«ՀԱԿ-Ի ՈՐՈՇ ՆԵՐԿԱՅԱՑՈՒՑԻՉՆԵՐ ԿԱՐՈՂԱՑԱՆ ԷՍ ԳՅՈԶԱԼ ՏՂՈՒՆ ՓՉԱՑՆԵԼ»

«ՀԱԿ-Ի ՈՐՈՇ ՆԵՐԿԱՅԱՑՈՒՑԻՉՆԵՐ ԿԱՐՈՂԱՑԱՆ ԷՍ ԳՅՈԶԱԼ ՏՂՈՒՆ ՓՉԱՑՆԵԼ»

Երեկ Ազգային ժողովում հուզառատ ելույթով հանդես եկավ ԱԺ ՀՅԴ խմբակցության պատգամավոր ԱՐԾՎԻԿ ՄԻՆԱՍՅԱՆԸ` մասնավորապես գույները խտացնելով, ասելով, որ ամեն ինչ վատ է ու դեռ ավելին` հավելելով, որ վաղը կամ մյուս օրը պետք է Ազգային ժողով բերվի մի կործանարար օրենք, որը երկիրը կործանելու է: Ա. Մինասյանի գուշակություններին ու հոռետեսությանն իր ելույթում անդրադարձավ ԱԺ ՀՀԿ խմբակցության ղեկավար ՎԱՀՐԱՄ ԲԱՂԴԱՍԱՐՅԱՆԸ.
-Արծվիկ Մինասյանը շատ սկզբունքային առաջարկություններով բազմիցս հանդես է եկել, բայց զարմանում եմ, որ ՀԱԿ-ի որոշ ներկայացուցիչներ կարողացան էս գյոզալ տղուն փչացնել: Ոնց ընկավ ազդեցության տակ, ես մտածում էի, որ հակառակը կարող է լինել, որ նրանց կբերի կոնստրուկտիվ դաշտ, ինչպես ինքն է միշտ եղել իր առաջարկություններով, լավատեսությամբ` լավը տեսել է, վատը` քննադատել: Բայց հանկարծ տեսնում եմ, որ այս սկզբունքային մարդը նրանց ազդեցության տակ ընկավ, չի ուզում լավը տեսնել: Ես սկզբում մտածում էի, որ ՀԱԿ-ի որոշ ներկայացուցիչներ, պարզապես, չեն ցանկանում լավը տեսնել, հիմա նոր եմ հասկանում, որ ուղղակի չեն ընկալում լավը: Մենք վաղը կամ մյուս օրը պետք է բերենք մի կործանարար օրենք, որը երկիրը կործանելու է. զարմանում եմ, որ հայ մարդը կարող է մտածի կամ սպասի, որ իր երկիրը պետք է կործանվի: Եվ փրկիչներն ու կործանարարներն էլ այստեղ են նստած: Դուք պատկերացնո՞ւմ եք, թե ինչ վտանգավոր հայտարարություններ են անում մարդիկ: Պարզապես, խղճում եմ նման տիպի հայտարարություններ անողներին...
Ապա Վ. Բաղդասարյանը դիմեց առավոտյան բոյկոտած, կեսօրին փոշմանած ոչ իշխանական պատգամավորներին. «Նորից եմ կոչ անում ձեզ, հարգելի՛ ընդդիմություն, եթե դուք փորձում եք ձախողելու, վայրահաչելու, կեղտոտելու միջոցով գալ իշխանության, դա մեկ անգամ եւս ասում եմ, որ ձեզ չի հաջողվելու»: Վերջում էլ հավելեց. «Իրենց մեջ մրցույթ է գնում, թե այս հինգից, ով պետք է ընդդիմություն դառնա: Ինչքան էլ դուք մրցույթի մեջ մտնեք, դուք չեք կարող ընդդիմություն դառնալ, ընդդիմությունն այսպես չի լինում: Դուք կարող եք հայհոյողներ, վարկաբեկողներ դառնալ, բայց ընդդիմություն` որպես այդպիսին, ձեր այս պահվածքով չեք կարող դառնալ: Այս մրցավազքը ավարտե՛ք: Ավարտվա՛ծ է, հրավիրում ենք նորմալ կոնստրուկտիվ աշխատանքի»:
Ուշագրավ էր այն, որ Վ. Բաղդասարյանի ապտակի պես հնչող ելույթից հետո շարվեշարան ԱԺ նիստերի դահլիճ մտան ԱԺ ԲՀԿ խմբակցության պատգամավորներ Էլինար Վարդանյանը, Վահե Հովհաննիսյանը, Ստեփան Մարգարյանը, Նաիրա Զոհրաբյանը, ՀՅԴ-ից` Աղվան Վարդանյանն ու Արմեն Ռուստամյանը, եւ ՀԱԿ-ից` Լեւոն Զուրաբյանը: Իսկ նախ` Ն. Զոհրաբյանը, ապա` Լ. Զուրաբյանը շտապեցին նստել Ա. Մինասյանի կողքին` հավանաբար մխիթարելու համար:

ՀՐԱՆՏ ՍԱՐԱՖՅԱՆ