600-800.000 ԱՇԽԱՏԱՏԵՂ`ԱՐԵՎԱՅԻՆ ԷՆԵՐԳԻԱՅԻ ԱՐՏԱԴՐՈՒԹՅԱՆ ՇՆՈՐՀԻՎ

600-800.000 ԱՇԽԱՏԱՏԵՂ`ԱՐԵՎԱՅԻՆ ԷՆԵՐԳԻԱՅԻ ԱՐՏԱԴՐՈՒԹՅԱՆ ՇՆՈՐՀԻՎ

Հունիսի 21-ին  Հելիոֆիկացիայի ծրագրի ղեկավար ՎԱՀԱՆ ՀԱՄԱԶԱՍՊՅԱՆԸ պետք է հանդիպեր ՀՀ վարչապետ Հովիկ Աբրահամյանի  հետ`  նրան ներկայացնելու  հելիոֆիկացիայի ծրագիրը համաձայն որի` արևի էներգիան կարելի է օգտագործել որպես այլընտրանքային էներգիայի աղբյուր: Հանդիպումը, սակայն,  ինչպես տեղեկացրեց «Իրավունքի» հետ զրույցում  վերը նշված ծրագրի ղեկավարը, չի կայացել: «Վարչապետն իմ առաջարկն ուղարկեց Էկոնոմիկայի նախարարության համապատասխան բաժին: Թեեւ հաջորդ հանդիպման համար   պայմանավորվածություն ձեռք չեմ բերել, բայց  մտադիր եմ կրկին հանդիպել  Հ. Աբրահամյանի հետ և նրան հրավիրել Աբովյան քաղաքում գործող  մեր «պոլիգոն` առաջարկս քննարկելու համար»,- մանրամասնեց Համազասպյանը:

-Պրն Համազասպյան,  Հելիոֆիկացիայի ծրագրի կիրառումն արդյոք հիմա է արդիական` հաշվի առնելով էլեկտրաէներգիայի թանկացումն ու  հանրության մի հատվածի դժգոհությունը:

-Մեզ համար  այս ծրագրի  կիրառումը կարևոր է այնքանով, որ Հայաստանը չունի այլընտրանքային էներգիայի աղբյուր` բացի հիդրոէներգետիկայից: Հելիոֆիկացիան պետք է զարգացնել և դնել  առաջին պլան:  Հայաստանը, չունենալով սեփական էներգառեսուրսներ, պետք է ապավինի արևի էներգիային: Իսկ Հայաստանն արևի էներգիայի պաշարներով լավ դիրքում է:

-Տնտեսության ո՞ր ճյուղերում կարելի է օգտագործել  Ձեր ծրագիրը:

-Գյուղատնտեսության ոլորտում` հատկապես վերամշակող արդյունաբերության մեջ:

- Ծրագրին քաջատեղյակները մի հակափաստարկ են մատնանշում` արևից ստացված էներգիան բավական թանկ է…

-Չէ, սխալվում են: Հակափաստարկ բերողները նկատի ունեն ֆոտովոլտային էլեմենտների ուղղությունը: Դա թանկ է, և մենք դրանից չենք օգտվում: Մենք արևի էներգիան ուղղակի օգտագործում ենք, որը շատ էժան է, անվտանգ, էկոլոգիապես մաքուր: Մարդիկ կան, որոնք, չգիտես ինչու, չեն ցանկանում, որ Հայաստանում զարգանա արևային տեխնիկան:

-Էժան ասելով`ինչքա՞ն նկատի ունեք: Կոնկրետ թիվ կասե՞ք:

-Մեկ կվտ ժամ ջերմային էներգիան արժե 0,32 դրամ:

-Կա՞ն գործարարներ Հայաստանում, որոնք հետաքրքրված են Ձեր ծրագրով:

-Մեր գործարարները մի քիչ ուրիշ են: Հետաքրքրված  կլինեն ցանկացած ծրագրով, եթե  այն եկամտաբեր լինի: Բայց եկամուտ ստանալուց առաջ պետք է փող ծախսել:

-Որքա՞ն ներդրում պետք  է արվի Ձեր ծրագիրը կյանքի կոչելու համար: Մյուս հակափաստարկը, ի դեպ,  սա է, որի մասին խոսում են Ձեր ընդդիմախոսները. մեծ գումարներ են անհրաժեշտ հելիոֆիկացիայի ծրագիրը կյանքի կոչելու համար:

-Ներդրում անել պետք չէ: Պետք է մեր կառավարությունը նորմատիվ ակտեր ընդունի,  հայտարարի, որ կողմ է արևի էներգիայի զարգացմանը և թույլ տա, որ մարդիկ աշխատեն:   Մենք գումար չենք ուզում, որ գումար ունենայինք, 4 դրամով հոսանքը չէին թանկացնի: Արևային տեխնիկայի արտադրության շնորհիվ կարող ենք  ունենալ 600-800.000 աշխատատեղ:

Ի դեպ, ասեմ, որ այսօր եղել եմ Իրանի դեսպանատանը: Ծրագիրն ուղարկեցի Իրան, որը հետաքրքրված է Հելիոֆիկացիայի ծրագրով, թեպետ նա ունի էներգետիկ մեծ ռեսուրսներ:  Հոսանքի թանկացման մասին խոսում են գրեթե բոլորը, բայց ոչ ոք անգամ ընդդիմադիրները չեն առաջարկում քննարկում կազմակերպել Հելիոֆիկացիայի ծրագրի  համար, որի կյանքի կոչելն այսօր մեր երկրի համար ուղղակի անհրաժեշտ է:

ՍՈՆԱ ԴԱՎԹՅԱՆ