Արագած Ախոյան. «ՉԵՄ ԿԱՐԾՈՒՄ, ՈՐ ԿԻՐՈՅԻ ՏԵՍԱԿԵՏԸ ՀԱՄԱՊԱՏԱՍԽԱՆՈՒՄ Է ԴԱՇՆԱԿՑՈՒԹՅԱՆ ՏԵՍԱԿԵՏԻՆ»

Արագած Ախոյան. «ՉԵՄ ԿԱՐԾՈՒՄ, ՈՐ ԿԻՐՈՅԻ ՏԵՍԱԿԵՏԸ ՀԱՄԱՊԱՏԱՍԽԱՆՈՒՄ Է ԴԱՇՆԱԿՑՈՒԹՅԱՆ ՏԵՍԱԿԵՏԻՆ»

Օրերս ՀՅԴ բյուրոյի Հայ դատի եւ քաղաքական հարցերի գրասենյակի պատասխանատու Կիրո Մանոյանը հեռուստատեսությամբ անդրադառնալով Արեւմտահայոց ազգային համագումարի խորհրդի գործունեությանը` նշել էր, թե իբր Արեւմտահայոց խորհուրդը «կուլ է տվել թուքական խայծը» եւ Թուրքիայի իշխանություններից քաղաքացիություն խնդրել: Ի պատասխան այս հայտարարության ԱԺ ԲՀԿ խմբակցության պատգամավոր, Արեւմտահայոց ազգային համագումարի ազգային խորհրդի (ՀՀ-ի) լիազոր ներկայացուցիչ Արագած Ախոյանը «Իրավունքի» հետ զրույցում նշել էր. «Մի ասացվածք կա` «մի գիժ քարը գցեց ձորը, հազար խելոք հավաքվեցին, չկարողացան հանեն», հիմա Կիրոյինն է: Առանց ուսումնասիրելու, մակերեսորեն տեղեկացված լինելով ինչ-որ գործառույթներից` բացարձակ ստահոդ հայտարարություն արեց հեռուստատեսությամբ: Դա չի համապատասխանում իրականությանը, եւ ես ստիպված եղա պատասխանել: Իհարկե, պատասխանը շատ կոշտ ստացվեց, բայց ցավում եմ, որ ավելի մեղմ է ստացվել, որովհետեւ իսկապես վերջիվերջո պիտի հասկանա, որ տվյալ ուղղությամբ աշխատանքը մենաշնորհ չէ»: Ի վերջո, թե ի՞նչ գործառույթներ է իրականացնում Արեւմտահայոց ազգային համագումարը եւ ինչո՞վ էր պայմանավորված ԲՀԿ-ական եւ ՀՅԴ-ական քաղաքական գործիչների այս խոսքային փոխհրաձգությունը, «Իրավունքը» հետաքրքրվեց ԱԺ ԲՀԿ խմբակցության պատգամավոր ԱՐԱԳԱԾ ԱԽՈՅԱՆԻՑ.

- Արեւմտահայոց ազգային խորհուրդը ունի հստակ հայեցակարգ, հստակ ճանապարհ անցնելու ուղի եւ գաղափարախոսություն: Ում հետաքրքիր է, ես հայտարարում եմ` կարող է գալ, համագործակցել, միանալ կամ թեկուզ համախոհ դառնալ: Տարբեր դարաշրջաններում գոյություն ունեն տարբեր մարտահրավերներ եւ ռազմավարություն: Այսօրվա ռազմավարությունը չի կարող լինել միջնադարյան կամ թեկուզ 50 տարի առաջվա ռազմավարություն: Այլ այսօր լրիվ ուրիշ մարտահրավերներ կան աշխարհում, ուրիշ գեոպոլիտիկա կա, որից հարկավոր է օգտվել: Եվ միայն սահմանը փակել` ավելի ապահով զգալու համար, պատկերացնո՞ւմ եք մենք ինչ ենք անում: Այդ ատելության մաղձը, զոհի կարգավիճակը մեզ խեղդել է եւ մենք բավարարվում ենք նրանով, որ մեր սահմանները ընդամենը պինդ պահենք, պատերը բարձր շարենք ու մեզ ապահով զգանք: Ո՛չ, այդպիսին չէ այսօրվա քաղաքականությունը, այդ պատն ինչքան թափանցիկ լինի, ինչքան թշնամուդ տեսնես, թե ինչ է պատրաստում անել եւ ինչ է մտածում, այնքան հեշտ կլինի: Մինչդեռ մեր մասնագետները, թուրքագետները, քաղաքագետները հաճախ ուղղակի սարքել են հրեշ թուրքական դիվանագիտությանը եւ բավարարվում են նրանով, թե դե լավ, թուրքական դիվանագիտության դեմ խաղ չկա: Խաղ չկա, որովհետեւ մենք ենք անգործ: Մի հատ տեսեք հայից ինտելեկտով ու խելացի ազգ կա՞, որ հավաքվենք, կարողանանք մեր ուժերը կենտրոնացնել շատ հզոր կլինենք: Մենք այսօր հստակ առանց վախենալու, համարձակորեն կարողանում ենք մեր պահանջները, իհարկե, լուրջ ուսումնասիրություններ կատարելուց հետո, թուրքական իշխանություններին ներկայացնել: Մենք ունենք, օրինակ, այն բոլոր ուսումնասիրությունները, թե այս 100 տարվա ընթացքում սահմանադրության քանի կետի խախտմամբ եւ իրավունքների քանի ոտնահարմամբ` թուրքական օրենք խախտած որոշումներ են կայացվել հայ ազգի նկատմամբ: Եվ այդ բոլորը դնելու ենք թուրքական իշխանությունների առաջ: Տեսնենք  միջազգային ատյաններում ի՞նչ պատասխան են տալու, իսկ ապսուրդ, վիրտուալ մանկական երազներ տեսնելով` միայն տանկի վրա, միայն թրով, թուրքը թշնամի է եւ վերջ… այդ ձեւով երկար ճանապարհ չենք անցնի:

- Պարոն Ախոյան, ի վերջո, Դաշնակցության նման ստեր տարածելը, ինչո՞վ էր պայմանավորված:

- Չեմ կարծում, որ Կիրոյի տեսակետը համապատասխանում է դաշնակցության տեսակետին: Դաշնակցությունն ինձ համար լուրջ կուսակցություն է: Դաշնակցության շնորհիվ հայ ազգը 100 տարի արտասահմանում կարողացավ ե՛ւ գիտությունը, ե՛ւ կրթությունը, ե՛ւ լեզուն ու մշակույթը պահել, պահպանել: Ինչու ոչ, Հայ դատի կատարած աշխատանքի շնորհիվ Հայոց հարցը հասանելի դարձավ  ամբողջ աշխարհին: Թող ներող լինեն մնացածը, բայց այս ամենը հիմնականում իրենց շնորհիվ է: Ես խորին հարգանքով եմ մոտենում Դաշնակցությանը եւ չեմ կարծում, որ այս մեր, կոպիտ ասած, «փոխհրաձգությունը» կապված է Արեւմտահայոց ազգային համագումարի կամ Դաշնակցության հետ: Ուղղակի, ես` որպես Փարիզյան մեր գրասենյակի լիազոր ներկայացուցիչ, ստիպված էի պատասխանել, որպեսզի հասկանան, որ չի կարելի, հարկավոր է հարգանքով մոտենալ, էլի եմ ասում` հարկավոր է  ուժերը կենտրոնացնել մեկ ուղղությամբ:

ՀՐԱՆՏ ՍԱՐԱՖՅԱՆ