ԵՐԲ «ՑՈՒՑԱԿԱՆ ԴԵՐԱՆՈՒՆՆԵՐԸ ՑՈՒՅՑ ԵՆ ՏԱԼԻՍ ԲԱՅԻ ՍԵՌԸ»

ԵՐԲ «ՑՈՒՑԱԿԱՆ ԴԵՐԱՆՈՒՆՆԵՐԸ ՑՈՒՅՑ ԵՆ ՏԱԼԻՍ ԲԱՅԻ ՍԵՌԸ»

Հանրության քննարկման թեման դեռ շարունակում են մնալ միասնական քննությունները: Ոմանք գոհ են արդյունքներից, ոմանք` ոչ. կարծում են` իրենք ավելի բարձր գնահատականի են արժանի:
Օրերս «Իրավունքը» ներկա է գտնվել Ռուսաց լեզու եւ գրականություն, Հայոց լեզու եւ գրականություն (բանավոր) առարկաների քննություններին, լսել ապագա բանասերների պատասխանները, որոնք, մեղմ ասած, այնքան էլ տպավորիչ չէին:  
Ռուսաց լեզվի եւ գրականության (բանավոր) քննության հանձնաժողովի նախագահ ԼԻԼԻԱ ԲԱԼԱՍԱՆՅԱՆԸ մեզ հետ զրույցում ասաց, որ դիմորդների պատրաստվածությունը ոչ այնքան պատշաճ է, սիրողական մակարդակի վրա է: «Պետք է ասեմ, որ դիմորդների պատասխաններն այնքան էլ գոհացուցիչ չէին: Դիմորդներ եղան, որոնց ստիպված եղանք անբավարար գնահատական նշանակել»,- արձանագրում է տիկին Բալասանյանը`

հավելելով, որ քննությանը ներկայացած դիմորդներն այդքան էլ հստակ  չեն պատկերացնում իրենց ապագան, ինչը մտորելու տեղիք է տալիս: «Ինքս դասավանդում եմ մանկավարժական համալսարանում ու կարող եմ ասել, որ նման լեզվի իմացությամբ նրանց համար շատ բարդ կլինի սովորել բանասիրական ֆակուլտետում: Կարծում եմ, որ այստեղ անելիք ունեն ծնողները, ովքեր պետք է օգնեն երեխաներին մասնագիտության ընտրության հարցում, այլ ոչ թե առաջնորդվեն այն հանգամանքով` երեխան սիրում է ռուսերեն»,- ընդգծեց առարկայական հանձնաժողովի նախագահը:
Լ. Բալասանյանն ասաց նաեւ, որ երկու դիմորդի պատասխան պարզապես հիացրել է իրեն: «Ինչպես պարզվեց, աղջիկները հեռավոր մարզերից էին: Նրանք փայլուն ուսուցիչներ են ունեցել ու քննությանն էլ հավուր պատշաճի են ներկայացել»:
Նշենք, որ դիմորդների մեծամասնությունը շփոթում էր նախադասության գլխավոր եւ երկրորդական անդամները, պարզունակ տարբերակով ներկայացնում գեղարվեստական գրականության նմուշները:

ՉԳԻՏԵՆ` Ո՞ՐՆ Է ԵՆԹԱԿԱՆ, Ո՞ՐՆ Է ՍՏՈՐՈԳՅԱԼԸ

Հայոց լեզվի եւ գրականության (բանավոր) քննության հանձնաժողովի նախագահ ԱՆՆԱ ԱԲԱՋՅԱՆՆ «Իրավունքին» հետեւյալ պատկերը ներկայացրեց. «Յուրաքանչյուր օր 5-6 հոգի անբավարար գնահատական է ստանում: Բարձր միավորներ ստացողների թիվը քիչ է: Այս օրերի ընթացքում ընդամենը մեկ դիմորդ է ստացել 20 միավոր: Դեռ վերջնական հաշվետվությունը պատրաստ չէ»:
Ա. Աբաջյանի խոսքով` կան մարդիկ, որոնք  ուղղակի դիմել են բանասիրության ֆակուլտետ, որ գան, ոչինչ չպատասխանեն, անբավարար գնահատական ստանան ու գնան ասեն, որ իրենց «կտրել» են քննությունից:  
Ի դեպ, քննասենյակում, ըստ Ա. Աբաջյանի, ամենաշատ աղմուկ բարձրացնողները քննությանն անպատրաստ եկածներն են, որոնք ցանկանում են, որ իրենց անպայման քննի հանձնաժողովի նախագահը:

«Հանդիպել եմ դիմորդների, որոնք բացառապես ոչինչ չգիտեն գրականությունից: Օրինակ` այսօր, հարցնում էինք, ո՞վ է Բակունցը, ի՞նչ է գրել նա, բայց պատասխան չկար: Մեկ ուրիշ դիմորդի էլ խնդրեցինք թվարկել արեւմտահայ հեղինակների` գաղափար չուներ: Դիմորդ կա` չի հասկանում` ենթական ո՞րն է, ստորոգյալը ո՞րն է: Բնականաբար, նման դիմորդը դրական միավոր ստանալ չի կարող»,- փաստում է հանձնաժողովի նախագահը` հավելելով, որ այս պատկերին զուգահեռ` լավ պատասխաններ էլ կան:

Խնդրեցինք զավեշտալի պատասխաններից որեւէ մեկը առանձնացնել. «Դիմորդին հարցրինք` որո՞նք են հայերենի ցուցական դերանունները եւ ինչ են ցույց տալիս, հետեւյալ պատասխանն ստացանք. «Ցուցական դերանունները ցույց են տալիս բայի սեռը»:
Ըստ Ա. Աբաջյանի` քննության միջին միավորը մոտավորապես տատանվում է 12-13-ի միջեւ. շատ են 8 միավոր ստացած դիմորդները: «Ութ միավոր ձգելով ենք նշանակել` զուտ նրա համար, որ թափուր տեղեր չմնան»,- ընդգծեց մեր զրուցակիցը:

ՎԼԱԴ ՄՈԻՐԱԴՅԱՆ