«ՌՈՒՍԱՍՏԱՆԸ ՊԵՏՔ Է ԱՄԵՆ ԳՆՈՎ ԽՈՒՍԱՓԻ ԱՅԴ ԶԻՆՎԱԾ ԿՈՆՖԼԻԿՏԻՑ»

«ՌՈՒՍԱՍՏԱՆԸ ՊԵՏՔ Է ԱՄԵՆ ԳՆՈՎ
ԽՈՒՍԱՓԻ ԱՅԴ ԶԻՆՎԱԾ ԿՈՆՖԼԻԿՏԻՑ»

Այս շաբաթ արտահերթ նիստով կավարտվի ԱԺ 5-րդ գումարման գարնանային նստաշրջանը, սակայն սա բոլորովին էլ չի նշանակում, որ արտաքին ու ներքին քաղաքական իրադարձությունները չեն շարունակվի մինչեւ աշուն: Հենց այս մասին էլ «Իրավունքը» զրուցեց ԱԺ ՀՀԿ խմբակցության պատգամավոր, ԱԺ արտաքին հարաբերությունների մշտական հանձնաժողովի անդամ ՀԱՄԼԵՏ ՀԱՐՈՒԹՅՈՒՆՅԱՆԻ հետ` անդրադառնալով Սիրիայից մինչեւ Ուկրաինա տիրող քաոսային իրադարձություններին, ինչպես նաեւ մեր իրականության խնդիրներին` էլեկտրաէներգիայի գնի թանկացմանն ու ոչ իշխանական քառյակի ներկայացրած 12 կետերին:

«ՔԵՍԱԲԻ ԱԶԱՏԱԳՐՈՒՄԸ ԲԱՐԵՆՊԱՍՏ ՊԱՅՄԱՆՆԵՐ Է ՍՏԵՂԾՈՒՄ ՀԱՅԵՐԻ ՀԱՄԱՐ»

-Պարոն Հարությունյան, Քեսաբի ազատագրումն ի՞նչ փոփոխություններ կբերի Սիրիայում եւ ինչպե±ս կանդրադառնա սիրիահայերի վրա:
- Կարծում եմ, որ Ասադի դիրքերը Սիրիայում այսօր ուժեղացել է: Եվ ընդհանրապես Քեսաբի ազատագրումը հայերի համար բարենպաստ պայմաններ է ստեղծում, որովհետեւ շատերը, որոնք իսլամիստների հարձակման հետեւանքով լքել էին իրենց տարածքները, վերադառնում են: Այնպես որ, Քեսաբի ազատագրումը դրական երեւույթ էր, քանի որ հայերը լիովին պաշտպանում են Ասադի ռեժիմը:
- Ի՞նչ կասեք Սիրիայի իշխանությունների ու բանակի կատարած գործողությունների մասին, որովհետեւ համացանցում տարածված կադրերը ցույց են տալիս, որ քաղաքի ազատագրման ժամանակ այն առանձնապես չի ավերվել:
- Ուրեմն` հատուկ ջոկատայիններն են երեւի օպերացիա անցկացրել, իսկ այդ ջոկատայինները սովորաբար ուրիշ մեթոդներով են աշխատում:

«ՈՒՐԱԽԱԼԻ Է», ՈՐ ԱԴՐԲԵՋԱՆՑԻՆԵՐԸ ՆՈՐԻՑ ԱՊԱՑՈՒՑԵՑԻՆ ԻՐԵՆՑ
ԲԱՐԲԱՐՈՍԱԿԱՆ ԿԵՑՎԱԾՔԸ»

-Ի տարբերություն Սիրիայի, Ուկրաինայից ստացված լուրերը ոչ մի լավ բան չեն հուշում: Ավելին` օրերս անգամ Ռուսաստանի Դաշնության դեսպանատան վրա հարձակում եղավ:
- Ապշեցուցիչ զարգացումներ են տեղի ունենում Ուկրաինայում, որը հարիր չէ ուկրաինական ժողովրդին: Իմ խորին համոզմամբ` այդտեղ ուրիշ ուժեր են աշխատում, որոնք շահագրգռված են, որպեսզի Ուկրաինայի եւ Ռուսաստանի միջեւ զինված կոնֆլիկտ առաջանա: Ռուսաստանը պետք է ամեն գնով խուսափի այդ զինված կոնֆլիտից, որովհետեւ դա ընդհանրապես մարդկության համար բավականին հղի է անկանխատեսելի հետեւանքներով:
- Այս օրերին մեր երկու պատգամավորները գտնվում են Բաքվում եւ ՆԱՏՕ-ի շրջանակներում մասնակցում են սեմինարների, ինչը մեծ աղմուկ է բարձրացրել Ադրբեջանում: Ուշագրավ է նաեւ այն, որ ՌԴ արտգործնախարար Ս. Լավրովն էլ է մեկնել Բաքու, ըստ Ձեզ, ի՞նչ գործընթացներ են տեղի ունենում:
- Երբ Բաքվի պատգամավորները եղել են Երեւանում, ես առիթ եմ ունեցել  ուղեկցել նրանց եւ հիացմունքից բացի, այդ մարդիկ ոչինչ չէին ասում մեր հյուընկալության ու մեր ժողովրդի վերաբերմունքի մասին: Նույնը նաեւ` ՆԱՏՕ-ի գագաթնաժողովի մյուս ներկայացուցիչները: Այսօր «ուրախալի է», որ ադրբեջանցիները նորից ապացուցեցին իրենց բարբարոսական կեցվածքը` ցույցեր անելով: Հետեւապես, այս տեսանկյունից մեր պատգամավորների պահվածքն էլ բավականին նորմալ էր, ես կասեի` հարձակողական: Ինչպես մամուլում է գրված, որեւիցե ճնշման նրանք չենթարկվեցին: Իսկ Ս. Լավրովի Բաքու ժամանելը չեմ կարծում, որ անմիջապես կապ ունի ՆԱՏՕ-ի գագաթնաժողովի ներկայացուցիչների այդ սեմինարի հետ: Բայց չեմ էլ կարող մեկնաբանել, թե ինչ առաքելությամբ է Լավրովը ժամանել Բաքու:

