ԲՀԿ-Ն ՈՒՐԱՆՈՒՄ Է ԻՐ «ԿՆՔԱՀՈ՞ՐԸ«. ՏԵՍԱՆՅՈՒԹ

ԲՀԿ-Ն ՈՒՐԱՆՈՒՄ Է ԻՐ «ԿՆՔԱՀՈ՞ՐԸ». ՏԵՍԱՆՅՈՒԹ

ԱԺ չորս ոչ իշխանական ուժերը վերջերս հայտարարել էին, որ Հանրային ծառայությունները կարգավորող հանձնաժողովի կայացրած որոշումը էլեկտրաէներգիան չորս դրամով թանկացնելու մասին  քաղաքական որոշում է: ՀՀԿ պատգամավոր Տաճատ Վարդապետյանն էլ «Իրավունքի» հետ զրույցում ասել էր, «Քառյակի» այս անհամաձայնությունը քաղաքական բովանդակություն ունի: Այսօր «Իրավունքի» թղթակիցը այդ խնդրի առնչությամբ մի քանի հարց ուղղեց  ԲՀԿ խմբակցության պատգամավոր Միքայել Մելքումյանին:

-Պրն Մելքումյան, ինչպես եք արձագանքում իշխանության այն հայտարարությանը, թե հոսանքի թանկացման հետ չհամաձայնելը  քաղաքական բովանդակություն ունի և կարծես թե միջոց է «Քառյակի» համար աշնանը կայանալիք հանրահավաքներին հարցի միջոցով ժողովրդի մոտ դիվիդենտներ շահելու համար:

-Ոչ, նման բան չկա, քառյակի 12 կետանոց պահանջները կա, ես էլ արդեն 6 առաջարկ եմ ուղարկել  Հանրային ծառայությունները կարգավորող հանձնաժողովին: Մենք կսպասենք դեպքերի ընթացքին, տեսնենք`ինչպես են արձագանքում և ըստ այդմ`կկողմնորոշվենք` ինչ ենք անելու:

-Քառյակի վերջին հարցազրույցի ժամանակ ի՞նչ քայլեր եք ձեռնարկելու հոսանքի թանկացման դեմ հարցին ի պատասխան ՀԱԿ պատգամավոր Արամ Մանուկյանն ասել էր` դեռ ոչ մի բան չենք որոշել: Ինչով է պայմանավորված «Քառյակի» այս հապաղումը, չե՞ք կարծում` պետք է ինչ-որ քայլեր ձեռնարկել:

-Դե քառյակն իր օրակարգով շարժվում է: Դուք ուզում եք արագացնե՞ք կամ դանդաղեցնե՞ք:

- Քանի որ «Քառյակի» մասին  խոսեցինք,  հետաքրքիր է` ինչու ի վերջո քառյակի մաս կազմող ԲՀԿ-ն չի կարողանում ազատվել նախկին նախագահի ստվերից: Այդ  մասին, ի դեպ, պարբերաբար խոսում է նաև «Ժառանգության» անդամ Զարուհի Փոստանջյանը:

Դա ֆանտաստիկայի ժանրից է:Ես չեմ մեկնաբանում նրա (նկատի ունի Զարուհի Փոստանջյանին-խմբ.) հայտարարությունը:

Հ.Գ. Ինչքան էլ ԲՀԿ-ականները  կտրականապես  մերժեն իրենց և կուսակցության «կնքահայր» Ռ. Քոչարյանի կապը, միևնույն է թե  կուսակցության ստեղծման ժամանակագրությունը և դրանից բխող հասարակության ու քաղաքական դաշտի ընկալումը մեկն է`այլընտրանքային ուժը Քոչարյանի արբանյակն է: Ի դեպ,  շատերը չեն մոռացել Քոչարյանի ղեկավարման տարիներին պետական գույքի կառավարման ոլորտում պաշտոն զբաղեցրած փոխնախարար Միքայել Մելքումյանի գործունեությունն ու երկու տարի առաջ էլ այն սկանդալային պատմությունը, երբ պարզ դարձավ, որ պատգամավորը զբաղվում է  տարածքների վարձակալությամբ: Իսկ արդեն երկու տարի է «հայրենի» կոալիցիայի շարքերը լքելուց հետո ԲՀԿ-ն հրեշտակային թեւերով ժողովրդի շահերի պաշտպան է ներկայանում ու քննադատում է իշխանություններին:

Մանրամասները` տեսանյութում

ՍՈՆԱ ԴԱՎԹՅԱՆ