ԱՄՓՈՓՎԵՑ ԱՐԱՄ ԽԱՉԱՏՐՅԱՆԻ ԱՆՎԱՆ 10-ՐԴ ՄՐՑՈՒՅԹԸ (Տեսանյութ)

ԱՄՓՈՓՎԵՑ ԱՐԱՄ ԽԱՉԱՏՐՅԱՆԻ ԱՆՎԱՆ 10-ՐԴ ՄՐՑՈՒՅԹԸ (Տեսանյութ)

Հունիսի 14-ին ամփոփվեց Երևանում (հունիսի 6-14-ը) անցկացվող Արամ Խաչատրյանի անվան 10-րդ հոբելյանական մրցույթը, որի արդյունքները հայտարարվեցին Գալա-համերգի ընթացքում: Չորրորդ տեղը զբաղեցրեց Ջիա Ռանը (Չինաստան), երրորդ տեղը բաժին հասավ Ստեփան Սիմոնյանին (Ռուսաստան) (Զրույցը՝ տեսանյութում), երկրորդ տեղը կիսեցին՝ Եվգենի Ստարոդուբցևն ու Անաստասիա Նեստերովան (Ռուսաստան) (Զրույցը՝ տեսանյութում): Առաջին տեղ այս տարի որևէ մասնակցի չտրվեց:

Եվգենի Ստարոդուբցևն արժանացավ նաև հատուկ մրցանակի ՝ «Հանդիսատեսի համակրանք» անվանակարգում (Զրույցը՝ տեսանյութում):

Գալա-համերգին հնչեց Արամ Խաչատրյանի դաշնամուրային կոնցերտը 2007թ-ից մրցույթի պաշտոնական նվագախումբ՝ Հայաստանի պետական երիտասարդական նվագախմբի (գեղարվեստական ղեկավար և գլխավոր դիրիժոր Սերգեյ Սմբատյան) ու մրցույթի երկրորդ տեղը կիսած մասնակիցների կատարմամբ:

«Իրավունքը» տեղեկացրել էր, որ այս տարի մրցույթի նախընտրական փուլը հաղթահարել էր 26 մասնակից՝ մի շարք երկրներից՝ ԱՄՆ-ից, Կանադայից, Ճապոնիայից, Լատվիայից, Թայվանից, Հարավային Կորեայից, Չինաստանից, Ռուսաստանից, Հայաստանից և այլ երկրներից:

Արամ Խաչատրյանի անվան միջազգային մրցույթը կյանքի է կոչվում՝ՀՀ մշակույթի նախարարության, «Արամ Խաչատրյան» մշակութային հիմնադրամի և Երևանի Կոմիտասի անվան պետական կոնսերվատորիայի համատեղ ջանքերի շնորհիվ:

Մրցույթը անցկացվում է ՀՀ առաջին տիկին Ռիտա Սարգսյանի բարձր հովանու ներքո, ով և միաժամանակ հանդիսանում է մրցույթի հոգաբարձուների խորհրդի պատվավոր նախագահը:

2010թ-ից մրցույթի գլխավոր գործընկերն է հանդիսանում ԱՊՀ անդամ երկրների հումանիտար համագործակցության միջպետական հիմնադրամը:

Նյութը, տեսանյութը և լուսանկարները՝ Վ. ՄՈՒՐԱԴՅԱՆԻ