ՍՏԱՎԱՆԳԵՐՈՒՄ ՀԱՋՈՂՈՒԹՅՈՒՆՆ ԱՐՈՆՅԱՆԻՑ ԵՐԵՍ Է ԹԵՔԵԼ

ՍՏԱՎԱՆԳԵՐՈՒՄ ՀԱՋՈՂՈՒԹՅՈՒՆՆ
ԱՐՈՆՅԱՆԻՑ ԵՐԵՍ Է ԹԵՔԵԼ

Ֆիդեի առաջին եւ երկրորդ համարների` Մագնուս Կարլսենի եւ Լեւոն Արոնյանի պայքարը մշտապես մարզաձեւի սիրահարների ուշադրության կենտոնում է: Եվ ահա հերթական դիմակայությունը` Նորվեգիայի Ստավանգեր քաղաքում շարունակվող շախմատային սուպերմրցաշարի հինգերորդ տուրի կենտրոնական` Մագնուս Կարլսեն-Լեւոն Արոնյան պարտիան ավարտվեց նորվեգացի գրոսմայստերի հաղթանակով:
Մոտ 6.5 ժամ տեւած պայքարը ավարտվեց 93-րդ քայլում, Լեւոն Արոնյանը անհասկանալի կերպով ձեռքից բաց թողեց հաղթանակը: Սա այն դեպքերից էր, երբ հաղթանակը գրեթե ապահովված էր, եւ դժվար էր պատկերացնել, որ Արոնյանը կարող է մի անփույթ քայլով պարտվել նման սկզբունքային պայքարում, երբ հաղթանակն այդքան մոտ էր: Ինչեւէ, Արոնյանի անհաշվենկատ քայլի արդյունքում Կարլսենը վաստակեց 3 միավոր եւ այժմ Կարուանայի հետ կիսում է երկրորդ տեղը: Իսկ ահա հայ գրոսմայստերի վերջին շրջանի ելույթներն ու ցուցադրած արդյունքները թերեւս մտահոգության տեղիք են տալիս: Ինչեւէ, հիշեցնենք, որ սուպերմրցաշարի նախորդ տուրերում Արոնյանը նախ առաջին տուրում սպիտակներով ոչ-ոքի էր խաղացել նորվեգացի Սիմեն Ադգեստեյնի հետ, ապա մրցաշարի երկրորդ տուրում սպիտակներով առավելության էր հասել Սերգեյ Կարյակինի նկատմամբ: Երրորդ տուրում Հայաստանի հավաքականի առաջատարը սեւերով մրցել էր ռուսաստանցի Ալեքսանդր Գրիշչուկի հետ եւ 40-րդ քայլում ընդունել պարտությունը, իսկ չորրորդ տուրում հայ գրոսմայստերը սպիտակներով միավորը կիսել էր ռուսաստանցի Պյոտր Սվիդլերի հետ: Այսպիսով, հինգ տուրերի ընթացքում Լեւոն Արոնյանը տոնել է միայն մեկ հաղթանակ, իր ակտիվում ունի ընդամենը 2 միավոր: 2.5-ական միավոր ունեն Կարյակինը, Գիրին, Գրիշչուկը եւ Ագդեստեյնը: Կարլսենը եւ Ֆաբիանո Կարուանան, ինչպես նշեցինք, վաստակել են 3-ական միավոր եւ զբաղեցնում են մրցաշարային աղյուսակի երրորդ հորիզոնականը: Իսկ մրցաշարային աղյուսակը միանձնյա գլխավորում է Վլադիմիր Կրամնիկը, որն առավելության հասավ Ֆաբիանո Կարուանայի նկատմամբ եւ վաստակեց 3.5 միավոր:

ՔՐԻՍՏԻՆԵ ՊԵՏՐՈՍՅԱՆ