«ԻՆՉՊԵՍ ԲԵՐԴԵՐԻՑ, ԱՅՆՊԵՍ ԷԼ ՀՈԳԵԲՈՒԺԱԿԱՆ ԿԼԻՆԻԿԱՆԵՐԻՑ ԿԱՐՈՂ ԵՆ ՓԱԽՈՒՍՏԻ ԴԻՄԵՆ»

«ԻՆՉՊԵՍ ԲԵՐԴԵՐԻՑ, ԱՅՆՊԵՍ ԷԼ ՀՈԳԵԲՈՒԺԱԿԱՆ ԿԼԻՆԻԿԱՆԵՐԻՑ  ԿԱՐՈՂ

ԵՆ ՓԱԽՈՒՍՏԻ ԴԻՄԵՆ»

Ինչպես արդեն հայտնի է, ՀՔԾ-ի տարածած հաղորդագրության համաձայն` հունիսի 6-ի լույս 7-ի գիշերը «Նուբարաշեն հոգեբուժական կլինիկա» ՓԲԸ տարածքում ծառայություն իրականացրած ոստիկանները, ծառայության նկատմամբ անփույթ վերաբերմունքի հետևանքով ոչ պատշաճ են կատարել իրենց պարտականությունները, այն է` ուշադիր չեն եղել ծառայության ընթացքում, որի հետևանքով նշված ընկերությունում դատահոգեբուժական փորձաքննություն անցնող, ոստիկանությունում քննվող քրեական գործով մեղադրյալ, կալանավոր Ղուկաս Ա.-ն շենքից դուրս է եկել բակ և դիմել փախուստի:

«Իրավունքի» հետ զրույցում  Նուբարաշենի  հոգեբուժական կլինիկայի ղեկավար Արմեն Անանյանից պարզեց` արդյոք  կալանավորն ունեցել է  հոգեկան խնդիրներ: Վերջինս նախ ասաց, որ այդ մարդն այլևս իրենց հիվանդը չէ: Երկրորդ` նրան կլինիկա էին բերել հետազոտելու նպատակով: «Ո՞վ է ասում, որ նա հոգեկան հիվանդ է»,- վրդովված ասաց Անանյանը`հավելելով, որ  նման հարցերի ինքը հեռախոսով չի պատասխանում:

Հարցին`հաճախ են նման դեպքեր լինում,  թե՛ Անանյանը, թե՛ հոգեբուժական կլինիկայի   տղամարդկանց 5-րդ բաժանմունքի վարիչ Վազգեն Առաքելյանը  բացասական պատասխանեցին` սա եզակի դեպք է: «Գիտեք, ինչպես բերդերից են փախուստներ լինում, այնպես էլ կարող են  հոգեբուժական կլինիկաներից լինել»,- ասաց  Վազգեն Առաքելյանը:

Արդյոք միայն ազատության  մեջ գտնվելու ցանկությունն է կալանավորին դրդել  նման քայլի, թե այլ պատճառներ են եղել,  հոգեբուժական կլինիկայից հստակ պատասխան չտվեցին`ասելով, որ գործով զբաղվում են իրավապահ մարմինները: Մի  հանգամանք միայն նշեցին` հոբեբուժական կլինիկայում որևէ մեկին իր կամքին հակառակ չեն պահում:

Ի դեպ, առաջին անգամ չէ, որ Նուբարաշենի հոգեբուժարանից հիվանդ է փախչում: Նախորդ տարի օրինակ, գրեթե  նույն ժամանակահատվախում հիվանդ էր փախել, պարզապես ի տարբերություն փախուստի մեջ գտնվող  այս կալանավորի, հետ էր վերադարձել  կլինիկա:

ՀՀ ոստիկանության  հասարակայնության և լրատվության  բաժնից մեզ փոխանցեցին, որ  Ղուկաս Ա.-ը հենց նույն օրը` փախուստից երկու ժամ անց հայտնաբերել են: Իսկ թե որտեղ է կալանավորն այս պահին և ինչու է  փախուստ կատարել, պարզ կդառնա քննությունից հետո:

ՍՈՆԱ ԴԱՎԹՅԱՆ