ԵՐԹՈՒՂԱՅԻՆՈՒՄ ՉՈՐՍ ՍԵՎԱՄՈՐԹԻ ԿՈՂՄԻՑ ԾԵԾԻ ԵՆԹԱՐԿՎԱԾ ՀԱՅԸ ԼՌՈՒՄ Է

ԵՐԹՈՒՂԱՅԻՆՈՒՄ ՉՈՐՍ ՍԵՎԱՄՈՐԹԻ ԿՈՂՄԻՑ
ԾԵԾԻ ԵՆԹԱՐԿՎԱԾ ՀԱՅԸ ԼՌՈՒՄ Է

Հունիսի 22-ին` ժամը 21:15-ին, Ոստիկանության Երեւան քաղաքի վարչության ՊՊԾ գնդի 1-ին գումարտակի 1-ին վաշտի ծառայողները Երեւանի Աբովյան-Ամիրյան փողոցների խաչմերուկում նկատել են, որ 44 համարի երթուղայինում չորս սեւամորթ երիտասարդ վիճաբանում եւ հարվածում են ՀՀ քաղաքացու:
«Իրավունքը» րոպեներ անց լինելով դեպքի վայրում` ականատես եղավ, թե ինչպես են օտարերկրացիները մեծ աղմուկ բարձրացրել ու ոչ մի կերպ չէին ուզում ենթարկվել ոստիկաններին: Ինչպես հաջողվեց պարզել հավաքվածներից, վերոնշյալ սեւամորթները կռվի են բռնվել ՀՀ քաղաքացու հետ ու հայհոյանքներ հնչեցրել:

Արդյունքում խառնվել են ոստիկաններն ու փորձել կարգի հրավիրել օտարերկրացիներին: Ի վերջո, ոստիկաններին մի կերպ հաջողվեց  աղմկոտ սեւամորթներին տեղավորել ոստիկանական գազելում ու տեղափոխել բաժին: Անցորդներին առավել բարկացնում էր այն, որ մեր երկրում, այն էլ` մայրաքաղաքի սրտում, օտարերկրացիները այդքան «դուխ» են առել ու անվայել են իրենց պահում` հուսալով, որ հայերս չենք տիրապետի իրենց լեզվին ու կշարունակենք բարյացկամ լինել հյուրերի նկատմամբ:
Թե ինչ ճակատագրի արժանացան բերման ենթարկված սեւամորթները, «Իրավունքը» փորձեց պարզել ՀՀ ոստիկանության հասարակայնության հետ կապերի ու լրատվության բաժնի աշխատակից ԱՐՄԵՆ ՄԱԼԽԱՍՅԱՆԻՑ, ով հղում կատարելով ոստիկանության պաշտոնական կայքին` նշեց. «Վիճաբանող 4 երիտասարդները բերման են ենթարկվել բաժին: Պարզվել է, որ նրանք օտարերկրյա քաղաքացիներ են, իսկ ծեծի ենթարկվածը Արարատի մարզի Արգավանդ գյուղի բնակիչ է, ով հրավիրվել է Ոստիկանության Կենտրոնականի բաժին, սակայն հրաժարվել է հաղորդում տալուց: Նշանակվել է դատաբժշկական փորձաքննություն: Կատարվում է հետաքննություն»: Ի դեպ, նշենք, որ թեպետ ոստիկանությունը պարզել է, թե որ երկրի ներկայացուցիչներ են «կատաղի» սեւամորթները, սակայն հետաքննության գաղտնիությունից ելնելով` այդ մասին դեռեւս լռում են: Ինչեւէ, հուսանք, որ սա առիթ կլինի, որպեսզի օտարերկրացիները իրենց սկսեն հյուրի պես պահել, այլապես երբեմն հետեւելով պարսիկների կամ մեկ այլ ազգի ներկայացուցիչների երեւանյան խրախճանքներին` թվում է, թե վերջիններս ոչ թե հյուր են մեր երկրում, այլ գտնվում են իրենց հոր տանը:

ՀՐԱՆՏ ՍԱՐԱՖՅԱՆ