ԼԱՅՆ ՀՆԱՐԱՎՈՐՈՒԹՅՈՒՆՆԵՐ ԳՈՐԾԱՐԱՐ ԱՇԽԱՐՀԻ ՀԱՄԱՐ

ԼԱՅՆ ՀՆԱՐԱՎՈՐՈՒԹՅՈՒՆՆԵՐ ԳՈՐԾԱՐԱՐ ԱՇԽԱՐՀԻ ՀԱՄԱՐ

Այսօր «Ռուսհամագործակցության» հայաստանյան ներկայացուցչության շենքում տեղի ունեցավ Տնտեսական զարգացման բիզնես կենտրոնի կազմակերպած բիզնես-կոնֆերանսը` «Ձեռներեցության աջակցման և զարգացման միջազգային ծրագրի» շրջանակներում: Կոնֆերանսին մասնակցում էին Հայաստանի տնտեսական զարգացման բիզնես կենտրոնի տնօրեն Վանուհի Սերովան, «Ռուսհամագործակցության» դաշնային գործակալության հայաստանյան գրասենյակի ղեկավար Մարկ Կալինինը, ԱՊՀ երկրների տնտեսական զարգացման բիզնես կենտրոնի ներկայացուցիչ Վալերի Միգիրովը: Հավաքի նպատակն էր անդրադառնալ հայ-ռուսական բիզնես հարաբերություններին, համագործակցության նոր սահմանների մասին խոսել, ինչպես նաև Մաքսային միությանը Հայաստանի անդամագրումը դիտարկել որպես տնտեսության զարգացման նոր հարթակ: Հայաստանյան ներկայացուցիչը մեզ հետ զրույցում խոսելով կոնֆերանսի կարևորության մասին, նշեց, որ իրենց կազմակերպությունը հարթակ է գործարարների համար՝  նրանց արտադրանքը ներկայացնելու թե՛ ներքին, թե՛ միջազգային շուկայում: Կենտրոնն իրականացնում է ձեռներեցության աջակցման և զարգացման միջազգային ծրագիր, որը փոքր բիզնեսին հնարավորություն է ընձեռում գտնել գործընկերներ և ներդրողներ, իսկ միջին բիզնեսին տրամադրում է հարմար գործիքների մի ամբողջ փաթեթ համացանցում իր բիզնեսի լայնածավալ զարգացման համար: Նշենք, որ այն իրականացվում է ԱՊՀ երկրների, գումարած Իսրայելը, միջեւ եւ մեր գործարարները լայն հնարավորություն ունեն «Ռուսհամագործակցության» հայաստանյան կազմակերպության միջոցով գտնել իր ուրույն տեղը եւ ներկայացնել իր գործունեությունը ԱՊՀ տարածքում:

Կոնֆերանսի ավարտին կողմերը կնքեցին տնտեսական զարգացման պայմանագիր: «Ռուսհամագործակցության» դաշնային գործակալության հայաստանյան գրասենյակի ղեկավար Մարկ Կալինինը հույս հայտնեց, որ այս պայմանագիրը կտա իր պտուղներն ու դրական արդյունքները: ԱՊՀ երկրների տնտեսական զարգացման բիզնես կենտրոնի ներկայացուցիչ Վալերի Միգիրովի խոսքով էլ՝ տնտեսական զարգացման բիզնես կենտրոնի նպատակն է ձեռնարկատերերին տալ բիզնես գործիքներ, որոնք նրանք կօգտագործեն իրենց բիզնես գործունեությունը զարգացնելու համար:

ԱՐՄԵՆՈՒՀԻ ՀԱԿՈԲՅԱՆ