«ՔՈՉԱՐՅԱՆԻ ՕՐՈՔ ՈՐԴԵԳՐՎԵԼ ԷՐ ՄԻ ՄՈՏԵՑՈՒՄ, ՎԱՃԱՌԵՆՔ ՄԵՐ ՈՒՆԵՑԱԾՔԸ ՄԱՍՆԱՎՈՐ ԿԱՌՈՒՅՑԻՆ»

«ՔՈՉԱՐՅԱՆԻ ՕՐՈՔ ՈՐԴԵԳՐՎԵԼ ԷՐ ՄԻ ՄՈՏԵՑՈՒՄ, ՎԱՃԱՌԵՆՔ ՄԵՐ ՈՒՆԵՑԱԾՔԸ ՄԱՍՆԱՎՈՐ ԿԱՌՈՒՅՑԻՆ»

Ռուսաստանի նախագահ  Վլադիմիր Պուտինը հայաստանյան առաջին այցից` 2001-ից հետո Հայաստանը 100 մլն դոլար պարտքի դիմաց Ռուսաստանին փոխանցեց Հրազդանի ջերմակայանը, «Մարս» գործարանը և 3 գիտական հաստատություններ՝ Մաթեմատիկական մեքենաների, Նյութագիտության եւ Ավտոմատ կառավարման ինստիտուտները:

«Գույք պարտքի դիմաց» գործարքը, սակայն, Վլադիմիր Պուտինի պաշտոնական այցի միակ ձեռքբերումը չէր. 2001-ի սեպտեմբերին Վլադիմիր Պուտինը նաև անդրադարձել էր Հայաստանի էլկտրացանցերի մասնավորեցման խնդրին ՝ հույս հայտնելով, որ անցկացվող միջազգային մրցույթում ռուսական «ՌԱՈ ԵԷՍ» ընկերությունը հաջողություն կունենա: Այդպես էլ եղավ. 2002 -ին նախագահ Ռ. Քոչարյանի օրոք, Հայաստանի բաշխիչ էլեկտրացանցերը նույնպես փոխանցվեցին ռուսներին:

Օրեր առաջ ՀՀ հանրային ծառայությունները կարգավորող հանձնաժողովի նախագահ Ռոբերտ Նազարյանը հայտարարեց, որ «Հայկական էլեկտրացանցերը» ֆինանսական ճողվածք ունի և պարտքերն արդեն կազմում են 16 միլիարդ 600 միլիոն դրամ:

«Իրավունք»-ի թղթակիցը Հայաստանին դեմոկրատական կուսակցության ղեկավար Արամ Սարգսյանից, ով 2002-ին ակտիվ պայքարում էր Հայաստանի էլցանցերի մասնավորեցան դեմ, հետաքրքրվեց` ի վերջո, ճիշտ էր ռազմավարական նշանակություն ունեցող կառույցի մասնավորեցումը, եթե, ինչպես նշում են  խնդրին քաջատեղյակները, վատ  մենեջմենթի պատճառով է տեղի ունենում էլեկտրաէներգիայի գնի բարձրացումը:   Արամ Սարգսյանը հիշեցնում է` Ռոբերտ Քոչարյանի ղեկավարման տարիներին որդեգրվել էր մի մոտեցում` վաճառենք մեր ունեցածը մասնավոր կառույցներին, քանի որ պետությունը վատ մենեջեր է: Սակայն, խնդիրը, ըստ զրուցակցի, ոչ թե մասնավորին վաճառել կամ չվաճառելն է, այլ անվերահսկողությունը և կոռուպցիոն համապատասխան սխեմաների առկայությունը:

Արամ Սարգսյանը նախ առաջարկում է ՀՀ վարչապետին հաշվետվությամբ հանդես գալ և ասել, թե  նախորդ կառավարությունից ինչ  ժառանգություն է ստացել: «Ժամանակին, երբ  Քոչարյանը դարձավ նախագահ, առաջարկեցինք հրապարակավ ասել` ինչ վիճակում է ընդունել հանրապետությունը ՀՀՇ-ից հետո, ինքը հրաժարվեց` ասելով. բոլոր տեղերում կախաղաններ  պետք է  դնեմ: Չարեց, ստացանք այն, ինչ ստացանք»,- մանրամասնեց քաղաքական գործիչը:

Երկրորդ քայլը, որը պետք է անի Հովիկ Աբրահամյանը, հետևյալն է` ԿԲ-ից և Տիգրան Սարգսյանից պետք է պահանջի բացատրություն այն մասին, թե 1մլրդ 800 մլն դոլարը  վարկն ինչպես և ինչի վրա է ծախսվել:

Ինչ վերաբերում է Ռոբերտ Նազարյանի օրեր առաջ հնչեցրած այն հայտարարությանը, թե չի բացառվում էլեկտրաէներգիայի գնի նվազում լինի, եթե մենք չունենանք այլ գործոններով պայմանավորված խնդիրներ, մասնավորապես՝ դոլար-դրամ փոխարժեքով պայմանավորված, Արամ Սարգսյանը դա անհավանական  է համարում. «Տնտեսվարողներն այսուհետ առաջնորդվելու են այն գնով, որը հաստատվելու է»:

ՍՈՆԱ ԴԱՎԹՅԱՆ