ՍԵՊ ԽՐԵԼՈՎ ՀԱՅ-ՌՈՒՍԱԿԱՆ ՀԱՐԱԲԵՐՈՒԹՅՈՒՆՆԵՐՈՒՄ` ԸՆԴԴԻՄՈՒԹՅՈՒՆԸ ՁԱՅՆԵՐ ՉԻ ՀԱՎԱՔԻ

ՍԵՊ ԽՐԵԼՈՎ ՀԱՅ-ՌՈՒՍԱԿԱՆ ՀԱՐԱԲԵՐՈՒԹՅՈՒՆՆԵՐՈՒՄ`
ԸՆԴԴԻՄՈՒԹՅՈՒՆԸ ՁԱՅՆԵՐ ՉԻ ՀԱՎԱՔԻ

Ազգային ժողովում այսօր տեղի ունեցավ ասուլիս` ՀՀ-ի եւ Ռուսաստանի Դաշնության Դաշնային ժողովի միջեւ համագործակցության միջխորհրդարանական հանձնաժողովի հայկական կողմի` հունիսի 4-6-ը Նիժնի Նովգորոդում կայացած հանդիպման մասին: Իշխանական ներկայացուցիչները ներկայացրին տեղի ունեցածը, ամփոփեցին հանձնաժողովի վերջին նիստի արդյունքները:
Պատվիրակության անդամների ցուցակում եղել են նաեւ ընդդիմադիր, ոչ իշխանական թեւի ներկայացուցիչներ, որոնք սակայն ասուլիսին չէին ներկայացել, իսկ թե ինչու, դա էլ հայտնի չէր: Ասուլիսի հիմնական բովանդակությունից զատ հնչեցին հարցեր, որոնք բացառապես վերաբերում էին օրերս ՀՀ ԱԺ-ում իր տեսակետը հայտնած, հայտնի ռուս լրագրող Դմիտրի Կիսիլյովին, ում մեկօրյա այցը Հայաստան շատ ավելի ուրախացրել ու ոգեւորել էր ընդդիմադիրներին եւ հակառուսական տրամադրություն ունեցողներին, քան` այլոց:
Սրա հետ կապված` ԱԺ ՀՀԿ խմբակցության պատգամավոր ՀԱՅԿ ԲԱԲՈՒԽԱՆՅԱՆԸ նշեց, որ. ՙԱյս երկու, երեք օրվա ընթացքում ինձ զանգահարում եւ մոտենում էին հարյուրավոր մարդիկ, ովքեր ասում էին, թե ում է  հարկավոր մասնավոր անձի մասնավոր թեման, կամ կարծիքը դարձնել հայ-ռուսական հակաքարոզչության առիթ: Իսկ հետո զարմանում են, թե ինչու է ընդդիմությունը նման կեցվածք ընդունել: Նաեւ ասում են, որ եթե պետք է ընդդիմությունը նման կերպ իրեն պահի, ապա ձայն չենք տա: Հայտնի է, որ վերջին տվյալներով` մեր ազգաբնակչության շուրջ 82 տոկոսը արտահայտվել է կողմ` ՄՄ-ին կամ Եվրասիական միությանը անդամագրվելու գործընթացին: Իսկ ընդդիմադիր մեր գործընկերները զարմանում են, թե ինչու է ՀՀԿ-ն շատ ձայն ստանում: Եթե ամեն առիթով ընդդիմությունը փորձում է հայ-ռուսական հարաբերությունները վերածել չգիտես ինչի, դրա համար մարդիկ իրենց ձայնը տալիս են ՀՀԿ-ին, քանի որ ՀՀԿ-ն կայուն ձեւով պահում է հայ-ռուսական հարաբերությունները, եւ ամեն առիթ չի կարելի դարձնել փոթորիկ մեկ գավաթ ջրում՚:
Ներկա լրագրողների այն դիտարկմանը, թե ինչու էր Կիսելյովը Ազգային ժողով ժամանել ՙՀամմեր՚ տեսակի ավտոմեքենայով, ասուլիսին մասնակից ԱԺ ՀՀԿ-ական պատգամավոր ԼԵՎՈՆ ՄԱՐՏԻՐՈՍՅԱՆՆ էլ, կես կատակ-կես լուրջ պատասխանեց. ՙԱսենք թե, գար ՙԶապորոժեցով՚, ի±նչ կփոխվեր դրանից՚:

ԱՐՄԵՆՈՒՀԻ ՀԱԿՈԲՅԱՆ