ՙՀՀ ՆԱԽԱԳԱՀԸ ՃԻՇՏ Է ԱՐԵԼ` ՉՊԱՏԱՍԽԱՆԵԼՈՎ ՆԱԶԱՐԲԱԵՎԻՆ՚

ՙՀՀ ՆԱԽԱԳԱՀԸ ՃԻՇՏ Է ԱՐԵԼ`
ՉՊԱՏԱՍԽԱՆԵԼՈՎ ՆԱԶԱՐԲԱԵՎԻՆ՚

Երեկ հրապարակված ոչ իշխանական քառյակի վերջին կետը նման է ՙհաթաթայի՚, որում մասնավորապես ասված է. ՙՉստորագրել որեւէ միջազգային համաձայնագիր, որով Հայաստանի եւ ԼՂՀ-ի միջեւ կնախատեսվի հաստատված հարաբերությունների, ներառյալ միասնական տնտեսական ռեժիմի փոփոխություն՚: Մեկնաբանելով սույն կետը` երեկ մամլո ասուլիսի ժամանակ ԱԺ ՀԱԿ խմբակցության ղեկավար ԼԵՎՈՆ ԶՈՒՐԱԲՅԱՆԸ նշեց. ՙԵթե Աստանայում Սերժ Սարգսյանը հիմնավորված պատասխան տար Նազարբաեւին եւ մյուս նախագահներին, միգուցե սրա անհրաժեշտությունը չէր լինում, բայց երբ մենք տեսանք Աստանայում, որ Հայաստանը ներկայացնում է մի նախագահ, որ ծպտուն անգամ չի կարողանում հանել ԼՂՀ ժողովրդի եւ Հայաստանի շահերի պաշտպանության համար, մեզ մոտ, բնականաբար, առաջացել է անհանգստություն, եւ այս կետը դրա արտահայտությունն է՚:
Այս եւ քառյակի այլ ներկայացուցիչների հնչեցրած մեղադրանքների շուրջ, թե պետք էր տեղում Ղազախստանի նախագահ Նազարբաեւին պատասխան տրվեր, ՙԻրավունքը՚ զրուցեց ԱԺ ՀՀԿ խմբակցության պատգամավոր ԼԵՌՆԻԿ ԱԼԵՔՍԱՆՅԱՆԻ հետ.
- Դիվանագիտության մեջ վիճաբանությունները, պատասխանները այլ կերպ պետք է դիտարկել: Երբեմն չասված խոսքերը գործով ցույց տալը ավելի մեծ ազդեցություն է թողնում դիվանագիտության մեջ: Ես համոզված եմ, որ ավելորդ էր պատասխանը: Նազարբաեւն ասել է այն, ինչ-որ իր երկրի շահերից է բխում եւ քաղաքականությունից: Կարծում եմ` ՀՀ նախագահի հետագա գործողություններից կզգացվի, որ ճիշտ է արել` չպատասխանելով Նազարբաեւին: Որոշ ժամանակ հետո մենք այս ամենի հետեւանքները կտեսնենք եւ կհասկանանք, որ պատասխանելը գուցե վնաս տար ավելի, քան` օգուտ:

ՀՐԱՆՏ ՍԱՐԱՖՅԱՆ