Էմիլ Մարկի հայ-իտալական նշանադրությունը. «ՍԵՐՆ ԱԶԳՈՒԹՅՈՒՆ ՉԻ ՃԱՆԱՉՈՒՄ»

Էմիլ Մարկի հայ-իտալական նշանադրությունը.

«ՍԵՐՆ ԱԶԳՈՒԹՅՈՒՆ ՉԻ ՃԱՆԱՉՈՒՄ»

Հայտնի մոդել, գրող, թարգմանիչ ԷՄԻԼ ՄԱՐԿԸ «Իրավունքին» տված իր հարցազրույցներից մեկի ժամանակ, մեր այն հարցին, թե հնարավո՞ր է, որ նա տարված է օտարուհիներով ու դա է իր արտասահմանյան երկարատեւ ճամփորդությունների պատճառը, պատասխանել էր հետեւյալը. «Երբ սիրահարվում ես, այդ պահին կարծում եմ` ազգությունը մղվում է երկրորդական պլան: Կարեւորագույնն այն է, որ ընտրյալիդ հետ լինես հարմոնիայի մեջ»: Եվ, իսկապես, «Իրավունքը» չսխալվեց, իսկ Էմիլ Մարկը Մարսելում գտավ իր միակին ու անկրկնելիին` ՖՐԱՆՉԵՍԿԱ ՄԱՆԶԱՐԻԻՆ, ով ազգությամբ իտալուհի է: Ավելին` հենց Մարսելում հուլիսի 3-ին կայացավ երջանիկ զույգի նշանադրության արարողությունը: Այս կարեւորագույն իրադարձության, մարսելյան սիրո ու ամուսնության մասին, «Իրավունքը» զրուցեց Է. Մարկի հետ` եւս մեկ անգամ շնորհավորելով ու երջանկություն մաղթելով նոր կազմավորվող հայ-իտալական ընտանիքին:

- Էմիլ, փաստորեն, շատերը կարծում էին, որ Դուք Մարսելում Ձեր նոր գրքի համար մուսա եք փնտրում, սակայն իրականում գտաք Ձեր կյանքի մուսային:

- Կյանքի մուսա ունենալը կարեւոր նախապայման է երջանիկ լինելու, կյանքը լիարժեք վայելելու ու նաեւ հոգեպես երջանիկ լինելու համար եւ դա ինձ էլ բաժին հասավ:

- Որտե՞ղ եք ծանոթացել:

- Ֆրանչեսկայի հետ ծանոթացել եմ երեք տարի առաջ: Դուք էլ գիտեք, որ շատ էի շրջագայում Եվրոպայում ու մի անգամ էլ համալսարանում ծանոթացա ապագա կնոջս հետ: Իհարկե, այդ պահին մտքովս չէի կարող անցկացնել, որ իմ առջեւ ապագա կինս էր կանգնած: Շատ հաճախ էինք միմյանց հետ ժամանակ անցկացնում, իսկ ժամանակի ընթացքում ընկերությունը վերածվեց լուրջ հարաբերության:

- Այնուամենայնիվ, ինչո՞ւ այդքան հափշտապ կայացավ Ձեր նշանադրությունը:

- Չեմ կարծում, որ հափշտապ էր, քանի որ կյանքումս ամեն ինչ իր ժամանակին է տեղի ունենում:

- Ինչպե՞ս ընդունեցին Ձեր նշանադրության փաստը հարազատներդ, քանի որ հեռու եք նրանցից եւ այս կարեւոր իրադարձությանը նրանք ներկա չէին, այդ թվում նաեւ Ձեր ընկերները:

- Իհարկե, ընկերներիս, հարազատներիս եւ ամենակարեւորը` ընտանիքիս բացակայությունն ինձ տխրեցնում էր, սակայն որոշել ենք, որ Հայաստանում էլ ենք նշելու անպայման մեր նշանադրության տոնը:

- Մի փոքր կպատմե՞ք Ձեր մարսելյան նշանադրությունից, քանի որ, կարծես թե, այն բոլորովին էլ նման չէր ավանդական հայկական նշանադրություններին:

- Շատ գեղեցիկ արարողություն էր ջերմ միջավայրում` մեր մարսելյան ընկերների հետ: Տպավորված եմ ու խոսքեր դեռ չեմ գտնում զգացողություններս արտահայտելու համար…

- Իսկ ե՞րբ եք պատրաստվում ամուսնանալ:

- Ամուսնության մասին դեռ ոչինչ չեմ կարող ասել, կապրենք, կտեսնենք:

- Արդյո՞ք եվրոպական շատ ընտանիքների նման նշանադրությունից հետո պատրաստվում եք ապրել միասին` չսպասելով ամուսնության արարողությանը:

-Կինս դասախոս է հարեւան քաղաքում, դեռեւս միասին չենք ապրում, բայց շուտով…

- Ընդհանրապես երջանիկ զույգը որտե՞ղ է պատրաստվում ապրել` Հայաստանո՞ւմ, թե Ֆրանսիայում:

- Մենք շարունակելու ենք ապրել Ֆրանսիայում, չնայած` երկուսս էլ օտարերկրացի ենք` կինս իտալուհի է, ես` հայ: Երկուսս էլ այստեղ ենք աշխատում եւ ներկա պահին պատրաստվում ենք Ֆրանսիայում մնալ:

- Ի վերջո, ինչո՞ւ Էմիլ Մարգարյանն ընտրեց օտարազգի գեղեցկուհու եւ ոչ թե հայուհու:

- Սերն ազգություն չի ճանաչում:

ՀՐԱՆՏ ՍԱՐԱՖՅԱՆ