«ԷԼԵԿՏՐԱԷՆԵՐԳԻԱՅԻ ԹԱՆԿԱՑՈՒՄԸ ՄԻԱՅՆ
ԸՆԴԴԻՄՈՒԹՅԱՆ ՀԱՐՑԸ ՉԷ»

-Երեկ ԱԺ-ում էլեկտրաէներգիայի թանկացման հարցով լսումներ էր, որտեղ բավական ակտիվ մասնակցում էին նաեւ ոչ իշխանական քառյակի ներկայացուցիչները: Ինչպե՞ս եք վերաբերվում նրան, որ իրենք թեպետ 12 կետից բաղկացած պահանջագիր էին ներկայացրել իշխանություններին, բայց այս հարցը սպրդել էր նրանց կետերից:
- Այդ արդեն իրենց պետք է հարցնեք, ես էլ մի կարճ ժամանակամիջոցում ներկա եղա այդ քննարկումներին: Իսկ թե ինչու այդ 12 կետում նրանք չեն մտցրել էլեկտրաէներգիայի թանկացման հարցը, կարող է դրանից հետո է եղել, կարող է, ինչպես դուք նկատեցիք, ուշադրությունից դուրս է մնացել, բայց իսկապես շատ բուռն քննարկումներ էին: էլեկտրաէներգիայի թանկացումը միայն ընդդիմության հարցը չէ: Ի՞նչ է, իշխանությունը կամ իշխանական պատգամավորները ոգեւորվա±ծ են այդ թանկացումներից: Համենայնդեպս, գոնե ինձ համար դա շատ ճնշող տպավորություն թողեց, որ կարծես թե մենք բոլորս միասին պաշտպանում ենք էլեկտրաէներգիա վաճառող այդ կազմակերպության շահերը:
- Օրինակ, ԱԺ ԲՀԿ խմբակցության պատգամավոր Միքայել Մելքումյանը խորհուրդ է տալիս ստեղծված իրավիճակում, գազի կամ հոսանքի փոխարեն, աթար վառել, Դուք ի՞նչ խորհուրդ կտաք մեր ազգաբնակչությանը:
- Կարծում եմ, որ Միքայել Մելքումյանի մասնագիտական որակները հերիքում են, որ նրա պատասխանը շատ մասնագիտական լինի, եւ դա ուղղակի կատակի ձեւով է ասվել:

«ԱՅԴ ՆՍՏԱՇՐՋԱՆՆԵՐՈՒՄ ՆՈՐ ՄԵՔԵՆԱ ՉԵՆՔ ՀՆԱՐՈՒՄ»

-Քանի որ արտահերթ նիստով գարնանային նստաշրջանն ավարտվում է, ամփոփելով` ինչպե՞ս կգնահատեք այս նստաշրջանի աշխատանքները` թե՛ իշխանության, թե՛ ընդդիմության:
- Նորմալ, բավարար: Բոլոր հարցերը, ինչ որ կա, մենք քննարկել ենք, պատասխանները կան: Արտահերթում էլ, կվերջացնենք մնացածը: Այնպես որ, նորմալ նստաշրջան էր: Այդ նստաշրջաններում նոր մեքենա չենք հնարում: Բնականոն աշխատանքի հետեւանքով ավարտել ենք գարնանային նստաշրջանը, կհանգստանանք եւ նոր լիցքավորված կգանք ու կսկսենք աշնանային նստաշրջանը: Բավականին օրենքներ ենք ընդունել, բավականին հետաքրքիր հարցեր ենք քննարկել:
- Իսկ ընդդիմությունը մի քիչ չշտապե՞ց արձակուրդ գնալու, որովհետեւ 12 կետեր ներկայացնելով իշխանությանը` ասաց, որ աշնանը հանրահավաք կանի:
- Դե, ընդդիմության պրոբլեմները ընդդիմության պրոբլեմն է, իսկ իշխանությանը` իշխանության: Հիմա իրենք կարող է արձակուրդ չգնան եւ աշխատեն այդ 12 կետերի շուրջը: Ես` կոնկրետ, արձակուրդ եմ գնալու:

ՀՐԱՆՏ ՍԱՐԱՖՅԱՆ