«ԱԼԻԵՎԸ ԵՎՐՈՊԱՅԻՆ ԱՊԱՑՈՒՑԵՑ, ՈՐ ԱՆՁԱՄԲ ՆԱ ԵՎ ԻՐ ԵՐԿԻՐԸ ՇԱՏ ՀԵՌՈՒ ԵՆ ԺՈՂՈՎՐԴԱՎԱՐՈՒԹՅԱՆ ՆՇՈՒՅԼՆԵՐԻՑ»

«ԱԼԻԵՎ ԿՐՏՍԵՐԸ ԵՎՐՈՊԱՅԻՆ ԱՊԱՑՈՒՑԵՑ, ՈՐ ԱՆՁԱՄԲ ՆԱ ԵՎ ԻՐ ԵՐԿԻՐԸ ՇԱՏ ՀԵՌՈՒ ԵՆ ԺՈՂՈՎՐԴԱՎԱՐՈՒԹՅԱՆ ՆՇՈՒՅԼՆԵԻՑ»

Այս օրերին ԵԽԽՎ-ում է գտնվում հայաստանյան պատվիրակությունը, ով ցանկացած հնարավորություն բաց չի թողնում ադրբեջանցիներին իրենց տեղը դնելու եւ ճշմարտությունը եվրոպացի գործընկերներին լսելի դարձնելու համար: Ի դեպ, երեկ ԵԽԽՎ-ում ելույթ է ունեցել նաեւ Ադրբեջանի նախագահ Ալիեւ Կրտսերը, ում ելույթը ուղեկցվել է երիտասարդների բերանները փակ ակցիայով` ցույց տալով, որ այդ երկրում ազատ խոսք չկա: Սակայն Ալիեւը չընկճվելով դեռ մի բան էլ մատ է թափ տվել հարցեր հնչեցնողների վրա: «Իրավունքը» կապ հաստատեց եւ ԵԽԽՎ-յան վերջին իրադարձությունների մասին զրուցեց ԱԺ ՀՀԿ խմբակցության պատգամավոր, ԵԽԽՎ-ում հայկական պատվիրակության անդամ ՆԱԻՐԱ ԿԱՐԱՊԵՏՅԱՆԻ հետ:

- Ալիեւի վարքագիծը ինչպե՞ս կմեկնաբանեք:

- Ալիեւ Կրտսերն այսօր Եվրոպային ապացուցեց, որ անձամբ նա եւ իր երկիրը շատ հեռու են ժողովրդավարության նշույլնեից: Այս ելույթը եւ հաջորդած հարց ու պատասխանը, որ լի էին սպառնալիքներով, անպարկեշտությամբ ու խեղաթյուրված իրականությամբ, հաստատեցին միայն այն իրողությունը, որ նա անկարող է դիվանագիտական գործիքների կիրառման հարցում:

- Ի պատասխան Ձեր բավական կոշտ ելույթից հետո, ինչպիսի՞ն եղավ ադրբեջանական կողմի եւ եվրոպական գործընկերների արձագանքը:

- Իմ եւ գործընկերներիս ելույթները, բնականաբար, առաջացրեցին ադրբեջանցի եւ ադրբեջանական տաշտակից սնվող եվրոպացիների լուռ եւ խորը դժգոհությունը, սակայն, ինչպես նշել եմ, ԵԽԽՎ-ում կան նաեւ նորմալ, ադեկվատ, պրոֆեսիոնալ պատգամավորներ, ովքեր սթափ են գնահատում իրավիճակը:

- Այն բանից հետո, որ ԵԽԽՎ նախագահը անվերապահորեն ընդունեց Ադրբեջանի տարածքային ամբողջականությունը, արդյո՞ք անիմաստ չի դարձել այդ կառույցում Հայաստանի մասնակցությունը:

- ԵԽԽՎ նախագահ Ան Բրասորի խոսքում` Հայաստանի համար ոչ ընդունելի հայտարարությունների կողքին, կային նաեւ այլ շեշտադրումներ, օրինակ` Լեռնային Ղարաբաղի հակամարտության միայն խաղաղ եւ միայն ԵԱՀԿ ՄԻնսկի խմբի շրջանակներում լուծման վերաբերյալ, Ադրբեջանում մարդու իրավունքների եւ ժողովրդավարության խնդրի ու տնտեսական աճի միջեւ կապի բացակայության եւ այլ խնդիրների վերաբերյալ: Իմ կարծիքով, մենք ունենք բավարար հմտություններ ի շահ մեր պետության օգտագործելու ցանկացած խորհրդարանական հարթակ` այդ թվում նաեւ ԵԽԽՎ-ն:

- Հետաքրքիր է, իսկ մեր պատվիրակությունը արդյո՞ք բավարար միասնական է այս օրերին:

- Մեր պատվիրակությունը բավականին միասնական է, սա անգամ քննարկման ենթակա հարց չէ:

Նշենք, որ Ն. Կարապետյանը անդրադառնալով Ալիեւի ելույթին` ԵԽԽՎ նիստի ժամանակ մասնավորապես նշել է. «Մի քանի ժամ առաջ մենք այստեղ լսեցիք ելույթ, որտեղ ճշմարտությունը խեղաթյուրված էր. Ադրբեջանի նախագահը խոսում էր երկրում իրականացվող բարեփոխումներից, նշում էր, որ կոռուպցիան նվազել է երկրում, ազատ խոսք կա: Սակայն միեւնույն ժամանակ մենք տեսանք, թե ինչպես երիտասարդները բերանները փակ ակցիա իրականացրին` ցույց տալով, որ երկրում ազատ խոսք չկա»: Ապա հավելել է, որ Ադրբեջանում քսենոֆոբիան ու ատելությունը դարձել է պետական քաղաքականության մաս. «Ադրբեջանի հասարակությունը այդ պատճառով ատում է այն ամենը, ինչ կապված է Հայաստանի ու հայկական մշակույթի հետ: Բոլորս ենք հիշում Ռամիլ Սաֆարովի դեպքը, որը սպանել էր հայ սպա Գուրգեն Մարգարյանին, ով քնած էր եղել: Նման դաժան սպանություններ կարող են պատահել ամեն օր, ցանկացած վայրում, որովհետեւ ադրբեջանական հասարակության անընդհատ սնել են ու դաստիարակել հայերի նկատմամբ ատելության զգացումով»:

ՀՐԱՆՏ ՍԱՐԱՖՅԱՆ