«ՔՆՆՈՒԹՅՈՒՆՆԵՐԻ ԱՌԱՋԻՆ ՓՈՒԼՆ ԱՄՓՈՓՎԵՑ»

«ՔՆՆՈՒԹՅՈՒՆՆԵՐԻ ԱՌԱՋԻՆ ՓՈՒԼՆ ԱՄՓՈՓՎԵՑ»

Ընդունելության քննությունների թոհուբոհը, դեռ չի մոտեցել եզրագծին: Առայժմ ավարտվել է միայն միասնական քննությունների առաջին փուլը: Քննական պայքարը թեժ է, քննարկումները այս ամենի շուրջ` նույնպես:

Ոմանք դժգոհ են ցածր միավորներից, ոմանք`  քննական թեստերում առկա անորոշություններն են մատի փաթաթան սարքել, ոմանք էլ` ճիշտ հակառակը` գոհ են, քանի որ ցածր միավորներ հավաքելով էլ հնարավորություն ունեն ուսանողական նստարանին հայտնվելու: Ինչեւէ:
ԵՊՀ ընդունող հանձնաժողովի պատասխանատու քարտուղար ՎԱՉԱԳԱՆ ԳԱԼՍՏՅԱՆԸ «Իրավունքին» տեղեկացրեց, որ ս.թ. հունիսի 25-ին հանրապետությունում մեկնարկեց բարձրագույն հաստատություններ դիմում-հայտերի ընդունման երկրորդ փուլը` հավելելով, որ այն կտեւի մինչեւ ս.թ. հուլիսի 2-ը: Նշենք, որ երկրորդ փուլին կարող են մասնակցել բանակից զորացրվածները, քոլեջի շրջանավարտները, ինչպես նաեւ արտասահմանյան ուսումնական հաստատություններն ավարտող մեր հայրենակիցները:
Վ. Գալստյանի խոսքերով` Երեւանի պետական համալսարան, առաջին փուլի արդյունքում, դիմել է 3600 դիմորդ: «Անցյալ տարվա համեմատ, դիմորդների թիվը նվազել է մոտ 400-ով: Պատճառները տարբեր են: Դժվարանում եմ ասել, թե որն է հստակ պատճառը: Այս տարի հանրապետության բարձրագույն պետական եւ մասնավոր բուհեր դիմել է 12. 400 դիմորդ: Անցած տարի դիմորդների թիվը եղել է 14.800»: Դիտարկմանը, թե մտահոգվելու առիթ է տալիս ներկայացված ցուցանիշը մայր բուհի համար, Վ. Գալստյանը հետեւյալ կերպ արձագանքեց. «Բնականաբար: Մրցակցությունը բուհերի միջեւ գնալով թեժանում է: Սակայն ԵՊՀ-ն ամեն ինչ անում է, որ մրցակցությունից պատվով դուրս գա: Ավագ դպրոցների հետ ունենք համագործակցության պայմանագրեր,  որտեղ մեր դասախոսները հատուկ լրացուցիչ կրթական դասաժամեր ունեն, ճանաչողական այցերով աշակերտները ԵՊՀ-ի տարբեր ֆակուլտետներ են հրավիրվում, հանդիպում համալսարանի ղեկավարության, դասախոսական կազմի հետ: Մի խոսքով, մենք ամբողջ տարին պետք է աշխատենք, որպեսզի հավուր պատշաճի ընդունելություն ունենանք»:

«ԱՆԳԼԵՐԵՆԻ ԻՄԱՑՈՒԹՅՈՒՆԸ ՄԻՋԻՆ ՄԱԿԱՐԴԱԿԻ Է»

Հունիսի 25-ին դիմորդները հանձնեցին անգլերենի բանավոր քննությունը: «Իրավունքը» ներկա է գտնվել ԵՊՀ-ում տեղակայված քննակենտրոնում, զրուցել քննական հանձնաժողովի նախագահ ՍՎԵՏԼԱՆԱ ՄԱՐԳԱՐՅԱՆԻ հետ: Ըստ տիկին Մարգարյանի` դիմորդների պատրաստվածությունը եղել է միջին մակարդակի: Միջին միավորը 14-15-ն է եղել:

«Դիմորդը հնարավորություն ունի տեղում բարձրացնելու գնահատականը` մինչեւ 17 միավոր: Տրվում է երեք նախադասություն` թարգմանության համար: Եթե թարգմանությունն անսխալ է լինում, ապա միավորը բարձրանում է: Եթե կան սխալներ, իրավունք ունենք իջեցնել գնահատականը, բայց դա չենք անում` ի օգուտ դիմորդի: 17-ից բարձր գնահատականի համար զրուցում ենք, պարզում դիմորդի խոսակցական հմտությունները, ինչպես է կարողանում շարադրել մտքերը` բանավոր զրույցի ժամանակ»,- պարզաբանում է Ս. Մարգարյանը:

«ՎԱԼԵՐԻԱՆԱՅԻ ԹՈՒՐՄ ԵՆ ԽՄՈՒՄ ՈՒ ՇԱՐՈՒՆԱԿՈՒՄ ՔՆՆՈՒԹՅՈՒՆԸ»

ԵՊՀ տարածքում տեղակայված քննակենտրոնի հերթապահ թերապեւտ ԷԼՅԱ ՍԵԴՐԱԿՅԱՆՆ «Իրավունքին» տեղեկացրեց, որ անգլերենի (բանավոր) քննության ժամանակ որեւէ արտառոց դեպք չի գրանցվել: Հարցին, թե ինչ գանգատներով են բժշկուհուն դիմում դիմորդները, թերապեւտի պատասխանը հետեւյալն էր. «Բժշկին դիմելու հիմնական պատճառը` սթրեսն է, վախը քննությունից առաջ: Այն հեշտությամբ հաղթահարվում է. մի քանի կաթիլ վալերիանա, եւ լարվածությունն անցնում»:
Քննական օրերի ընթացքում բժշկուհուն դիմել են ջերմություն ունեցող մի քանի դիմորդ, որոնք դեղ են խմել ու շարունակել հանձնել քննությունը: Արձանագրվել է քթային արյունահոսությունների մի քանի դեպք, ինչպես նաեւ ստամոքսի խանգարումով մեկ դեպք:

Նշենք, որ քննակենտրոններում տեղադրված են մի քանի մոնիտոր, որոնց օգնությամբ ծնողները կարող են հետեւել դիմորդի գործողություններին: Լրագրողի հարցերին, սովորաբար, սպասումներով լի հոգատար հայրիկները, մայրիկները, պատահում է` գերդաստանի ներկայացուցիչները խուսափում են պատասխանել` առաջնորդվելով` առաջ Աստված արտահայտությամբ:

ՎԼԱԴ ՄՈՒՐԱԴՅԱՆ