ՙՎԱՐԴԱՆ ՂՈՒԿԱՍՅԱՆԸ ՍԱՄՎԵԼ ԲԱԼԱՍԱՆՅԱՆԻ ՄԱՍԻՆ. ՙԵՍ ԴՐԱ ՄԱԿԱՐԴԱԿԻՆ ՉԵՄ ԻՋՆԵԼՈՒ՚

ՎԱՐԴԱՆ ՂՈՒԿԱՍՅԱՆԸ ՍԱՄՎԵԼ ԲԱԼԱՍԱՆՅԱՆԻ ՄԱՍԻՆ. ՙԵՍ ԴՐԱ ՄԱԿԱՐԴԱԿԻՆ ՉԵՄ ԻՋՆԵԼՈՒ՚

Ինչպես հայտնի է, ՀՀ ոստիկանության պետական պահպանության գլխավոր վարչությունը դատի է տվել Գյումրու քաղաքապետարանին` պահանջելով վճարել Գյումրու նախկին քաղաքապետ Վարդան Ղուկասյանի անձի, ինչպես նաեւ նրա տան պետական պահպանության մեկ ամսվա վճարը` 850 հազար դրամ: Վարդան Ղուկասյանը ոստիկանության հետ պայմանագիր էր կնքել իր անձի դեմ մահափորձ կատարելուց հետո` 2009 թվականի փետրվարի 10-ից, եւ ոստիկանները 3 տարի շարունակ ծառայություն են մատուցել նախորդ քաղաքագլխին, իսկ  գումարը` ամսական 850 հազար դրամ, Գյումրու ավագանու որոշմամբ, փոխանցվել է համայնքային բյուջեից: Գյումրիում կատարված իշխանափոխությունից հետո Սամվել Բալասանյանը հրաժարվել էր Վարդան Ղուկասյանի անձի անվտանգության պահպանության նպատակով 850 հազար դրամ փոխանցել ոստիկանությանը, որի պատճառով էլ այս կառույցը դատի է տվել քաղաքապետարանին:
Նախօրեին Շիրակի մարզի ընդհանուր իրավասության դատարանում նշանակված էր դատական նիստը, նախնական նիստ արդեն իսկ տեղի է ունեցել, սակայն ո°չ հայցվոր կողմը` ոստիկանության ներկայացուցիչը, ո°չ էլ պատասխանողը` քաղաքապետարանի իրավաբանը, չեն ներկայացել: Նշենք, որ այս դատավարությունը երկու քաղաքապետերի միջեւ սկիզբ առած նոր կոնֆլիկտի մի մասն է. Սամվել Բալասանյանը իր հերթին դիմել է ոստիկանություն` պահանջելով քրեական գործ հարուցել Վարդան Ղուկասյանի նկատմամբ` համայնքային բյուջեի միջոցները ոչ տեղին օգտագործելու, վատնելու համար: Ոստիկանությունը մերժել է քրեական գործի հարուցումը` հանցակազմ չլինելու պատճառաբանությամբ, որն էլ դրդել է Սամվել Բալասանյանին` դատի տալ ոստիկանությանը: Մի քանի օր առաջ Շիրակի մարզի ընդհանուր իրավասության դատարանը մերժել է ներկա քաղաքապետի բողոքը` ոստիկանության դեմ:
Վերոնշյալի հետ կապված` փորձեցինք զրուցել Գյումրու քաղաքապետ Սամվել Բալասանյանի հետ, ով, սակայն, սովորույթին անդավաճան մնալով, ՙԲարեւ Ձեզ՚-ից հետո ընտրեց ՙալո..., ալո..., ալո...՚ տարբերակը, ուրիշ ոչինչ: Բնականաբար, խոսափողը դրեց այն պահին, երբ տեղեկացավ, որ լրատվամիջոցից են: Այնուհետեւ հեռախոսազանգերին այլեւս չպատասխանեց, ըստ երեւույթին, կռահելով, թե ինչ հարցով ենք զանգահարել:
Մենք փորձեցինք զրուցել նաեւ Գյումրու նախկին քաղաքապետ Վարդան Ղուկասյանի հետ, ով, ի տարբերություն պարոն Բալասանյանի, շատ բարեհամբույր կերպով համաձայնեց պատասխանել մեր բոլոր հարցերին, սակայն լսելով Բալասանյանի անունը, պարոն Ղուկասյանը, հարցին հարցով պատասխանեց.
- Սամվել Բալասանյանն ով է:
- Գյումրու ներկայիս քաղաքապետը:
- Ձեզ ով է ասել, որ էդպիսի քաղաքապետ կա այստեղ: Սա հերթական իր բանսարկու գործելաոճն է, դա է իր ապրած կյանքը: Ես դրա մակարդակին չեմ իջնելու, դա իրենից ինչ է ներկայացնում` եղած-չեղած մի հաշիվ է: Ես դրան ինչ պատասխանեմ, գյումրեցիները իր ազգանունը փոխել եւ այլ անուն են դրել, ես ինչ ասեմ: Եկեղեցի եմ կառուցել, վատ բան չեմ արել, բայց էլի որոշ մարդիկ ուզում են կրկին տարբեր լրատվամիջոցներով թեմա գտնեն, որ վարկաբեկեն ինձ, դա է, ուրիշ բան չկա:
Հարցին, թե ինչն պատճառը, որ Բալասանյանը ներկա չէր նաեւ եկեղեցու խաչի օծմանը, պարոն Ղուկասյանը հավելեց.
- Խնդրում եմ, դրա անունը էլ չտաք, ես եկեղեցի եմ կառուցում ու շարունակելու եմ, ինչպես մինչ օրս, այդպես էլ ծառայել իմ ժողովրդին:

ԻԼՈՆԱ ԱԶԱՐՅԱՆ