ԱՐԱՄ ԽԱՉԱՏՐՅԱՆԻ ԱՆՎԱՆ ՄՐՑՈՒՅԹԻ ՄԵԿՆԱՐԿԸ ՏՐՎԱԾ Է (+Տեսանյութ)

ԱՐԱՄ ԽԱՉԱՏՐՅԱՆԻ ԱՆՎԱՆ ՄՐՑՈՒՅԹԻ ՄԵԿՆԱՐԿԸ ՏՐՎԱԾ Է (+Տեսանյութ)

Այսօր` հունիսի 6-ին`Արամ Խաչատրյան համերգասրահում, կայացավ Արամ Խաչատրյանի անվան միջազգային 10-րդ հոբելյանական մրցույթի բացման արարողությունը: Այդ մասին «Իրավունքը» տեղեկացրել էր: Երեկոյի ընթացքում ելույթ ունեցավ 2007թ-ից մրցույթի պաշտոնական նվագախումբ՝ Հայաստանի պետական երիտասարդական նվագախումբը (գեղարվեստական ղեկավար եւ գլխավոր դիրիժոր Սերգեյ Սմբատյան) եւ բազմաթիվ միջազգային մրցույթների դափնեկիր, Արամ Խաչատրյանի անվան դաշնակահարների միջազգային մրցույթի ժյուրիի նախագահ Արմեն Բաբախանյանը: Համերգի ընթացքում (պարզապես փայլուն) հնչեց Արամ Խաչատրյանի դաշնամուրի կոնցերտը (մենակատար` Արմեն Բաբախանյան):

Համերգի սկզբին դաշնակահարն` ողջունելով մասնակիցներին եւ ժյուրիի անդամներին, ասաց, որ ժյուրիի կազմը համալրել են փայլուն մասնագետներ, որոնք ոչ միայն լավ երաժիշտներ են, այլ նաեւ լավ մենեջերներ եւ պրոդյուսերներ:

Պարոն Բաբախանյանն ընդգծեց, որ այս տարի ծրագրային փոփոխություններ են տեղի ունեցել. ստեղծագործության ազատ ընտրության հնարավորություն է տրվել, ինչը, ըստ նրա, մասնակիցներին հնարավորություն կտա իրենց լավագույնս դրսեւորվել:

Դաշնակահարը նաեւ շեշտեց, որ բավական լուրջ մրցանակներ են նախատեսված մրցույթի հաղթողներին: Նկատի ունի, ֆինանսական մրցանակները:

Նշենք, որ այս տարի մրցույթի նախընտրական փուլը հաղթահարել են 26 մասնակից` ԱՄՆ-ից, Կանադայից, Ճապոնիայից, Լատվիայից, Թայվանից, Հարավային Կորեայից, Չինաստանից, Ռուսաստանից, Հայաստանից եւ այլ երկրներից:

Նյութը, լուսանկարը եւ տեսանյութը`Վ.ՄՈՒՐԱԴՅԱՆԻ