ՌՈՒՍԵՐԵՆԻ ՔՆՆՈՒԹՅԱՆ ԱՐԴՅՈՒՆՔՆԵՐՆ ԱՅՆՔԱՆ ԷԼ ԳՈՀԱՑՈՒՑԻՉ ՉԵՆ (Տեսանյութ)

ՌՈՒՍԵՐԵՆԻ ՔՆՆՈՒԹՅԱՆ ԱՐԴՅՈՒՆՔՆԵՐՆ ԱՅՆՔԱՆ ԷԼ ԳՈՀԱՑՈՒՑԻՉ ՉԵՆ (Տեսանյութ)

Այսօր տեղի ունեցավ «Ռուսաց լեզու եւ գրականություն» (բանավոր) քննությունը:  «Իրավունքը» ներկա է գտնվել քննակենտրոնում, զրուցել առարկայական հանձնաժողովի նախագահ ԼԻԼԻԱ ԲԱԼԱՍԱՆՅԱՆԻ հետ: Ըստ նրա`դիմորդների պատրաստվածությունն ոչ այնքան պատշաճ էր: «Այսօր առաջին քննական օրն էր «Ռուսաց լեզու եւ գրականություն» (բանավոր) առարկայից: Պետք է ասեմ, որ դիմորդների պատասխաններն այնքան էլ գոհացուցիչ չեն: Երկու դիմորդի ստիպված եղանք անբավարար գնահատական նշանակել», - ցավով արձանագրում է տիկին Բալասանյանը`հավելելով, որ քննությանը ներկայացած դիմորդներն այդքան էլ հստակ  չեն պատկերացնում իրենց ապագան, ինչը մտորելու տեղիք է տալիս:  «Ինքս դասավանդում եմ մանկավարժական համալսարանում ու կարող եմ ասել, որ նման լեզվի իմացությամբ նրանց շատ բարդ կլինի սովորել բանասիրության ֆակուլտետում: Կարծում եմ, որ այստեղ անելիք ունեն ծնողները, ովքեր պետք է օգնեն երեխաներին մասնագիտության ընտրության հարցում, այլ ոչ առաջնորդվեն այն հանգամանքով`երեխան սիրում է ռուսերենը»,- ընդգծեց առարկայական հանձնաժողովի նախագահը:

Լ. Բալասանյանն ասաց նաեւ, որ երկու դիմորդ պարզապես հիացրել են իրեն: «Ինչպես պարզվեց, աղջիկները հեռավոր մարզերից էին: Նրանք փայլուն ուսուցիչներ են ունեցել ու քննությանն էլ հավուր պատշաճի էին ներկայացել»:

Նշենք, որ դիմորդների մեծամասնությունը դժվարությամբ էին արտաբերում բառերը, շփոթում նախադասության գլխավոր եւ երկրորդական անդամները, պարզունակ տարբերակով ներկայացնում գեղարվեստական գրականության նմուշները:

Նյութը, տեսանյութը`Վ. ՄՈԻՐԱԴՅԱՆԻ