ԻՆՉ ՈՒՆԵՆՔ ՄԵՆՔ ԳԵՐՄԱՆԱՑԻՆԵՐԻ ՀԵՏ ՀԱՆԴԻՊՈՒՄԻՑ ԱՌԱՋ

ԻՆՉ ՈՒՆԵՆՔ ՄԵՆՔ ԳԵՐՄԱՆԱՑԻՆԵՐԻ ՀԵՏ ՀԱՆԴԻՊՈՒՄԻՑ ԱՌԱՋ

Ընկերական հանդիպումների շրջանակում Շվեյցարիայի Սիոն քաղաքի ՙՍտադ դը Տուրբիյոն՚ ստադիոնում կայացած խաղում Հայաստանի հավաքականը ուժերը չափեց եւ 1:3 հաշվով պարտվեց Ալժիրի հավաքականին: Առաջին հաղթանակը համտեսած Բեռնար Շալանդը ստիպված եղավ առաջին պարտության համն էլ զգալ: Եվ ամենակարեւորը հասցրեց զգալ, թե որքան ծայրահեղ կարող է լինել հայ ֆուտբոլասերը:
Դե, այնպես չէ, թե պարտվում էինք առաջին անգամ կամ այլ սպասելիքներ ունեինք: Խնդիրն այստեղ այն է, որ ֆուտբոլասերների մի մասը, անկախ նրանից` հավաքականը ընկերական խաղ է խաղացել, թե` պաշտոնական, սպասում է հարմար առիթի` ինչ-որ թոհուբոհ բարձրացնելու համար:

Իսկ դժգոհությունների արտահայտման հարթակը նույնն է` սոցիալական ցանցերը: Եվ ելնելով ցանցային գնահատականներից, պարզ է դառնում, որ Բեռնար Շալանդին իսկապես դժվար օրեր են սպասվում Հայաստանում:
Ինչեւէ` ե'ւ հաղթանակ, ե'ւ պարտություն Բեռնար Շալանդն արդեն ունեցավ` Հայաստանի ընտրանու հետ: Իսկ առջեւում կարեւոր հանդիպում է սպասվում գերմանացիների հետ: Գերմանիայի ընտրանու որակների մասին ավելորդ է խոսել, այս թիմը միշտ հաղթողի հավակնորդ է: Իսկ ի՞նչ ունենք մենք գերմանացիների հետ խաղից առաջ. իրենց նորամուտը հավաքականում նշող մի շարք ֆուտբոլիստներ, Հենրիխ Մխիթարյան, ում գերմանացիները լավ գիտեն, Յուրա Մովսիսյան, ով կարող է իրեն դրսեւորել շատ լավ, բայց կարող է նաեւ բոլորովին աննկատ մնալ եւ մի մեծ խնդիր Բեռնար Շալանդի համար՝ վնասվածք ստացած Արաս Օզբիլիս: Վերջինս աջ ոտքի վնասվածքի վերջնական ախտորոշման համար Ամստերդամից կմեկնի Հռոմ, սակայն նախնական տվյալներով նա խաչաձեւ կապանների կտրվածք է ստացել, եւ հնարավոր է ֆուտբոլիստը բաց թողնի կես տարի:
Չնայած ստեղծված իրադրությանը, Շալանդը Գերմանիայի ընտրանու դեմ խաղից մեծ սպասելիքներ ունի. ՙԱյժմ ունենք եւս մի հնարավորություն՝ ցույց տալու մեր կարողությունները` շատ ուժեղ թիմի հետ խաղում, եւ ես չեմ բացառում, որ մենք լավ խաղ կցուցադրենք Գերմանիայի դեմ՚,- Շալանդի խոսքը մեջբերում է ՀՖՖ կայքը:  
Եվ այսպես, թիմն արդեն սկսել է նախապատրաստվել առաջիկա հանդիպմանը՝ տեղափոխվելով Լոզան մարզական համալսարան: Հավաքականն այնտեղ անցկացրեց ֆիզպատրաստության թեստեր, որոնց արդյունքները մշակելուց հետո յուրաքանչյուր ֆուտբոլիստի համար կկազմվի անհատական մարզումային ծրագիր: Ինչպես երեւում է, Բեռնար Շալանդը, բացի հատուկ մարտավարական շեշտադրումներ անելուց, յուրաքանչյուր ֆուտբոլիստի ուժեղ կողմերն է ուզում գործի դնել: Բայց խնդիրն այն է, որ հենց ֆիզիկական պատրաստվածությունն է, որ մեր հավաքականի համեմատ գրեթե միշտ առավելությունը մրցակցինն է դարձնում, եւ այս խնդիրը անհնար է օրերի ընթացքում լուծել:

ՔՐԻՍՏԻՆԵ ՊԵՏՐՈՍՅԱՆ