ՙՀԵՌՈՒՍՏԱԸՆԿԵՐՈՒԹՅԱՆ ՏԱՂԱՎԱՐ ԿԱՌՈՒՑԵԼՈՒ ՀԱՄԱՐ ՕԵԿ-Ը ՀԱՄԱԼՍԱՐԱՆԻՑ ՏԱՐԱԾՔ Է ԽԼՈՒՄ

ՀԵՌՈՒՍՏԱԸՆԿԵՐՈՒԹՅԱՆ  ՏԱՂԱՎԱՐ ԿԱՌՈՒՑԵԼՈՒ ՀԱՄԱՐ ՕԵԿ-Ը ՀԱՄԱԼՍԱՐԱՆԻՑ ՏԱՐԱԾՔ Է ԽԼՈՒՄ

Հայաստանի Ագրարային համալսարանի հարակից տարածքում ՙՕրինաց երկիր՚ կուսակցությունն իրականացնում է շինարարություն, որը հարուցել է  թե° բուհի դասախոսների, թե° ուսանողների, թե°  ղեկավարության դժգոհությունը: ՙԻրավունքի՚ հետ զրույցում  համալսարանի պրոռեկտոր ՊԱՐՈՒՅՐ ԷՖԵՆԴՅԱՆԸ ներկայացրեց խնդրի էությունը:
1994 թ.-ին  նախկին Գյուղինստիտուտը վերանվանելով Հայաստանի ազգային ագրարային համալսարան` ժառանգել է Գյուղինստիտուտի ողջ գույքը: Երկու տարի առաջ այն դարձավ ՊՈԱԿ, եւ կառավարության համապատասխան որոշման համաձայն` ամբողջ շինությունները պետության կողմից անհատույց օգտագործման իրավունքով տրվեցին բուհին: ՕԵԿ-ի եւ  Ագրարարային համալսարանի  համար կռվախնձոր դարձած տարածքը բուհի նախկին ավտոսպասարկման կետն էր, որը եւս  համարվում է  համալսարանի սեփականություն:
2004-ին ՕԵԿ-ը դիմել էր կառավարություն` խնդրելով բուհի տարածքից իրեն տրամադրել 520 քառակուսի մետր տարածք, բուհը տվել էր համաձայնություն, որից հետո կառուցվել էր ՕԵԿ-ի շենքը: Այդ ընթացքում կառուցվեց նաեւ Արթուր Բաղդասարյանի համար ավտոտակ ու ջերմատուն: ՙԱվտոտնակը 2006-ին քաղաքապետարանի կողմից ճանաչվեց ինքնակամ կառույց  եւ պետական սեփականություն, իսկ 2007-ին  կառավարությունը այն անժամկետ եւ անհատույց օգտագործման իրավունքով տվեց մեզ, որը կադաստրում ստացավ պետական գրանցում՚:
Այս տարվա մայիսի 23-ին, սակայն  բուհին  պատկանող ավտոտնակը սկսեցին քանդել: Հիմնավորումը, որը ներկայացրել է կուսակցությունը համալսարանի ղեկավարությանը, մեկն է` դա իրենց տարածքն է, որի քանդման համար իրենք ունեն թույլտվություն, եւ այն անձամբ պրոռեկտորը տեսել է. ՙԻրենք ունեն ե°ւ քանդելու թույլտվություն, ե°ւ դրան կից ճարտարապետանախագծային հանձնարարություն՚:
Այդ վիճելի տարածքը համալսարանի համար կարեւոր է այնքանով, որ, ինչպես տեղեկացրեց համալսարանի պրոռեկտորը, նախատեսվում է   այդտեղ տեղայակել  մեծ քանակով գյուղտեխնիկա:
Պարույր Էֆենդյանի խոսքով` շրջանառվող լուրերի համաձայն` ՕԵԿ-ը ցանկանում է այնտեղ ՙԵրեւան TV՚ հեռուստաընկերության համար տաղավար սարքել (հեռուստաընկերությունը վերջերս գնել է ՕԵԿ առաջնորդ Արթուր Բաղդասարյանը-խմբ.):
Ագրարային համալսարանը դիմել է ոստիկանություն ու քաղաքապետարան եւ կարողացել ժամանակավորապես դադարեցնել շինարարությունը, բայց  համալսարանի ղեկավարությունը դիմելու է դատարան` իրավական ճանապարհով խնդիրը լուծելու համար:
Խնդրի առնչությամբ փորձեցինք կապ հաստատել նաեւ ՕԵԿ անդամների հետ, սակայն  հեռախոսազանգերը մնացին անպատասխան:

ՍՈՆԱ ԴԱՎԹՅԱՆ