ՏՐԱՆՍՖԵՐԱՅԻՆ ՈԴԻՍԱԿԱՆԻ ՀԵՐՈՍՆ ԱՅՍ ԱՆԳԱՄ ՅՈՒՐԱ ՄՈՎՍԻՍՅԱՆՆ Է

ՏՐԱՆՍՖԵՐԱՅԻՆ ՈԴԻՍԱԿԱՆԻ ՀԵՐՈՍՆ ԱՅՍ ԱՆԳԱՄ ՅՈՒՐԱ ՄՈՎՍԻՍՅԱՆՆ Է

2013-2014 մրցաշրջանի լավագույն գոլի հեղինակին պարզելու համար Մոսկվայի ՙՍպարտակը՚ հարցում է անցկացնում: 10 գոլերի թվում են նաեւ Հայաստանի հավաքականի ֆուտբոլիստներ Յուրա Մովսիսյանի եւ Արաս Օզբիլիսի խփած գնդակները: Լավագույնների թվում տեղ են գտել Մովսիսյանի` ՙԿուբանի՚ եւ ՙՌուբինի՚ դեմ խաղերում խփած գոլերն ու Օզբիլիսի` ՙՎոլգայի՚ դարպասն ուղարկած գնդակը:
Իսկ մինչ այդ, անգլիական եւ գերմանական որոշ ակումբներ շարունակում են ուշադրության կենտրոնում պահել Յուրա Մովսիսյանին: Տեղեկատվությունն այս անգամ  հաղորդում է Daily Mail-ը, ըստ անգլիական պարբերականի` Անգլիայի Պրեմիեր լիգայի ուղեգիր նվաճած ՙԼեսթեր Սիթին՚ կփորձի գնել Հայաստանի հավաքականի եւ Մոսկվայի ՙՍպարտակի՚ հարձակվող Յուրա Մովսիսյանին: 26-ամյա հարձակվողի տրանսֆերային արժեքը գնահատվում է 7 միլիոն ֆունտ ստերլինգ: Յուրա Մովսիսյանի ծառայություններով հետաքրքված է նաեւ անգլիական ՙՎեստ Բրոմվիչը՚: Եթե հաշվի առնենք, որ ավելի վաղ նշվում էր, որ գերմանական եւ իտալական ակումբները եւս ցանկություն ունեն իրականացնել հայ ֆուտբոլիստի տրանսֆերը, կարող ենք ասել, որ Յուրա Մովսիսյանի հետ կապված` ընթացիկ վիճակը հիշեցնում է Հենրիխ Մխիթարյանի` Դորտմունդի ՙԲորուսիա՚ տեղափոխվելու շրջանը: Միայն  հուսանք, որ Մովսիսյանի տեղափոխությունը որեւէ ակումբ` չի վերածվի տրանսֆերային ոդիսականի:
Անդրադառնալով ՙՍպարտակում՚ հանդես եկող մեր մյուս ֆուտբոլիստին` Արաս Օզբիլիսին, պետք է նշել, որ թիմը փոխարինող է փնտրում ֆուտբոլիստի համար: Վերջինս վնասվածք էր ստացել մայիսի 31-ին կայացած Ալժիրի հավաքականի դեմ ընկերական խաղում: Հունիսի 11-ին Հռոմում նա ծնկի վիրահատության էր ենթարկվել: Կիսապաշտպանին սպասվում է եւս մեկ վիրահատություն: Օզբիլիսը կբացակայի մոտ 9 ամիս, ինչը թիմում առաջացրել է պրոբլեմատիկ գոտի: ՙՍպարտակն՚ արդեն դիտարկում է մի քանի ֆուտբոլիստների տարբերակներ, որոնք կարող են չեզոքացնել այդ պրոբլեմատիկ գոտին:
Հայաստանի հավաքականի ամենափորձառու ֆուտբոլիստի` Ռոման Բերեզովսկու կարիերայի մեջ նոր շրջադարձ չի սպասվում, Հայաստանի հավաքականի 39-ամյա դարպասապահը մեկ տարով երկարաձգել է Մոսկվայի ՙԴինամոյի՚ հետ գործող պայմանագիրը, որն ավարտվում էր հունիսի 30-ին: Հիշեցնենք, որ Ռոման Բերեզովսկին 2012-ին ռուսական ՙԽիմկիից՚ էր տեղափոխվել ՙԴինամո՚: Իսկ ահա ֆուտբոլի  Հայաստանի հավաքականի երիտասարդ ֆուտբոլիստները տեղում չեն դոփում. պաշտպան Հովհաննես Համբարձումյանը օրեր առաջ պայմանագիր է կնքել մակեդոնական ՙՎարդարի՚ հետ: Ֆուտբոլիստը առաջարկներ ուներ նաեւ Հայաստանի, Ռումինիայի եւ Գերմանիայի երկրորդ դիվիզիոնի ակումբներից: ՙԸնտրեցի ՙՎարդարը՚ մեծ ամբիցիաների եւ լավ առաջարկի համար: Ցանկանում եմ դառնալ Մակեդոնիայի չեմպիոն եւ մեծ դեր ունենալ տիտղոսի նվաճման գործում՚,- հայ ֆուտբոլիստի խոսքն է փոխանցում ՙՎարդարի՚ պաշտոնական կայքը:

ՔՐԻՍՏԻՆԵ ՊԵՏՐՈՍՅԱՆ