Մանկագիր. «ՄԱՅՐՍ ԻՆՁ ԵՎՍ ՄԵԿ ԿՅԱՆՔ ՆՎԻՐԵՑ» (Տեսանյութ)

Մանկագիր. «ՄԱՅՐՍ ԻՆՁ ԵՎՍ ՄԵԿ ԿՅԱՆՔ ՆՎԻՐԵՑ» (Տեսանյութ)

Այսօր լրագրող, մանկագիր ԳԱՅԱՆԵ ԴԱՆԻԵԼՅԱՆԸ ներկայացրեց իր հեղինակային` «Յուրկայի երազները», «Յուրկայի այբուբենը» խորագրով գիրքը: «Գիրքը սկսել եմ գրել տասը տարի առաջ` իմ առաջնեկի` Յուրայի համար: Այն ժամանակ նա նոր էր սովորում այբուբենը»,- ոգեւորված պատմում է Գ. Դանիելյանը` հավելելով, որ կիսատ է թողել ֆինանսի  բացակայության պատճառով:

«Գիրքն իմի բերեցի երեք տարի առաջ, երբ բժիշկներն ինձ մոտ չարորակ նորագոյացություն հայտնաբերեցին»,- ասում է Գայանեն, ով իր մեջ ուժ գտավ պայքարելու չարիքի դեմ: Ի դեպ, հեղինակի ե՛ւ բուժումը, ե՛ւ գրքի ֆինանսավորումը հոգացել է Գ. Դանիելյանի մայրը:  

«Իմ հեղինակային առաջին գիրքը նվիրվում է ոչ թե իմ որդուն` Յուրային, ով գրքիս հերոսն է, այլ մորս, ով ինձ եւս մեկ անգամ կյանք նվիրեց»,- ընդգծում է Գայանեն:

«Յուրկայի երազները», «Յուրկայի այբուբենը» գրքի պատասխանատու խմբագիր, «Այվազովսկու» բարեգործական միության նախագահ ՏԻԳՐԱՆ ՆԵՐՍԻՍՅԱՆԸ, խոսելով գրքի եւ հեղինակի մասին, ասաց, որ Գայանե Դանիելյանի հետ չորս տարի առաջ է ծանոթացել` բորտամսագրի խմբագրությունում: Իր իսկ խոսքերով` Գ. Դանիելյանը պրոֆեսիոնալ լրագրող է, մի շարք հետաքրքիր հոդվածների հեղինակ:  «Եկավ  մի պահ, երբ Գայանեի կյանքում ամեն ինչ փոխվեց: Բոլորդ էլ հասուն մարդիկ եք, գիտակցում եք, թե ինչ բան է նման հիվանդության հայտնաբերումը: Ինքս մասնագիտությամբ բժիշկ եմ: Առաջինը` ինչ փորձեցի անել` քաջալերել Գայանեին, քանի որ ե՛ւ նա, ե՛ւ իրեն ճանաչողները խուճապի մեջ էին»,- պատմում է պատասխանատու խմբագիրն ու հավելում, որ որոշ ժամանակ անց Գայանեն խմբագրություն ներկայացրեց իր ստեղծագործությունները` ցանկություն հայտնելով տեսնել սեփական ստեղծագործությունները գրքի էջերում:

«Մենք մեզ վրա վերցրեցինք տպագրական բոլոր աշխատանքները: Երկար փնտրտուքներից հետո գտանք նաեւ նկարչի, ով հանձն առավ պատկերազարդել գիրքը: Խոսքը Մարիամ Աղաջանյանի մասին է»,- նշեց Տ. Ներսիսյանը:

Լրագրողների հարցին, թե կշարունակի՞ արդյոք Գայանեն մանուկների համար ստեղծագործել, լրագրող- մանկագիրը ժպիտով արձագանքեց. «Ժամանակը ցույց կտա: Թեպետ, դստրիկս` Էլիզան, ցանկություն ունի` իր եղբոր` Յուրայի պես գրքի հերոս դառնալ: Ես էլ նրան խոստացել եմ, եւ արդեն կա նախնական գրքի վերնագիրը»:

Հավելենք, որ ս.թ. հունիսի 18-ին կկայանա Գ. Դանիելյանի գրքի շնորհանդեսը: Նշենք, որ գիրքն արդեն վաճառքում է. տպագրվել է 1000 օրինակով:

Նյութը, լուսանկարները, տեսանյութը` Վ. ՄՈՒՐԱԴՅԱՆԻ