ՀՅՈՒՍԻՍ-ՀԱՐԱՎ ԱՎՏՈՃԱՆԱՊԱՐՀԸ ԿՌՎԱԽՆՁՈՐ Է ԴԱՐՁԵԼ ԱԺ-ՈՒՄ

ՀՅՈՒՍԻՍ-ՀԱՐԱՎ ԱՎՏՈՃԱՆԱՊԱՐՀԸ ԿՌՎԱԽՆՁՈՐ Է ԴԱՐՁԵԼ ԱԺ-ՈՒՄ

Այսօր հյուսի-հարավ ճանապարհի համար վարկ վերցնելու կապակցությամբ, ԱԺ-ում քննարկումների ժամանակ պատգամավոր Նիկոլ Փաշինյանը հայտարարեց, որ ճանապարհի վրա ծախսվող գումարները դարձել էին ներիշխանական պայքարի ալիք տրանսպորտի նախարար՝ Գագիկ Բեգլարյանի եւ Սերժ Սարգսյանի փեսա՝ Միքայել Մինասյանի միջեւ, որի արդյունքում հաղթեց նախարարի թիմը, որը հեռացրեց Մ. Մինասյանի թիմի ներկայացուցչին ծրագրի իրականացման տնօրեին պաշտոնից:

Նույն թեմայով ելույթ ունեցավ ԲՀԿ քարտուղար Նաիր Զոհրաբյանը եւ հայտարարեց, որ դեմ են քվեարկելու ծրագրին, քանի որ Հայաստանի արտաքին պարտքը մոտենում է հինգ միլիարդ դոլարի:

Իսկ ՀԱԿ պատգամավոր Հրանտ Բագրատյանը նշեց, որ իմաստ չի տեսնում կառուցել նոր ճանապարհ Երեւանի եւ Արտաշատի միջեւ, քանի որ հին ճանապարհը թեեւ իդեալական չէր, բայց առաջին կարգի ճանապարհն էր եւ ճանապարաշինարարություն պետք էր իրականացնել այլ վայրերում:

Պատգամավոր Խոսրով Հարությունյանն էլ իր ելույթում ավելացրեց, որ այս ծրագրի իրականացման ընթացքում հայտնաբերվել են լուրջ խախտումներ, իսկ կապի փոխնախարարը նշեց, որ ճանապարաշինարարական իսպանական ընկերությունը թույլ է տվել որակի բացթողումներ:

Հարցի վերաբերյալ ելույթ ունեցավ նաեւ ՀՀԿ-ական պատգամավոր Սամվել Ֆարմանյանը, որը խոսեց որոշ մարդկանց մոտ կոնսպիրոլոգիական հիվանդագին շեղումներից, որոնք վկայում են ֆոբիաների մասին: Պարոն Ֆարմանյանի հայացքը ուղղված էր Նիկոլ Փաշինյանի նստատեղին, ինչը նշնակում էր, որ նա պատասխանում էր վերոնշյալ դատողություններին:

ԱՐՄԵՆՈՒՀԻ ՀԱԿՈԲՅԱՆ