ՙՙՔՍԱՆ ՍՏԱՑՈՂ ԴԻՄՈՐԴՆԵՐԻ ԹԻՎԸ ՆՎԱԶԵԼ Է

ՔՍԱՆ ՍՏԱՑՈՂ ԴԻՄՈՐԴՆԵՐԻ ԹԻՎԸ ՆՎԱԶԵԼ Է

Եզրագծին մոտեցավ հանրապետությունում հունիսի 3-ին մեկնարկած միասնական քննությունների առաջին փուլը: Այսօր դիմորդները քննություն կհանձնեն Հայոց պատմություն, Քիմիա առարկաներից:

Ինչպես նախորդ տարիներին, այնպես էլ այս տարի քիչ չեն քննություններից դժգոհողների թիվը. ոմանց թեստերը չեն գոհացնում, ոմանց` քննությունից ստացած արդյունքները, ոմանց էլ՝ այն հանգամանքը, թե թեստերն այնքան են պարզեցվել, որ անգամ աչքերը փակ վիճակում դիմորդը կարող է հեշտությամբ գրել ու վաստակել դրական միավոր:  
Ըստ Գնահատման եւ թեստավորման կենտրոնի (ԳԹԿ) արտաքին համագործակցության բաժնի պետ ԱՐԱ ԻՍՊԻՐՅԱՆԻ, նախորդ տարիների համեմատ, այս տարի սահմանափակ քանակությամբ են գրանցվել բողոք-դիմումները. Կենսաբանություն առարկայից` 53,  Հայոց լեզու եւ գրականությունից` 125, Ֆիզիկա առարկայից` 45: «Բողոքների հիմնական մասը վերահաշվարկի հետ է կապված եղել: Այսինքն`տեխնիկական բնույթ են կրել, որոնք էլ լուծվել են hօգուտ դիմորդի: Եղել են մի քանի դիմումներ, թե դիմորդը վատ է զգացել, ինչի պատճառով անբավարար գնահատական է ստացել: Նման բողոք-խնդրանքները մերժվում են»,- ընդգծեց ԳԹԿ արտաքին համագործակցության բաժնի պետը:
Հարցին, թե դիմորդների մեծամասնությունը նշել է, որ Օտար լեզու առարկայից բավական պարզ են եղել թեստերը, ի տարբերություն հայոց լեզու առարկայի, Ա. Իսպիրյանը պայմանավորում է թեստերում կարճ պատասխանով առաջադրանքների ավելացմամբ. «Եթե համեմատենք նախորդ տարվա ցուցանիշները Օտար լեզու առարկայից, ապա կտեսնենք, որ 20 ստացող դիմորդների թիվը նվազել է: Դա պայմանավորված է թեստի կառուցվածքի փոփոխությամբ: Օտար լեզու առարկայում այս տարի ավելացել են կարճ պատասխանով առաջադրանքները»:
Նշենք, որ քննության արդյունքները վերջնական կամփոփվեն ս.թ. հունիսի 23-ին:

ՎԼԱԴ ՄՈՒՐԱԴՅԱՆ