ԻՆՉՆ Է ՄԱԳՆՈՒՍ ԿԱՐԼՍԵՆԻՆ ՏՊԱՎՈՐԵԼ ՀԱՅԱՍՏԱՆՈՒՄ

ԻՆՉՆ Է ՄԱԳՆՈՒՍ ԿԱՐԼՍԵՆԻՆ ՏՊԱՎՈՐԵԼ ՀԱՅԱՍՏԱՆՈՒՄ

Մարզական աշխարհում համեմատական դադար է, սակայն շախմատային անցուդարձը դարձյալ ակտիվ է: ՖԻԴԵ-ի առաջին եւ երկրորդ համարներ Մագնուս Կարլսեն-Լեւոն Արոնյան գրոսմայստերական զույգի մասին մարզաձեւի սիրահարները լսում են անգամ, երբ նրանց միավորողը խաղատախտակը չէ: Շախմատի աշխարհի չեմպիոն, նորվեգացի Մագնուս Կարլսենը մինչ օգոստոսին կայանալիք համաշխարհային օլիմպիադային նախապատրաստվելը, հանգստի մի քանի օր անցկացնելու համար հունիսի 22-ին ժամանել է Հայաստան, եւ նրան դիմավորել է Լեւոն Արոնյանը:
Արդեն հունիսի 23-ին շախմատիստները ուղղաթիռով մեկնել էին Տաթեւի վանք: Ինչից հետո Լեւոն Արոնյանը ֆեյսբուքյան իր էջում տեղադրել էր տաթեւյան մի քանի լուսանկար` դրանք վերնագրելով այսպես. ՙԴիտարժան տեսարաններ, կանաչ լանդշաֆտներ եւ անիրական գանձ. երեք եկեղեցի մեկում՚:

Լրագրողների հետ կայացած հանդիպման ժամանակ Մագնուս Կարլսենը եւս անդրադարձել է Տաթեւի վանք կատարած այցին. ՙՏաթեւը շատ գեղեցիկ վայր էր: Այն ինձ հիշեցրեց իմ հայրենիքը: Ես շատ բան չեմ տեսել Հայաստանում, որպեսզի կարծիքս հայտնեմ Հայաստանի մասին: Ես շատ տպավորված եմ այս երկրում շախմատի հանդեպ վերաբերմունքից՚:
Իսկ երեկ Մագնուս Կարլսենին եւ Լեւոն Արոնյանին ընդունեց ՀՀ նախագահ, Հայաստանի շախմատի ֆեդերացիայի նախագահ Սերժ Սարգսյանը:
Նշենք, որ Կարլսենը Հայաստան է ժամանել ՙՀայաստանի զարգացման նախաձեռնություններ՚ հիմնադրամի եւ ՙԱկրոնիս՚ ընկերության հրավերով: Նախագահ Սերժ Սարգսյանի հետ հանդիպման ժամանակ անդրադարձ է եղել Հայաստանի գիտական, կրթական ներուժին, շախմատի եւ ՏՏ ոլորտի զարգացման ուղղությամբ մեր երկրում իրականացված աշխատանքներին ու զարգացման հեռանկարային ծրագրերին: Հանդիպման ժամանակ ՀՀ նախագահը նշել է. ՙՈւրախ եմ, որ այստեղ է նաեւ Լեւոն Արոնյանը: Նա մեր ժողովրդի պարծանքն է, եւ կարծում եմª շախմատում Մագնուսի ամենաուժեղ հակառակորդը: Մենք, անշուշտ, մեծ հույսեր ենք կապում Լեւոնի հետ, եւ առաջին հերթին նաեւ նրա շնորհիվ է, որ մեր փոքրիկ երկրից ընտրված թիմը երեք անգամ դարձել է շախմատային օլիմպիադաների եռակի չեմպիոն՚: Ինչին հետեւել է Կարլսենի պատասխանը. ՙԱյս մի քանի օրվա ընթացքում, ինչ ես այստեղ եմ` Հայաստանում, տեսա այն սերը եւ խանդավառությունը, որ հայ ժողովուրդը տածում է շախմատի հանդեպ: Կարծում եմ, որ Հայաստանն այսպիսի մոտեցմամբ եւ, հատկապես` շախմատը դպրոցական ծրագրի մաս դարձնելով, հրաշալի օրինակ է ծառայում ամբողջ աշխարհին: Դա շատ մեծ քայլ է՚:
Անդրադառնալով մեր մյուս շախմատիստների ելույթներին` նշենք, որ գրոսմայստեր Հրանտ Մելքումյանը հիանալի է հանդես եկել Չեխիայի Տեպլիցե քաղաքում ավարտված շախմատային մրցաշարում: Մելքումյանը 9 հնարավորից վաստակել է 8 միավորª դառնալով մրցաշարի հաղթող: Հովհաննես Գաբուզյանը Բուլղարիայի Վառնա քաղաքում անցկացվող մրցաշարում չորրորդ տուրից հետո վաստակել է 4 միավոր եւ միանձնյա գլխավորում է աղյուսակը: Իսկ շախմատի կանանց Հայաստանի հավաքականի առաջին համար Էլինա Դանիելյանը, որն այս օրերին մասնակցում է Վրաստանում ընթացող ՖԻԴԵ-ի կանանց Գրան պրի մրցաշարին,  չորրորդ տուրում սպիտակներով հաղթել է սլովենացի Անա Մուզիչուկին, Դանիելյանն իր ակտիվում ունի 2 միավոր եւ զբաղեցնում է 7-րդ հորիզոնականը:

ՔՐԻՍՏԻՆԵ ՊԵՏՐՈՍՅԱՆ