ԱՐԱՄ ՍԱՐԳՍՅԱՆ. ՛՛Ամբողջը ջուր ծեծոցի է, հոսանքի թանկացումն անհիմն է՛՛

ԱՐԱՄ ՍԱՐԳՍՅԱՆ. ՛՛Ամբողջը ջուր ծեծոցի է,  հոսանքի թանկացումն անհիմն է՛՛

Ինչպես արդեն հայտնի է, այս տարվա օգոստոսի մեկից էլեկտրաէներգիան կթանկանա 4 դրամով:  Հանրային ծառայությունները կարգավորող հանձնաժողովի նախագահ  Ռոբերտ Նազարյանը  տարբեր առիթներով հայտարարել է` էլեկտրաէներգիայի թանկացումն անխուսափելի է:

Հայաստանի դեմոկրատական կուսակցության նախագահ Արամ Սարգսյանը, սակայն, հիմնավոր չի համարում հոսանքի  թանկացման մասին հայտարարությունը:  ՀԴԿ ղեկավարն օրեր առաջ նամակ է հղել   Հանրային ծառայությունները կարգավորող հանձնաժողովին և առաջ քաշել մի շարք հարցադրումներ: Պատասխանները, սակայն, չեն գոհացնում կուսակցության ղեկավարին. «Ամբողջը ջուր ծեծոցի է: Հարց ենք տալիս` ինչո՞ւ աուդիտ չեք արել, որպեսզի իմանաք`  ինչ վիճակում են «Հայկական էլեկտրացանցեր» ՓԲԸ-ը, որն իբր թե վնասով է աշխատում, պատասխանում են` աուդիտ արվում է: Դե եթե արվոմ է, ինչպե՞ս հասկանանք` ինչու    նախորդ տարի 8 դրամով հոսանքի թանկացման ժամանակ  հաշվի չէր առնվում այն բոլոր խնդիրները, որոնց մասին այսօր են խոսում»:

Բանախոսի խոսքով` «Հայկական էլեկտրացանցեր» ՓԲԸ-ի վատ մենեջմենթի պատճառով տուժում է  ժողովուրդը:  «Ասում են` ատոմակայանը 4 ամիս չի աշխատել, որի պատճառով էլ  իրենց մոտ գինը բարձրացրել է, բայց մոռանում են մի բան նշել. «Հայկական էլեկտրացանցեր» ՓԲԸ-ն ատոմակայանի չաշխատելու և ֆորս մաժորային իրավիճակներում    ամորտիզացիոն ֆոնդ պետք է  ունենա մինչև խնդիրը կլուծվի»,- մանրամասնում է  Արամ Սարգսյանը և հավելում` այս ամենի պատճառը  գրեթե բոլոր ոլորտներում տիրող կոռուպցիան է:

Ինչ վերաբերում է ժողովրդի պասիվությանը և կարծես թե   հոսանքի գն  բարձրացման նկատմամբ անտարբեր լինելուն,   Արամ Սարգսյանն  ու ասուլիսի մյուս բանախոս, ԱԺԴ ղեկավար Արշակ Սադոյանը այդ տեսակետին այնքան էլ համաձայն չեն. նրանց կարծիքով անհրաժեշտ է կազմակերպված ընդդիմություն` հասարակությանը ոտքի հանելու համար: «Իշխանությունները պարբերաբար  այն միտքն են հղել հասարակությանը, թե նրանք ոչինչ չեն կարող փոխել: Այդ պատճառով էլ մարդիկ  տանը նստած` մտածոմ են`ոչինչ չեն կարող անել»,- հավելեց Արամ Սարգսյանը:

ՍՈՆԱ ԴԱՎԹՅԱՆ