ԸՆԴԴԻՄԱԴԻՐՆԵՐԸ ՃՈԽ ՆՎԵՐՆԵՐԻ ԱԿՆԿԱԼԻՔՈՎ

ԸՆԴԴԻՄԱԴԻՐՆԵՐԸ ՃՈԽ ՆՎԵՐՆԵՐԻ ԱԿՆԿԱԼԻՔՈՎ

ՀԱԿ-ի ու ԲՀԿ-ի կողմից տարածված համատեղ հայտարարության համաձայն, մայիսի 20-ին տեղի է ունեցել Գագիկ Ծառուկյան-Լևոն Տեր-Պետրոսյան հանդիպումը, որի ընթացքում վերջիններս քննարկել են իրենց համագործակցությանը վերաբերվող հարցեր: Նշված հայտարարության մեջ այս անակնկալ-հանդիպման մասին այլ տեղեկությունններ (նույնիսկ հանդիպման վայրի վերաբերյալ) չի նշվում, ինչի պատճառով էլ որոշեցինք փոքրիկ լրագրողական հետաքննություն անցկացնել և պարզել որոշ մանրամասներ:

Նախ, ինչպես փոխանցում են ՀԱԿ-ի մեր աղբյուրները, հանդիպումը կայացել է Գագիկ Ծառուկյանին պատկանող <Նոյ> կոնյակի գործարանում, որի բակում Լ. Տեր-Պետրոսյանին  դիմավորել է անձամբ Գ.Ծառուկյանը: ԲՀԿ ղեկավարին ևս մեկ անգամ հյուրընկալվելու ցանկությունը հայտնել է հենց Լևոն Տեր-Պետրոսյանը, քանզի տպավորված է եղել Առինջի այգիներում նախորդ ընդունելության ավարտական մասով: Ինչպես հայտնի է, Գ.Ծառուկյանը սովորություն ունի իր հյուրերին չճանապարհել <<դատարկ ձեռքով>>, ինչից էլ նախորդ անգամ այդքան տպավորվել էր Լ.Տեր-Պետրոսյանը` իր հետ տանելով մի քանի արկղ թանկարժեք կոնյակ: Ականատեսների վկայությամբ, այս անգամ ԲՀԿ ղեկավարը ՀԱԿ-ի առաջնորդին զարմացրել է ավելի ճոխ նվերներով. թանկարժեք կոնյակը ոչ թե շշերով, այլ ոսկեզօծ տակառիկներով է եղել, դրանից բացի եղել են բազմաթիվ այլ նվերներ, որոնք  կոնյակի գործարանի աշխատակիցները <<բարձել>> են Լ.Տեր-Պետրոսյանի մեքենան:

Ասում են, իմանալով Լ.Տեր-Պետրոսյանին ցուցաբերված հյուրընկալության մասին, թանկարժեք նվերների (հատկապես խմիչքի) մեծ սիրահար Րաֆֆի Հովհաննիսյանը ցանկություն է հայտնել հանդիպել Գագիկ Ծառուկյանի հետ` ակնարկելով, որ դեմ չի լինի, եթե իրենց հանդիպումը նույնպես կայանա կոնյակի գործարանում: Սակայն քիչ հավանական է, որ Հովհաննիսյանին ճանապարհեն նույն ճոխությամբ, ինչ Լ.Տեր-Պետրոսյանին, որովհետև չնայած նրան, որ երկուսն էլ <<քառյակի>> անդամ կուսակցության ղեկավարներ են, բայց միևնույն է` նրանց <<կալիբրները>> տարբեր են: Գուցեեւ, Ր. Հովհաննիսյանն իզուր չի հենց այդպիսի ընդունելության ակնկալիքով նախատեսվածից շուտ վերադարձել ԱՄՆ-ից: Նաև ասում են, որ կոնյակի գործարանում հաճախակի հյուրերի թվում են նաև ՀՅԴ ղեկավար կազմի ներկայացուցիչները:

Այսքանից հետո պարզ է դառնում, թե իրականում ի?նչ արժեք ունեն ընդդիմադիր կեցվածք ընդունած կուսակցապետերը: Փաստորեն, Գ.Ծառուկյանի առատաձեռնությունն է այն խիստ <<ծանրակշիռ>> հանգամանքը, որ քաղաքական գործունեության տասնամյակների փորձառություն ունեցող և պետական ամենաբարձր պաշտոններ զբաղեցրած անձանց բերում է կոնյակի գործարան: