ՙՌԱԶՄԱՀԱՅՐԵՆԱՍԻՐԱԿԱՆ ՊՈՐՏԱՊԱՐ ԳՆԱՑԵ՛Ք ՁԵՐ ՊԱՊԵՐԻ ՇԻՐԻՄՆԵՐԻՆ ՊԱՐԵՔ

ՌԱԶՄԱՀԱՅՐԵՆԱՍԻՐԱԿԱՆ ՊՈՐՏԱՊԱՐ ԳՆԱՑԵ՛Ք
ՁԵՐ ՊԱՊԵՐԻ ՇԻՐԻՄՆԵՐԻՆ ՊԱՐԵՔ

Այս օրերին սոցցանցում մեծ արձագանք է գտել «Արցախի պար» վերնագրով յութուբյան մի խայտառակ տեսանյութ, որտեղ մի «գիշերային թիթեռնիկ» պորտապար է պարում ՀՀ վաստակավոր արտիստ, երգահան ու երաժիշտ Արա Գեւորգյանի «Արցախ» երաժշտության տակ: Ուշագրավ է այն, որ թեպետ մի քանի տարի առաջ է այս արտասահմանյան կամ հայրենի տեսանյութը (պարզ չէ, հայաստանյան քեֆից մի հատված է, թե արտասահմանյան) հայտնվել համացանցում, սակայն այսօր առավել մեծ արձագանք է գտել: Ինչեւէ, հայհոյողները մեր ու ձեր սրտի ուզածի չափ ասել են տեսանյութի ներքո թե՛ պարողին, թե՛ նվագողին, թե՛ հանդիսատեսին ու հրապարակողին, անգամ հիշել նրանց անցավորներին: Իհարկե, մենք էլ միանալով այդ հայհոյանքներին, մեկ այլ ասպեկտից դիտարկենք հարցը` ո՞վ է մեղավոր: Եթե հիմա զարմանում ենք ու հայհոյում, ապա գոնե հետագայի համար պիտի դասեր քաղենք, պահենք ու պահպանենք մերը, որ վաղն էլ Կոմիտասի երգերի տակ գիշերային ակումբներում խողովակներ չծռեն անբարոյական կանայք կամ պարուհիները:

Կամ էլ ասենք` Արամ Խաչատրյանի երաժշտության ներքո պոռնոֆիլմեր չհայտնվեն համացանցում, ինչ է, թե մեկի ախմախ երեւակայությունը այդ է ուզում: Թեպետ ինչո՞ւ ենք մեղադրում ուրիշին, երբ շատ «հայրենասեր» ծնողներ իրենց զավակներին ոգեւորում ու ծափ են տալիս, երբ պորտապար է պարում բեմում կամ իրենց տանը, էլ չասենք, որ ոմանք էլ հատուկ պարապմունքների են հաճախում դրա համար: Լավ, ուրիշ պար չկա՞, ինչո՞ւ հենց պորտապար: Հայտնի հեռուստասերիալի ջեյդներն այսօր էլ ակտուալ չեն, այնպես որ, մի՛ աղավաղեք ձեր հայուհու կերպարը, մի՛ պղծեք մեր երգն ու երաժշտությունը ու դրանով մի՛ հայհոյեք մեր սրբություններին, այլապես եթե զոհված արցախյան հերոսների ականջն ընկնի, որ «Արցախ» երաժշտության տակ պորտապար են պարում` էն աշխարհից էլ հետ են գալու ու հերներդ են անիծելու:

Կույտը մշակեց ՀՐԱՆՏ ՍԱՐԱՖՅԱՆԸ