ԳԹԿ-Ն ԽՆԴՐԱՆՔՆԵՐԸ ՉԻ ԲԱՎԱՐԱՐԵԼ

ԳԹԿ-Ն  ԽՆԴՐԱՆՔՆԵՐԸ ՉԻ ԲԱՎԱՐԱՐԵԼ

Բուհական ընդունելության քննությունները բուռն ընթացքի մեջ են: Եվ հասկանալի է, որ եթե խոսքը հայաստանյան քննությունների մասին է, ապա այստեղ հարցն առանց տարաբնույթ խոսք ու կռիվների չի վերջանա:
Այս տարի էլ բողոքները քիչ չեն, եւ այս նախնական ժամանակահատվածում սկսել են առանձնանալ նման դժգոհությունների որոշ կոնկրետ ուղղություններ, որոնք, անկեղծ ասած, անցած տարվա դժգոհություններից քիչ բանով են տարբերվում: Այսպես, բողոքների առաջին խումբը նախ վերաբերում է այն բանին, թե քննական հարցաշարերում ներառված են նաեւ հարցեր, որոնք չկան դպրոցական ծրագրերում:

Այսինքն, եթե դիմորդը կրկնուսույցների օգնությանը չի դիմել ժամանակին, ապա այդ հարցերին պատասխանելու հնարավորություն գործնականում չունի: Բողոքների հաջորդ խումբն այն մասին է, թե հանձնաժողովները ցածր են գնահատում, ինչը տանում է այն հետին մտքին, թե այդկերպ «անտեր» դիմորդների բալերը նվազեցնում են` «տերովների» համար ավելի լավ անցողունակություն ապահովելու նպատակով: Եվ վերջապես, տարածվում են նաեւ խոսակցություններ, թե պատկերն այս ամենի ճիշտ հակառակն է: Այսինքն, որ հանրապետությունում նկատելիորեն նվազել է դիմորդների թիվը, սրան ընդառաջ` բավականին թուլացվել են հարցաշարերը, որպեսզի նույնիսկ շատ թույլ դիմորդներն ընդունվելու, այսինքն` բուհական վճարովի տեղերը համալրելու հնարավորություն ունենան: Որ վերջին հաշվով, բուհերն էլ չզրկվեն համապատասխան եկամուտներից ու գոյատեւելու հնարավորություն ստանան: Թե դա ինչ կերպ կազդի մեր ապագա մասնագետների որակի վրա, դա արդեն հարցի մյուս կողմն է:
Իհարկե, այս բոլոր հարցերի շուրջ քննությունների ընթացքի հետ մեկտեղ խմորումները դեռ շատ կխորանան: Իսկ մինչ այդ, որոշ նախնական մեկնաբանություններ խնդրեցինք Գնահատման եւ թեստավորման կենտրոնի (ԳԹԿ) արտաքին համագործակցության բաժնի պետ ԱՐԱ ԻՍՊԻՐՅԱՆԻՑ:
Մեր զրուցակցի խոսքերով` հունիսի 6-ին հանրապետությունում անցկացված «Հայոց լեզու եւ գրականություն» առարկայի միասնական քննությանն այս տարի մասնակցել է 7 328 դիմորդ: Այդ առարկայից. «Քննության միջին միավորն այս տարի եղել է 13.24-ը: Անբավարար է ստացել դիմորդների 9.5 տոկոսը: Առավելագույն միավոր են ստացել 114 դիմորդ»:
Ա. Իսպիրյանի խոսքերով`«Հայոց լեզու եւ գրականություն» առարկայից բողոքարկման գործընթացը ավարտվել է ս.թ. հունիսի 12-ին` ժամը` 18:00-ին. «Ամեն քննական կենտրոնից 3-4 բողոքարկող ենք ունեցել: Հիմնական պատճառը` տեխնիկական խնդիրներն են եղել: Թեստերի հետ կապված որեւէ խնդիր չենք ունեցել, բողոքարկողներ` նույնպես»:
Ա. Իսպիրյանն ասաց նաեւ, որ անցյալ տարի «Հայոց լեզու եւ գրականություն» առարկայից միջին միավորը 13 է եղել:
ԳԹԿ արտաքին համագործակցության բաժնի պետը ամփոփեց նաեւ «Կենսաբանություն» առարկայից միասնական քննություն հանձնած դիմորդների միավորները: Քննական արդյունքները,  ըստ Ա. Իսպիրյանի, ի տարբերություն նախորդ տարվա նվազել են. «Քննության միջին միավորն այս տարի եղել է 11.14-ը. նախորդ տարվա համեմատ այն բավական ցածր արդյունք է, քանի որ անցած տարի միջին միավորն այս առարկայից եղել է 14: «Կենսաբանություն» առարկայից անբավարար են ստացել դիմորդների 24%-ը»:
Ա. Իսպիրյանը նշեց նաեւ, որ «Կենսաբանություն» առարկայից 43 բողոքարկում է եղել` վերահաշվարկի հետ կապված: «14 խնդրանք ենք ունեցել, թե հիվանդության պատճառով վատ են գրել, բայց այդ խնդրանքները չեն բավարարվել, քանի որ բժշկի դիմորդները չեն դիմել»,- եզրափակեց մեր զրուցակիցը:

Վ. ՄՈՒՐԱԴՅԱՆ