«ՉԿԱ ՄԻ ԿՈՄՊՈԶԻՏՈՐ, ՈՎ ԻՄ ՈՒԶԱԾ ԵՐԳԸ ԳՐԻ» (+Տեսահոլովակ)

«ՉԿԱ ՄԻ ԿՈՄՊՈԶԻՏՈՐ, ՈՎ ԻՄ ՈՒԶԱԾ ԵՐԳԸ ԳՐԻ» (+Տեսահոլովակ)

ՎԱԽԹԱՆԳ ԿԻԿԱԲԻՁԵՆ կրկին Երեւանում է: Այս անգամ` հոբելյանական համերգով: Գ. Սունդուկյանի անվան ազգային ակադեմիական թատրոնի բեմում բոլոր ժամանակների լեգենդար արտիստը երեկ ներկայացավ իր հին ու նոր երգերով: Ի դեպ, նոր երգերի հեղինակը հենց ինքն է` Վ. Կիկաբիձեն: «Այն մարդիկ, ովքեր ինձ համար երգեր էին գրում, այսօր այստեղ չեն… Այսօր, ցավոք, չկա մի կոմպոզիտոր, ով իմ ուզած երգը գրի: Այն, ինչ գրում են, ինձ դուր չի գալիս»,- շեշտեց բանախոսը` հավելելով, որ ստիպված ինքն է ստեղծագործում ու երգում այնպիսի երգեր, որոնք մոտ են իր սրտին:

Խոսելով կինոարտադրության մասին, Վ. Կիկաբիձեն փաստեց, թեպետ, հրավերներ կան եւ ինքն էլ մի քանիսին համաձայնել ու նկարվել է, սակայն, այստեղ էլ իրեն որեւէ բան չի ոգեւորում:

Կիկաբիձեին դուր չեն գալիս նաեւ սերիալները: «Շատ արագ պատրաստվող արտադրություն է: Երբեք չգիտեն, թե ինչ զարգացում է ունենալու իրենց սերիալը, քանի որ սցենարը ծնվում է մեկ օրում, եւ դա ինձ դուր չի գալիս»:

Ասուլիսի ընթացքում Վ. Կիկաբիձեն ընդգծեց, որ այսօր չկան, օրինակ` Մհեր Մկրտչյանի նման անհատականություններ: Իր իսկ խոսքով, նման անհատականություններ հազարից մեկ են ծնվում: «Մկրտչյանը շատ հումորով մարդ էր, սակայն նրա աչքերը միշտ թախծոտ էին: Եվ պատճառը` ճակատագիրն էր»:

Կիկաբիձեն լրագրողներին ասաց նաեւ, որ շուտով տպագրության կհանձնի իր կողմից հեղինակած գիրքը: Այն արվեստագետի փոխանցմամբ` ինքնակենսագրական բնույթ ունի, ինչն այնքան էլ իր սրտով չէ. Կիկաբիձեն չի սիրում նման ժանրի գրքեր: «Ի սկզբանե, գիրքը պետք է կոչվեր «Լիցո կավկազկոյ նացիոնալնոստի», սակայն հետո որոշեցի փոխել անվանումը, քանի որ մի տեսակ այն կոպիտ ու ինչ-որ տեղ վիրավորական էր հնչում, իսկ ես որեւէ մեկին չէի ցանկանա նեղացրած լինել: Գիրքը լույս կտեսնի «Նրանք» անվամբ: Այստեղ կան ե′ւ հայեր, ե′ւ վրացիներ, ե′ւ իտալացիներ… Մի խոսքով, տարբեր ազգություններ ներկայացնող անձինք»:

75-ամյա երգիչ-դերասանն ասաց, որ շատ է սիրում իր մասնագիտությունն ու բեմը, առանց որի չի պատկերացնում իր գոյությունը: 75-ից հետո, Կիկաբիձեի խոսքերով` մարդ չի կարող իմանալ, թե ինչ առողջական վիճակում կարող է գտնվել: Այդ իսկ պատճառով շրջագայությունների է մեկնում ու համերգներ տալիս. «Գիտե՞ք, շատ եմ սիրում իմ մասնագիտությունը, բեմը: Երազում էի դառնալ գեղանկարիչ: Ես շատ ընկերներ ունեմ այդ ոլորտում: Սակայն մայրս դեմ էր, որ ես գեղանկարիչ դառնամ. մենք փոքր տան մեջ էինք ապրում»:
Կիկաբիձեն հավելեց, որ համերգներով եղել է Ղազախստանում, Իսրայելում… Հայերի կողմից հրավերը ստանալով, սիրով է արձագանքել, թեպետ, ոչ այնքան հեռու անցյալում է գտնվել Երեւանում ու շփվել հայ հանդիսատեսի հետ:
Նշենք, որ Կիկաբիձեն իր հոբելյանական համերգներին ներկայանում է իր զարմուհու` Լիզա Բագրատիոնիի հետ: Վերջինս վրացական էստրադայի նոր, բայց արդեն սիրված երգչուհիներից է:

ՎԼԱԴ ՄՈՒՐԱԴՅԱՆ