ՌԴ-ՈՒՄ ՄԵՐ ՄԻԳՐԱՆՏՆԵՐԸ ԿԱՐՈՂ ԵՆ ԱՇԽԱՏԵԼ ԱՌԱՆՑ ԱՇԽԱՏԱՆՔԻ ԹՈՒՅԼՏՎՈՒԹՅԱՆ

ՌԴ-ՈՒՄ ՄԵՐ ՄԻԳՐԱՆՏՆԵՐԸ ԿԱՐՈՂ ԵՆ ԱՇԽԱՏԵԼ ԱՌԱՆՑ ԱՇԽԱՏԱՆՔԻ ԹՈՒՅԼՏՎՈՒԹՅԱՆ

«Իրավունքի» ունեցած տեղեկատվության համաձայն` ՀՀ տարածքային կառավարման նախարարության միգրացիոն ծառայությունը վերջին շրջանում ակտիվ հավաքագրում ու վերանայում է Ռուսաստանի Դաշնությունից արտաքսված ՀՀ քաղաքացիների տվյալները:

Թե ի՞նչ գործընթացի մասին է խոսքը, հետաքրքրվեցինք ՀՀ տարածքային կառավարման նախարարության միգրացիոն ծառայության պետի տեղակալ ԻՐԻՆԱ ԴԱՎԹՅԱՆԻՑ.
-Ոչ թե հավաքագրվում են այդ տվյալները, այլ, ուղղակի, ովքեր մեզ դիմում են, մենք իրենց գործերը վերցնում ուսումնասիրում ենք: Այստեղ այն անձանց մասին է խոսքը, ովքեր հիմք ունեն, որով կարող ենք դիմել ռուսական իշխանություններին, այսինքն` ունեցել են պատենդ, աշխատանքի թույլտվություն կամ ունեն Ռուսաստանի քաղաքացի դարձած հարազատ, բարեկամ, այսպես կոչված, մեղմացուցիչ հանգամանքներ, որի դեպքում կարող է քննարկվել իր մուտքը ՌԴ բացելու հարցը: Այնպես որ, ընդամենը մենք այդ գործերը վերցնում ենք, որպեսզի ներկայացնենք ռուսական կողմին:
- Իսկ արդեն որոշակի քանակ կա՞, որոնց գործերը վերանայվել են ռուսական կողմից:
- Ուղարկել ենք, բայց վերանայված ոչ մի գործ դեռեւս չկա, այս պահի դրությամբ դրական որեւէ դեպք չունենք:
- Ի՞նչ թիվ են կազմում ՌԴ-ից արտաքսված ՀՀ քաղաքացիները, որոնք արդեն իսկ դիմել են:
- Մենք դեռ հավաքում ենք այդ տվյալները եւ ուղարկել ենք դեռեւս շատ քիչ` մի քանի տասնյակ գործ: Փուլ առ փուլ առաջ ենք գնում:
- ՌԴ-ից արտաքսվածներից շատերը մեծ հույսեր են կապում ՀՀ-ի մոտալուտ Եվրասիական միության անդամակցության հետ: Այս գործընթացների հետ կարո՞ղ են որեւէ հույսեր կապել նրանք, ում մուտքը փակ է Ռուսաստանի Դաշնություն:
- Ցավոք սրտի, սա դրա հետ առնչություն չունի: Այսինքն` Եվրասիական միություն մտնելով` այդտեղ ուրիշ հարցեր կան, որ կլուծվեն: Օրինակ, մեր միգրանտները կարող են աշխատել առանց աշխատանքի թույլտվության, կարող են 30 օրվա ընթացքում չհաշվառվել: Իսկ ինչ վերաբերում է նրանց, ում մուտքը փակ է Ռուսաստանի Դաշնություն, այդտեղ անդրադարձ չկա: Այնպես որ, դա մնալու է այնպես, ինչպես կա, ու դրա համար ուրիշ լուծում է պետք մտածել:
- Ինչպիսի՞ լուծում եք տեսնում այս պահին:
- Քանի որ մենք ունենք նախնական պայմանավորվածություն` ռուսական կողմի հետ, փորձում ենք այդ տվյալները հավաքել եւ իրենց ներկայացնել: Այս պահի դրությամբ միակ ճանապարհը սա է:
- Այսինքն` ՌԴ-ից արտաքսված յուրաքանչյուր ՀՀ քաղաքացի դեռեւս կարո՞ղ է դիմել միգրացիոն ծառայություն:
- Այո, կարող է:

ՀՐԱՆՏ ՍԱՐԱՖՅԱՆ