ՙԻՍԿ ԵՍ ԿԱՍԿԱԾԵԼԻ ԵՄ ՀԱՄԱՐՈՒՄ ՙԱՐՄԵՆԹԵԼԻ՚ ՎԱՃԱՌՔԸ, ՈՐԸ ՏԵՂԻ ՈՒՆԵՑԱՎ ՀՀ 2-ՐԴ ՆԱԽԱԳԱՀԻ ՕՐՈՔ՚

ՙԻՍԿ ԵՍ ԿԱՍԿԱԾԵԼԻ ԵՄ ՀԱՄԱՐՈՒՄ ՙԱՐՄԵՆԹԵԼԻ՚ ՎԱՃԱՌՔԸ, ՈՐԸ ՏԵՂԻ ՈՒՆԵՑԱՎ ՀՀ 2-ՐԴ ՆԱԽԱԳԱՀԻ ՕՐՈՔ՚

ՀՀ երկրորդ նախագահ Ռոբերտ Քոչարյանի հարցազրույցն ու ՙքառյակ՚-Քոչարյան  հնարավոր համագործակցությունը շարունակվում է  բուռն քննարկվել հասարակական-քաղաքական դաշտում: ՙԻրավունքի՚ թղթակիցը այս եւ ներքաղաքական այլ հարցերի  մասին զրուցեց Մարդու իրավունքների առաջին պաշտպան ԼԱՐԻՍԱ ԱԼԱՎԵՐԴՅԱՆԻ  հետ:
-Տիկին Ալավերդյան, ՙքառյակի՚ գործողությունները  ոչ բոլորի համար են հասկանալի` մասնավորապես օրեր առաջ Ձեր գործընկեր, ՙԺառանգության՚ անդամ  Ստեփան Սաֆարյանը  կասկած էր հայտնել ՙքառյակ՚ ու Քոչարյան հավանական համագործակցության մասին: Համամի±տ եք այդ տեսակետի  հետ:
- Ես չեմ հետեւում ՙքառյակի՚ գործողություններին: Մի բան կարող եմ ասել, որ ՙքառյակին՚` որպես միասնական ուժ, չի կարելի դիտարկել, քանի որ կան տարբեր մոտեցումներ եւ գաղափարներ:  Եթե չորս ուժերը կարողանան գտնել այն միակ գործոնը, որի շուրջ իրենք կարող են միավորվել ճիշտ պահի, ճիշտ ժամանակ, դա կարող է դառնալ որոշիչ:
- ՙՔառյակի՚ քայլերի  ու գործողությունների վերաբերյալ  լռում է ՙԺառանգության՚ ղեկավար Րաֆֆի Հովհաննիսյանը: Ինչո±վ եք դա բացատրում:
- Թույլ տվեք այդ հարցերին չպատախանել, քանի որ կուսակցության հետ ես գրեթե կապ չունեմ: Կուսակցության  անդամների դերերի բաժանման  մի մեխանիզմ է գուցե, որ սկզբից  ուզում են հասկանալ` կուսակցության քարտուղարի ասածն ինչ արձագանք կստանա, իսկ  հետո  կխոսի կուսակցության նախագահը:
- Նախկին  նախագահ Ռոբերտ Քոչարյանն իր վերջին հարցազրույցում  կասկածելի համարեց Որոտան հէկ-ի վաճառքը…
- Իսկ ես կասկածելի եմ համարում ՙԱրմենթելի՚ վաճառքը, որը տեղի է ունեցել երկրորդ նախագահի ժամանակ: Ես չգիտեմ, թե որտեղից է այդ էնտուզիազմը: Մենք իր ժամանակ ասել ենք` օլիգարխիայի արմատները գցվել են Լեւոն Տեր- Պետրոսյանի ժամանակ, իսկ իր ղեկավարման տարիներին դրանք դարձան անշրջելի: Օլիգարխիկ-մոնոպոլիստական համակարգը ժառանգություն ստացանք երկրորդ նախագահից:  
- Նախկին նախագահի այս ակտիվությունն ինչո±վ է պայմանավորված:
- Որպես նախկին պաշտոնյա` նա իր պարտքն է համարում քննադատել այս իշխանություններին: Երկրորդ նախագահը երիտասարդ է, եւ ով է ասել, որ  նրա առջեւ փակված են ճանապարհները: Բացի այդ` մեր ժողովուրդն է դյուրահավատ. նրան այնքան հույսեր է ներշնչում ցանկացած նախկին նախագահ, որ նա կմոռանա ամեն վատը, որ եղել է նրա օրոք:  Բայց ես ժողովրդին չեմ մեղադրում:
- Քոչարյան-ՙքառյակ՚ համագործակցությունը հավանական  համարո±ւմ եք: Եթե այո, դա ինչ կտա մեր հանրությանը:
- Հայաստանում ամեն ինչ հնարավոր է: Բայց  ես հիմնավոր կասկածներ ունեմ, որ այդ համագործակցությունը դրական կլինի մեր  հանրության համար:
- Հավանաբար, հունիսի վերջին տեղի կունենա ՙԺառանգություն՚ կուսակցության համագումարը: Չեն բացառվում փոփոխություններ կուսակցության կազմում` նոր մարդիկ կհամալրեն կուսակցության շարքերը, շատերն էլ լքեն այն: Հնարավո±ր է կուսակցության շարքերը համալրողներից մեկը լինեք նաեւ Դուք:
- Ես անկուսակցական եմ` երդվյալ, դեռեւս  ԽՍՀՄ տարիներից…
- Կուսակցությունում ընդգրկվելու առաջարկ չե±ք ստացել:
- Ոչ, չի արվել եւ չի արվելու: Բոլորը գիտեն` իմ հասարակական կեցվածքն ինձ համար թանկ է: Ես  հասարակական իմ կեցվածքով ավելի շատ եմ օգուտ բերում, քան եթե լինեմ որեւէ կուսակցության անդամ:
- Միգուցե, այնուամենայնիվ, նեղացած եք, որ   խորհրդարանական ընտրությունների ժամանակ Ձեզ չընդգրկեցին ՙԺառանգության՚  ցուցակում:
- Ես չունեմ այն օրգանը, որով նեղանում են: Ես այն ժամանակ էլ եմ ասել` վրդովված էի նրանից, որ ցուցակի առաջին համարներում չեն ընդգրկվել Ստեփան  Սաֆարյանն ու Արմեն Մարտիրոսյանը: Ես միշտ գիտեմ, որ պահանջված եմ, կանգնած  եմ մեր սարերի նման: Ես  ասել եմ` կուսակցության  մարտավարության հետ  համաձայն չեմ, ես այստեղ ինձ չեմ գտնում:

ՍՈՆԱ ԴԱՎԹՅԱՆ