈԹԵՐ
ՄԵՐ ԵՐԿՐԻ ԳՈՐԾԵՐԻՆ՚

ՙԵս եւ Ուորլիքն այն զգացողությունն ունենք, որ երկու կողմերն էլ այդ երկու տարածքները դիտարկում են որպես մեկ ամբողջություն: Եթե երկու կողմերն էլ այդ ընկալմամբ առաջնորդվեն, ապա կարգավորում չի լինի: Պետք է հասկանալ, որ Լեռնային Ղարաբաղի համար կարեւոր է, որ մյուս 7 տարածքները վերադարձվեն Ադրբեջանին: Եվ եթե հակամարտության կողմերից որեւէ մեկը չի պատկերացնում լուծումն այդ տարբերակով, ապա դրա համար շատ երկար ժամանակ կպահանջվի, հակամարտությունն էլ շատ երկար կտեւի՚: Այս մասին իր հայտարարությունն է կատարել ՀՀ-ում ԱՄՆ դեսպամ Ջոն Հեֆերնը` նախորդ շաբաթ կրկին հիշեցնելով ավելի վաղ իր եւ ԵԱՀԿ ՄԽ ամերիկացի համանախագահ Ջեյմս Ուորլիքի արած պնդումները` Լեռնային Ղարաբաղի ներկայիս տարածքի մի մասը Ադրբեջանին հանձնելու անհրաժեշտության վերաբերյալ: Այս առիթով ԱԺ ՀՀԿ խմբակցության պատգամավոր  ԼԵՌՆԻԿ ԱԼԵՔՍԱՆՅԱՆԸ մեզ հետ զրույցում նշեց, որ սա կապված է այն բանի հետ, որ Հայաստանը պատրաստվում է անդամակցել Եվրասիական տնտեսական միությանը, որի պատճառով էլ, Եվրոպայի եւ ԱՄՆ-ի կողմից կոշտացումներ կարող են լինել:
-Դժվարանում եմ ասել, թե ինչու է նա այդպես ասել, բայց պետք է միանշանակ ասել, որ հիմք պետք է ընդունել համանախագահների ասածը, իսկ դեսպանի ասածը եւս կարեւոր է, բայց ոչ պաշտոնական է:
- Բայց չէ որ Հեֆերնը ներկայացնում է ԱՄՆ-ն:
- Այո, բայց նա չի արտահայտում պաշտոնական տեսակետ, այլ միայն հայտարարություն է կատարում: Պարզապես, պետք է հասկանալ, թե Հեֆերնը ո±ր քաղաքական մասի կամ ականջի համար է նման հայտարարություն կատարել: Տարածքների վերադարձման մասին միշտ էլ խոսվում է, եւ եթե գա մի օր, երբ ամբողջությամբ լուծված կլինի Արցախի հարցը, անվտանգությունը, այդ ժամանակ էլ կարելի է մտածել, խոսել որոշ տարածքների վերադարձման մասին, բայց հիմա ունենք այն, ինչ ունենք: Ես լուրջ չեմ ընդունում դեսպանի այդ հայտարարությունը: Եվ ամեն մի իրավիճակում արված ինչ-ինչ հայտարարությունները ինֆորմացիա են, երբեմն ճնշում գործադրելու միջոց են, բայց լուրջ տեսակետ չի կարելի համարել:
- Նա նաեւ ասել է, որ ՙՈրոտան՚ հէկ-ը պետք է անվերապահ վաճառել ԱՄՆ-ին...
- Դա ընդամենը ցանկություն է, ինչպե±ս կարելի է այն վաճառել ամերիկացիներին:
- Չեք կարծում, որ այս դեսպանը շատ է իր քիթը խոթում մեր երկրի գործունեությանը:
- Այո, իհարկե: Նորից եմ ասում, ՀՀ-ի` ՄՄ-ին անդամակցման հարցում Եվրոպայի հետ հարաբերություններն ավելի մեղմ են, քան ԱՄՆ-ի, որը բնականաբար պետք է փորձի ճնշումներ իրականացնել թե° տնտեսապես, թե° քաղաքականապես, ինչը բնական է: Բնականաբար, նա էլ քիթը խոթելու է եւ փորձելու է ճնշումներ իրականացնել:  
- Օրեր առաջ նույն դեսպանը իր կողմից պարգեւատրել է մի համասեռամոլի եւ ֆեմինիստական շարժման ներկայացուցչի: Սրան ինչպե±ս եք նայում:
- Շատ բացասական եմ նայում: Սա նաեւ վերը նշված քաղաքականության շարունակությունն է: Նա շատ լավ է ուսումնասիրել մեր երկրում համասեռամոլների իրավիճակը, եւ պարգեւատրումն էլ ցուցադրական մի բան է:
- Տեղյակ եք, որ ՙԺառանգություն՚ խմբակցության պատգամավոր Զարուհի Փոստանջյանը վերադարձել է Միացյալ Նահանգներից բավականին ՙզինված՚ եւ ինչ-ինչ հայտարարություններ է կատարում: Նա գտնում է, որ ԲՀԿ-ն հիմնել է ՀՀ երկրորդ նախագահը: Կիսո±ւմ եք այս տեսակետը:
- Ես չեմ կիսում այն ամբողջությամբ: Գուցե Ռ. Քոչարյանը տեղյակ է եղել կամ որեւէ քաղաքական համաձայնություն է ունեցել ԲՀԿ-ի հետ, բայց որ նա է ստեղծել ամբողջությամբ` համաձայն չեմ: Հնարավոր է` իր նախագահության օրոք դրական է նայել այդ կուսակցության ստեղծմանը:
- Եթե հաշվի առնենք այն, որ ԲՀԿ-ն ստեղծվեց հենց Քոչարյանի ղեկավարման տարիներին, ապա ինչ-որ առումով պատգամավորի ասածը արդյո±ք չի համապատասխանում իրականությանը:
- Ստեղծվելն ուրիշ բան է, բայց հովանավորյալ լինելն ուրիշ բան է, քանի որ առաջին նախագահի օրոք էլ շատ կուսակցություններ են ստեղծվել: ԲՀԿ-ն ստեղծել է Գագիկ Ծառուկյանը, եւ նա քիչ հնարավորություններ չի ունեցել` այն ստեղծելու համար: Բացի այդ, անցել են տարիներ, եւ շատ հարցերում արդեն կան շատ անհամաձայնություններ Քոչարյանի եւ ԲՀԿ-ի միջեւ` իրենց հայտարարություններում: Եվ եթե  անգամ նա օգնել է այդ կուսակցությունը ստեղծելու հարցում, ապա չենք կարող բացառել, որ տեղի են ունեցել դիրքորոշումների փոփոխություններ:
- Տիկին Փոստանջյանը նաեւ կասկածի տակ է դրել ՙքառյակի՚ գործունեությունը:
- Կասեմ, որ ՙքառյակի՚ մեջ դժվար թե լուրջ գաղափարական համաձայնության գան, որը կյանքն է ցույց տալիս: Ընդդեմ կարող են միավորվել, այլ ոչ թե հանուն: Կասկածում եմ, որ այդ չորս կուսակցությունները բոլոր հարցերում համաձայնության գան: Նրանք պարզապես խորհրդարանում հասկանալով, որ միավորվելով` արդյունավետությունն ավելի մեծ է, ինչ-ինչ հարցերում ընդդեմ իշխանութունների կգնան, բայց արմատական ընդդիմություն չեն կարող դառնալ եւ առավել եւս` մասսաներ տանել իրենց հետեւից: Այս հարցում Զ. Փոստանջյանի հետ համաձայն եմ:
- Նա նաեւ ասել է, որ պետք է Հայաստանը լինի` առանց գործող նախագահի:
- Բնականաբար, բացասական եմ վերաբերվում, եւ չկա այն մարդը մեր դաշտում, ով իր փորձառությամբ, անցած ճանապարհով ավելի լավ կարողանա մեր խնդիրները լուծել:
- Ձեր կարծիքով` ինչո±ւ է ընդդիմությունը ցանկանում ճտերն աշնանը հաշվել, եթե հասարակությունը, իրենց ասելով, ունի դժգոհություններ:
- Մի պարզ պատճառով, որ այդ դժգոհություններն այդքան էլ շատ չեն:

