ՙԱՐԱՄ ՍԱԹՅԱՆ. ՙՀԱՅԵՐԵՆ ԲԱՌԵՐՈՎ ԵՐԳԵԼԸ ԴԵՌԵՎՍ ՀԱՅԿԱԿԱՆ ՉԷ՚

ԱՐԱՄ ՍԱԹՅԱՆ. ՙՀԱՅԵՐԵՆ ԲԱՌԵՐՈՎ ԵՐԳԵԼԸ ԴԵՌԵՎՍ ՀԱՅԿԱԿԱՆ ՉԷ՚

ՀՀ կոմպոզիտորների եւ երաժշտագետների միության նախագահ ԱՐԱՄ ՍԱԹՅԱՆԻ խոսքով` այսօր հայ  երաժշտական արվեստը ծանր վիճակում է, որովհետեւ հեռուստատեսությունը, որը մատաղ սերնդին դաստիարակող օղակներից մեկն է համարվում` ողողված է անհասկանալի եւ ոչ հայկական  երաժշտությամբ: Չկան բարձրորակ տեսաֆիլմեր, ձայնագրություններ երաժիշտների եւ երաժշտության մասին: Նման հաղորդումները հեռարձակվում են կեսգիշերն անց, այն էլ` ինչպես Ա. Սաթյանն է բնորոշում ՙով քնած է` արթուն կացեք՚ սկզբունքով:
Նա նկատում է, որ նախկինում հայի դաստիարակությունը այսպիսին չէր, ինչպիսին այսօր է, ինչպես դասական երաժշտությունը աստիճանաբար վերացվեց հեռուստաէկրանից, այնպես էլ վերանում է երգարվեստից: Այսօր իհարկե խոսվում է երգարվեստից, սակայն սա միայն կարծեցյալ, իրականում խոսվում է միայն երգերի մասին, իսկ երգարվեստից` ոչ:
ՙՇատերի համար հայ երաժշտարվեստի մեջ հայ հասկացողությունը անհասկանալի է, քանզի շատերին թվում է, որ հայերեն բառերով երգում է,  արդեն հայկական երգ է, ոչ` միայն հայերեն երգելով չէ: Կարծում եմ` այս ամենին շատ լուրջ անդրադարձ պետք է կատարվի, եւ մեր միությունը իր մասով քայլեր կատարում է՚,- տեղեկացրեց Ա. Սաթյանն ու մանրամասնելով ավելացրեց, որ Կոմպոզիտորների միությանը կից ստեղծվելու է խումբ, որտեղ կհրավիրվեն երգիչներ` ինչպես երիտասարդներ, այնպես էլ ավագ սերնդի ներկայացուցիչներ, ովքեր կշրջեն Հայաստանի ամբողջ տարածքով եւ հայ հանրությանը կներկայացնեն մաքուր հայկական երաժշտություն:
Կոմպոզիտորների միության նախագահը չի կիսում տարածված այն կարծիքը, թե ժամանակակից երաժշտությունը չի ընկալվում ժողովրդի կողմից, որի հետեւանքով էլ այն չի ներկայացվում հեռուստատեսությամբ: Գորիսում ու Կապանում մի շարք երիտասարդ կոմպոզիտորների տված համերգը այլ բան է վկայում` մարդիկ կոմպոզիտորներին ընդունել են խանդավառությամբ եւ մինչ օրս էլ այնտեղից նամակներ են հղում միությանը` համերգը կրկնելու խնդրանքով, կրկին հնչեցնելու այն ժամանակակից արվեստը, որը հեռուստատեսությամբ ու ռադիոյով չի հնչում: ՙՄենք ունենք զարգացման տարբեր ձեւեր եւ հնարավորություններ, անհրաժեշտ է իրականություն դարձնել այն ամենը, ինչ երկար տարիներ չի արվել` զարգացնել հայ երաժշտարվեստը եւ ներարկել ժողովրդի մեջ, իհարկե նաեւ արտահանել, առանց որի չենք կարող պատկերացնել մեր երաժշտական արվեստն  ընդհանուր համաշխարհային ոլորտում՚:

ԶՎԱՐԹ ԽԱՉԱՏՐՅԱՆ
Հ.Գ. Իսկ թե Ցեղասպանության ճանաչման եւ դատապարտման միջոցառումների ծրագրերը համակարգելու համար ստեղծված հանձնաժողովում ինչո±ւ ընդգրկված չէ ՀՀ կոմպոզիտորների եւ երաժշտագետների միության ոչ մի անդամ, եւ ինչ ծրագրեր է նախատեսում միությունը 100-րդ տարելիցին ընդառաջ, Արամ Սաթյանի հետ հարցազրույցն ամբողջությամբ կարդացե°ք վաղվա ՙԻրավունքի՚ ՙՀետաքննություն՚ հավելվածում: