՛՛Մեկ տուգանքով քաղաքացին չպետք է սնանկանա՛՛

՛՛Մեկ տուգանքով քաղաքացին  չպետք է սնանկանա՛՛

Այս տարվա հունիսի 18-ին օրենսդիր մարմինը  առաջին ընթերցմամբ  ընդունեց ճանապարհային երթևեկության կանոնների հաճախակի խախտումների համար նախատեսված տուգանքների չափերի վերանայման  մասին օրինագիծը:  ՕԵԿ խմբակցության պատգամավոր ՀՈՎՀԱՆՆԵՍ ՄԱՐԳԱՐՅԱՆԸ ընդունված նախագիծը  դրական է համարում, ավելին` կարծում է, որ օրինագիծն ընդլայնման կարիք ունի: «Վերջերս եղել եմ  Բրյուսելում, որտեղ չկա այնքան արագաչափ ու տեսախցիկ, որքան Հայաստանում: Եվ դա միայն Բրյուսելում չէ, այլև մի շարք եվրոպական երկրներում»,- տեղեկացրեց ՄԱՐԳԱՐՅԱՆԸ` հավելելով, որ  այս օրինագծի ընդունմամբ կարելի է սայլը  տեղից շարժված համարել: «Տուգանքները պետք է համադրելի լինեն մեր ժողովրդի աշխատավարձի ու կենսաթոշակի հետ, որպեսզի մեկ տուգանքով քաղաքացին սնանկ չճանաչվի»,- առաջարկեց  պատգամավորը

Մյուս կարևոր խնդիրը, որը ևս լուծում է ստացել, շրջանառության հարկի 3.5 տոկոսից 1.5 տոկոսի նվազեցումն է: «Պետք է այնպես անել, որ  այս հարկատեսակը տարածվի  ոչ միայն առևտրային գործունեություն ծավալող օբյեկտների, այլև բոլոր տնտեսվարողների վրա:  Հիմա ուսումնասիրում ենք` պարզելու`քանի տնտեսվարող օբյեկտ է տարեկան աշխատում 58-100 մլն դրամ շրջանառությամբ»,- եզրափակեց ՀՈՎՀԱՆՆԵՍ ՄԱՐԳԱՐՅԱՆԸ:

ՍՈՆԱ ԴԱՎԹՅԱՆ