ՙՕԵԿ-Ը ՄԻ ԽՆԴԻՐ Է ԼՈՒԾՈՒՄ, ՔԱՌՅԱԿԸ` ԱՅԼ՚

-Այդ դեպքում` ՕԵԿ-ն ինչու է մոտ օրերս հանրահավաք կազմակերպում, այլ ոչ թե աշնանը:
- Որովհետեւ ՕԵԿ-ն ուրիշ խնդիր է լուծում, քառյակը` այլ: Նրանք նոր են մտել ընդդիմություն, պետք է դեռ աշխատեն ժողովրդի հետ եւ հին կապերը վերականգնեն:
- Պարոն Ալեքսանյան, ինչն է պատճառը, որ ուշանում է ՄՄ-ին անդամագրվելու հարցը:
- Այն, որ անդամագրվելու ենք, դա փաստ է, քանի որ կա քաղաքական որոշում: Սակայն հիմա կան որոշակի տեխնիկական հարցեր: Չի բացառվում, որ Ադրբեջանի հետ կապված հարցերն էլ առաջ գան, նկատի ունեմ տարածաշրջանային առումով, ինչը ենթադրություն է, հաստատ  չեմ կարող ասել, բայց միեւնույն ժամանակ կան նաեւ կանոնակարգի մշակման, ելքի, մուտքի խնդիրներ:

ԱՐՄԵՆՈՒՀԻ ՀԱԿՈԲՅԱՆ