Ուղիղ կապ Սերգո Երիցյանի հետ. «ՄԵՐ ՔԱՂԱՔԸ ՊԵՏՔ Է ԼԻՆԻ ՀԱՅԵՑԻ, ՀԱՅԱՏԱՌ ՈՒ ՀԱՅԱՀՈՒՆՉ»

Ուղիղ կապ Սերգո Երիցյանի հետ. «ՄԵՐ ՔԱՂԱՔԸ ՊԵՏՔ Է ԼԻՆԻ ՀԱՅԵՑԻ,  ՀԱՅԱՏԱՌ ՈՒ ՀԱՅԱՀՈՒՆՉ»

Այսօր «Իրավունքի» «Ուղիղ կապ» խորագրի հյուրն էր Լեզվի պետական տեսչության պետ ՍԵՐԳՈ ԵՐԻՑՅԱՆՆ, ով մեկ ժամ «ուղիղ հեռախոսակապ» ձեւաչափով պատասխանեց թերթի ընթերցողների եւ ակտիվ հասարակության հեռախոսազանգերին` տալով մի շարք հուզող հարցերի պատասխաններ: Մեր ընթերցողների հարցերի մի հատվածը ներկայացնում ենք ստորեւ.

- Երկու կամ երեք հազար տարի հետո, եթե պեղումներ անցկացվեն Երեւանում, մի՞թե չեն կարծի, թե հայը այստեղ եղել է փոքրմասնություն, քանի որ ողջ քաղաքը լի է օտարալեզու ցուցանակներով ու վահանակներով (ք. Երեւան Նարեկ):

- Եթե մի 3-4 տարի առաջ այս հարցը տայիք ես Ձեր կարծիքը կարող էի կիսել, որովհետեւ այս առումով բավականին տխուր վիճակ ունեինք: Բայց, բարեբախտաբար, պետք է նկատել, որ վերջին երեք տարիների ընթացքում այս առումով իրավիճակը բավականին փոխվել է, այդ թվում նաեւ տնտեսվարող սուբյեկտների հոգեբանությունը: Չնայած դրան, շատերը այսօր էլ մնում են օտարամոլ: Այսինքն` չգիտես ինչու, ձգտում են միայն օտարահունչ, օտարանուն ցուցանակներ եւ գովազդային վահանակներ տեղադրել` մտածելով, որ իրենց բիզնեսի փրկությունը հենց դրանց միջոցով է լինելու, բայց չարաչար սխալվում են: Այնպես որ, կարծում եմ` բոլորս պետք է պայքարենք դրա դեմ ու ոչ միայն լեզվի պետական տեսչությունը:

- Բայց այս ուղղությամբ առաջընթաց տեսնո՞ւմ եք:

-Բավականին, եթե կենտրոնական փողոցներից դուրս գաք, կտեսնեք , որ օտարալեզու ցուցանակների կողքին միեւնույն ցուցանակը կա նաեւ հայերենով, որը զուգակցել են: Չնայած այսօր էլ խախտումներ կան եւ մենք շարունակում ենք այդ խախտումների դեմ պայքարել:

- Ի վերջո, ինչպե՞ս քաղաքն ազատագրել այդ օտարալեզու ցուցանակներից ու գովազդային վահանակներից:

- Մեր օրենքը շատ լիբերալ-ազատական է: Այն  չի ասում, թե օտար լեզվով ցուցանակներ ու գովազդային վահանակներ չեք կարող ունենալ: Ընդհակառակը, ասում է ունեցեք հայերենով , բայց զուգակցեք այն ցանկացած լեզվով: Այսինքն` մենք այստեղ որեւէ խնդիր չունենք, դրա համար, երբ բացատրում ենք այս ամենը տնտեսվարող սուբյեկտներին, նրանք կարծես ավելի լավ են հասկանում, ավելի լավ են ընկալում: Այնուամենայնիվ, հասկանում եմ Ձեր մտահոգությունը, իսկապես մենք այստեղ անելիք ունենք եւ մեր քաղաքը պետք է լինի հայեցի, հայատառ ու հայահունչ:

ՀՐԱՆՏ ՍԱՐԱՖՅԱՆ

Հ.Գ. - Պարոն Երիցյանին ուղղված բոլոր հարցերի պատասխանները կարդացե՛ք տպագիր «Իրավունքի» առաջիկա համարում: