ԱՐԴԱՐԱԴԱՏՈՒԹՅԱՆ ՆԱԽԱՐԱՐԻ «ԴԻՍԵՐՏԱՑԻԱՆ» ԱՂԱՆԴՆԵՐԻ ՄԱՍԻՆ

ԱՐԴԱՐԱԴԱՏՈՒԹՅԱՆ ՆԱԽԱՐԱՐԻ «ԴԻՍԵՐՏԱՑԻԱՆ» ԱՂԱՆԴՆԵՐԻ ՄԱՍԻՆ

Հայաստանում գրանցված  կրոնական կառույցների քայքայիչ գործունեության մասին  «Իրավունքը» բազմիցս է խոսել: Ավելին` խնդրով  մտահոգ անհատները, մասնավորապես` «Միացյալ երիտասարդական լիգա» ՀԿ-ն ամիսներ առաջ հայտարարել էր, որ շատ աղանդավորներ աշխատում են արդարադատության նախարարությունում ու քաղաքացիական ակտերի գրանցման գործակալությունում:

Զարմանալի է, սակայն արդարադատության արդեն նախկին փոխնախարար Արամ Օրբելյանը ի պատասխան լրատվամիջոցներից մեկի այն հարցադրմանը, թե փոխնախարարը արդյոք պարզելո՞ւ է` որքանով է հայտարարությունը համապատասխանում իրականությանը, անմիջապես հիշել էր կրոնի ազատության մասին դրույթը և ասել, որ չի պատրաստվում պարզել իր աշխատակիցների կրոնական պատկանելիությունը:

Արամ Օրբելյանն այլևս արդարադատության փոխնախարար չէ, սակայն  քայքայիչ գործունեություն ծավալող կրոնական կառույցների խնդիրը շարունակում է արդիական մնալ: «Իրավունքի» թղթակիցը Արդարադատության նախարար Հովհաննես Մանուկյանից  փորձեց պարզել` մինչ կրոնական կառույցներին գրանցելը   հնարավոր չէ՞ պարզել` ինչ գործունեություն են ծավալում  նրանք: Նախարարն ասաց, որ դա  մի ամբողջ դիսերտացիայի հարց է, որին ինքը մի նախադասությամբ չի կարող ասել:

«Դե  մի քանի նախադասությամբ ասեք»,- հակադարձեց «Իրավունքի» թղթակիցը:

«Չէ, հետո»,- պատասխանեց  Մանուկյանն ու արագ հեռացավ մեկ այլ պաշտոնական հանդիպման:

Ի դեպ, ՀՈՎՀԱՆՆԵՍ ՄԱՆՈՒԿՅԱՆԸ լրագրողների հետ զրույցում անդրադարձավ Սպորտի և երիտասարդության նախկին նախարար Յուրի Վարդանյանի` Վրաստանում ՀՀ դեսպան նշանակվելու փաստին`արտառոց ոչինչ չտեսնելով դրա մեջ: «Սպորտսմենն էլ կարող է դիվանագետ լինել, գրողն էլ, տնտեսագետն էլ»,-վստահ է նախարարը, ով ժամանակին  զբաղեցնում էր Վրաստանում ՀՀ դեսպանի պաշտոնը և երևի թե կարոտախտով է հիշում այդ տարիները:

ՍՈՆԱ ԴԱՎԹՅԱՆ