Ա. ԻՇԽԱՆՅԱՆ. «ՈՍՏԻԿԱՆՈՒԹՅՈՒՆՈՒՄ ԾԵԾ ՈՒ ՋԱՐԴԸ ՇԱՐՈՒՆԱԿՎՈՒՄ Է»

Ա. ԻՇԽԱՆՅԱՆ. «ՈՍՏԻԿԱՆՈՒԹՅՈՒՆՈՒՄ ԾԵԾ ՈՒ ՋԱՐԴԸ ՇԱՐՈՒՆԱԿՎՈՒՄ Է»

Հունիսի 26-ը Խոշտանգումների զոհերի աջակցության միջազգային օրն է: Հայաստանը 1993-ին միացել է ՄԱԿ-ի խոշտանգումների կանխարգելման կոնվենցիային, իսկ ավելի ուշ`2002-ին, Եվրոպայի խորհրդի կողմից ընդունված խոշտանգումների արգելքի կոնվեցիային: Չնայած սրան, Հայաստանում դեռ բավարար մակարդակով չեն պայքարում խոշտանգումների դեմ: Հայաստանում Հելսինկյան կոմիտեի նախագահ ԱՎԵՏԻՔ ԻՇԽԱՆՅԱՆԸ վստահեցնում է` նախ Հայաստանը թերանում է օրենսդրական առումով. «ՀՀ Քրեական օրենսգրքում մինչ այժմ չի ամրագրվել  հետևյալ դրույթը` այն է`խոշտանգում նշանակում է անձին հասցված մտավոր և մարմնական ցավ պետության կողմից»:

Երկու ոլորտներում, ըստ Իշխանյանի,  պատկերն առանձնապես տխուր է: Խոսքը վերաբերում է  ոստիկանությանը և քրեակատարողական հիմնարկներին: «Մեր ուսումնասիրությունները ցույց են տվել, որ  նախաքննության մեջ գտնվող 80 հոգու մեծ մասը, եթե ոչ գրեթե բոլորը ոստիկանության բաժանմունքներում ենթարկվել են ծեծ ու ջարդի: Որպես կանոն  խոշտանգվածների մեծ մասը փաստաբան չի ունեցել»,- ասաց  ԻՇԽԱՆՅԱՆԸ:

Մյուս կարևոր խնդիրը, որը շաղկապված է  նախորդի հետ, այն է, որ խոշտանգող անձանց բացահայտելու ուղղությամբ քայլեր չեն կատարվում, մասնավորապես`եթե հարուցվում է քրեական գործ, ապա այն որոշ ժամանակ անց կարճվում է: «Մեր քաղաքացիները չեն հավատում, որ իրավական ճանապարհով կարելի է հասնել հաջողության և պատասխանատվության ենթարկել խոշտանգողներին: Այս պահին ընդամենը 10 գործ կա խոշտանգումների գործով, որոնցով զբաղվում են մեր փաստաբանները: Ընդհանուր առմամբ քաղաքացիներն իրավական ճանապարհով չեն փորձում հարցը լուծել»,- մանրամասնեց  Հելսինկյան կոմիտեի նախագահը:

Իշխանյանը բարձրաձայնեց ևս մեկ կարևոր հարց, եթե  քաղաքացին  հաղորդում է ներկայացնում  իրեն խոշտանգելու մասին, սակայն այն չի կարողանում ապացուցել, ապա տվյալ անձի դեմ հարուցվում  է  քրեական գործ` սուտ մատնության հոդվածով. «Ես դա  վտանգավոր միտում եմ համարում»:

Քրեակատարողական հիմնարկներում ևս նույն վիճակն է` կա կոռուպցիա, ծեծ ու ջարդ, բայց բողոք չկա` պայմանավորված  ՔԿՀ-ում տիրող  ներքին վիճակով:

ՍՈՆԱ ԴԱՎԹՅԱՆ