Հայ-ռուսական բարեկամական խորհրդարանական ակումբի մասին, և ոչ միայն...

Հարցազրույց Հայաստանի և Ռուսաստանի բարեկամության խորհրդարանական ակումբի ղեկավար Արգինե Թումանյանի հետ:

- Խնդրում եմ մի քանի խոսքով ներկայացնեք ակումբի ստեղծման պատմությունը:

- Հայաստանի և Ռուսաստանի բարեկամության խորհրդարանական ակումբը ստեղծվել է 2013 թ. դեկտեմբերի 3-ին ԱՊՀ երկրների երիտասարդական միության նախաձեռնությամբ ՝ ՀՀ ԱԺ համատեղ: Ակումբի շրջանակներում գործում են Ռուսական գրքի գրադարանը և ռուսաց լեզվի անվճառ դասընթացները: Հայաստանի և Ռուսաստանի բարեկամության խորհրդարանական ակումբը կապում է հայ և ռուս պատգամավորներին, ակումբի և ԱԺ աշխատակազմի ներկայացուցիչներին, փորձում է սերտացնել իր գործունեությամբ հայ և ռուս մշակութային հարաբերությունները:

- Կարո՞ղ եք մի փոքր մանրամասնել ռուսաց լեզվի անվճառ դասընթացների դերն ու գործելակերպը:

- Դասընթացները արդեն թևակոխել են երկրորդ փուլ: Սովորաբար ամեն մի փուլ տևում է երեք ամիս, որի ավարտին մասնակիցներին տրվում է համապատասխան վկայական՝ դասընթացները ավարտելու մասին: Արդեն ունենք բավականի շատ ցանկացողներ՝ երրորդ փուլին մասնակցելու համար՝  այն մեկնարկելու է սեպտեմբերին:

- Ակումբը ունի հիանալի գրադարան: Խնդրում եմ, մի քանի խոսք նաև ռուս գրականության գրադարանի մասին:

- Սիրով: Ռուս գրականության գրադարանը ունի հարուստ հավաքածու, ուր ներկայացված են բոլոր ռուս դասականները, ժամանակակից ռուս գրականության անվանի ներկայացուցիչները, տարբեր բառարաններ, հանրագիտարաններ, տեղեկատվական հրատարակություններ և այլն: Գրադարանը պարբերաբար հարստացվում է ԱՊՀ երկրների երիտասարդական միության խողովակներով Ռուսաստանից ստացվող գրականությանբ՝ պատմությանը, մշակույթին, արվեստին, գիտությանը վերաբերող գրքերով:

- Ի՞նչ միջոցառումները է կազմակերպել ակումբը վերջերս:

- Ակումբի գոյատևման ընթացքում կազմակերպվել է վեց նիստ: Մի քանի օր առաջ անցկացվեց «Եվրասիական տնտեսական միություն. առավելություններ և հեռանկարներ» թեմայով, որը առաջացրել էր մեծ հետաքրքրություն հայ և Մոսկվայից ժամանած ռուս պատգամավորների շրջանում: Հունիսի 27-ին կայանալու է կլոր սեղան «Ռուսաստանը և համաշխարհային մշակույթը. եվրասիության խնդիրները» թեմայով՝ իմ ղեկավարությամբ, որին իրենց մտքերը կփոխանակեն ռուսաց լեզվի անվճար  դասընթացների մասնակիցներն ու դասախոսները:

- Խնդրում եմ տեղեկացնեք ակումբի հետագա պլանների մասին:

- Հայաստանի և Ռուսաստանի բարեկամության խորհրդարանական ակումբը բավականի շոշափելի աշխատանք է կատարել և մտադիր է կատարել, մասնավորապես կկազմակերպվեն նոր գրքերի շնորհանդեսներ, հանդիպումներ հայ և ռուս պատգամավորների հետ, «կլոր սեղաններ» նրանց մասնակցությամբ: Ի դեպ ավելացնեմ, որ ակումբը՝ իր հարուստ գրադարանով և դասընթացներով մեծ հաջողություն ունի և հայ պատգամավորների շրջանում, և ԱԺ աշխատողների մոտ: Շատերն են օգտվում մեր գրադարանի գրքերից: Լինում են նաև գրքերի նվիրատվություններ, օրինակ վերջերս ստացվել է ՌԴ Պետդումայի պատգամավորների մեկի բանաստեղծությունների ժողովածուն... Մի խոսքով, անելիքները և սպասելիքները շատ են...

ՌՈԲԵՐՏ ԲԱՂԴԱՍԱՐՅԱ