ԳՅՈՒՂՆԱԽԱՐԱՐԸ ԴԵՌ ՔԱՌՅԱԿԻ ԵՐԿՈՒ ԿԵՏԻ ՊԱՏԱՍԽԱՆԸ ՉԻ ԳՏԵԼ

ԳՅՈՒՂՆԱԽԱՐԱՐԸ ԴԵՌ ՔԱՌՅԱԿԻ ԵՐԿՈՒ ԿԵՏԻ ՊԱՏԱՍԽԱՆԸ ՉԻ ԳՏԵԼ

Շաբաթվա թերեւս ամենածեծված թեման ոչ իշխանական քառյակի հրապարակած 12 կետերն էին, որոնք վերջիններս պահանջում են իշխանություններից: Հատկանշական է այն, որ այդ կետերից երկուսը վերաբերում են գյուղատնտեսության ոլորտին, մասնավորապես` դրանցում ասված է, որ առնվազն պետք է կրկնապատկել գյուղմթերքների արտադրության, ոռոգման ջրի եւ վարկերի համար տրամադրվող սուբսիդիաների ծավալները, ինչպես նաեւ գյուղատնտեսությունում տրված արտարժութային վարկերը դրամայինի վերածելուն: Հունիսի 11-ին Ազգային ժողովում կառավարության հետ հարց ու պատասխանից հետո, «Իրավունքը» եւս անգամ դիմեց ՀՀ գյուղատնտեսության նախարար ՍԵՐԳՈ ԿԱՐԱՊԵՏՅԱՆԻՆ` պարզելու համար, թե մինչեւ աշուն արդյո՞ք հնարավոր է քառյակի առաջադրած խնդիրներին լուծում տալ, եւ ի՞նչ է մտածում այս հարցերի շուրջ նախարարությունը: Սակայն հարցին ի պատասխան` պարոն նախարարը նշեց.

- Այսօր երեկոյան կքննարկենք, երեւի առաջիկայում Ձեզ կասենք:

- Պարոն նախարար, այնուամենայնիվ, այս առաջարկները իրատեսական համարո՞ւմ եք:

- Հիմա չեմ կարող ասել, մինչեւ մանրամասն չքննարկենք, ոչինչ չեմ կարող ասել:

Այս ամենից հետո չենք կարող չարձանագրել, որ գյուղնախարարի սպանիչ զգուշավորությունը, պարզապես զավեշտի է վերածվում: Չէ՞ որ քառյակն իր 12 կետերը մշակեց` 4 ժամ փակվելով "Ժառանգություն" խմբակցությունում, մինչդեռ այդ 12 կետերից երկուսի շուրջ գնահատական տալու համար Գյուղնախարարությանը պահանջվեց մինիմում 48 ժամ:

ՀՐԱՆՏ ՍԱՐԱՖՅԱՆ