ՙԻՄ ՈՐԴՈՒ ՍՊԱՆՈՒԹՅԱՆ ԳՈՐԾՆ Ի ՍԿԶԲԱՆԵ ՓՈՐՁԵԼ ԵՆ ԿՈԾԿԵԼ՚

ՙԻՄ ՈՐԴՈՒ ՍՊԱՆՈՒԹՅԱՆ ԳՈՐԾՆ Ի ՍԿԶԲԱՆԵ ՓՈՐՁԵԼ ԵՆ ԿՈԾԿԵԼ՚

Վերջերս ՙԻրավունքին՚ տված հարցազրույցում նախկին ոստիկանապետ Ալիկ Սարգսյանը հնչեցրել էր արտահայտություններ, թե 2009 թվականին դեռեւս չպարզված հանգամանքներում սպանված փոխոստիկանապետ Գեւորգ Մհերյանի գործով եթե բան ունենային իր դեմ ասելու, ապա վաղուց կասեին: Իսկ ահա Մհերյանի հայրըª ՊԵՏՐՈՍ ՄՀԵՐՅԱՆՆ այդ կապակցությամբ հետեւյալ մտքին է.
-Ես ասել ու նորից եմ ասում, որ իմ որդու սպանության գործն ի սկզբանե փորձել են կոծկել, այն փորձել է այլ ուղղությամբ տանել նաեւ նախկին ոստիկանապետը: Վերջերս կարդացի նրա հարցազրույցը Վերնիսաժի հայտնի կրակոցների վերաբերյալ, որտեղ բարձրաձայնում է, թե ինքն էլ կկրակեր: Իհարկե, դա ինձ չի վերաբերում, բայց դրանից հետո նման մարդուց ի±նչ կարելի է սպասել, ու դրա տակ ինչեր կարելի է մտածել: Ինչ վերաբերում է նրան, որ ինքը նշում է, որ` եթե բան ունենայի ասելու, վաղուց ասած կլինեի, ապա ասեմ, որ կգա ժամանակը, անպայման կասեմ:
Իսկ որ ինքը բավականին լուրջ բացթողումներ ունի արած այս գործում, դա փաստ է: Հնարավոր չէ ճանաչում անել մի մարդու, ով ընդհանրապես կապ չունի սպանության հետ եւ ճանաչում չանել իր իսկ ենթադրյալ կասկածյալի հետ, որին իր հրամանով բերման են ենթարկում, բայց ճանաչում չեն անում: Դրանից հետո երեք տարի պնդում էին, որ հենց ինքն է մարդասպանը, այ սրա պատասխանը ինքը ոնց է տալու: Ես ունեմ ձայնագրություն, որտեղ ինքը բառացիորեն ՙգարանտիա՚ է տալիս, որ վերոնշյալ կասկածյալը գործը վերցնի իր վրա:
Անդրադառնալով գործի ընթացքին` պարոն Մհերյանը հավելեց.
- Ես մինչեւ իմ կյանքի վերջ էլ ակնկալիքներ ունեմ որդուս սպանության գործի բացահայտման հետ կապված: Բայց մի բան արդեն հստակ է, այսքան տարի հետո` գործն այս պահին, շնորհիվ ներկայիս ոստիկանապետի, բավականին լուրջ առաջընթաց ունի: Դա ինձ հույս է ներշնչում, որ շատ շուտով կլինեն բավականին լուրջ բացահայտումներ:

ԻԼՈՆԱ ԱԶԱՐՅԱՆ