«Ազգային արհեստներն իմ արվեստի մեջ են…»

«Ազգային արհեստներն իմ արվեստի մեջ են…»

Վանաձորում բնակվող ՍՈՒՍԱՆՆԱ ՕՀԱՆՅԱՆԸ 1990-ական թվականներից պարբերաբար մասնակցում է քաղաքային, հանրապետական ցուցահանդեսների՝ ներկայացնելով փայտարվեստի ոլորտն իր հնարավոր երևակայումներով:

«Զբաղվելով փայտարվեստի զարգացմամբ՝ իմ առաքելությունն եմ համարում ազգային արհեստները իմ արվեստի մեջ ներկայացնելը: Գիտության և տեխնիկայի զարգացմանը զուգընթաց՝ ժամանակակից մարդու ուշադրությունից օտարվում և անտեսվում է այն ամենը, ինչ նախկինում անհրաժեշտ է եղել, առօրյա  կազմել: Օրինակ, աշխատանքներումս ներկայացնում եմ, թե ինչպես է վարն արվել, գութանը եզներով լծվել, Թումանյանի 15 ստեղծագործություններն եմ փայտարվեստում խտացրել, գելաստ հին հայկական աշխատանքային միջոցին եմ անդրադարձել, որով աղացել են կտավհատը, արևածաղիկը կամ հաճարը, ապա լցրել սալքարե տաշտերի մեջ և եզան օգնությամբ ստացված զանգվածից առանձնացրել ձեթը, ի դեպ, ձեթը կուտակել են մազից կառուցված սփռոցի մեջ, որն իր մեջ զանգվածը չի ներծծել: Մարդը, ապրելով բնության հետ, կարողացել է լուծումներ գտնել, կենցաղը հեշտացնել, ինչի  մասին մենք այսօր անգամ չգիտենք»,- ասում է տիկին Սուսաննան:

Սուսաննա Օհանյանը ունեցել նաև անհատական ցուցահանդեսներ. 2004թ.-ին ՀՀ մշակույթի նախարարության փայտարվեստի թանգարան՝ 33 աշխատանք, 2006 թ. Ստեփանավանի Մշակույթի և ժամանցի կենտրոն՝ 55 աշխատանք, 2007 թ. Երևանի Նարեկացի Արվեստի միություն՝ 50 աշխատանք, 2010 թ. Վանաձորի Սուրբ Գր.Նարեկացի եկեղեցու սրահ՝ 75 աշխատանք, 2012թ. Վանաձորի Սուրբ Գր. Նարեկացի եկեղեցու սրահ՝ 75 աշխատանք: 2005թ. «Եղեգնյա փող» համահայկական մշակութային փառատոնի շրջանակներում կայացած ցուցահանդեսում «Կին քանդակագործ» անվանակարգում «Հորովել» աշխատանքի համար արժանացել է առաջին կարգի դիպլոմի, 2012թ.-ի մայիսից Բելոռուսիայի Պոլոցկ քաղաքում մեկնարկած եղեռնի 100-ամյակին նվիրված շրջիկ ցուցահանդեսին մասնակցել է «Գաղթ» աշխատանքով և արժանացել պատվոգրի: Վանաձորում կայացած միջմարզային մշակութային 2-րդ ցուցահանդես-մրցույթում ճանաչվել է լավագույնը:

ԷԹԵՐԻ ՄԱՄՈՒԼՅԱՆ